نظر جهته على يجيبه بهدوء وتعب
_امبارح كان فيه حادثة كبيرة، اتوبيس اتقلب وكان فيه حالات كتيرة بين الحياة والموت واغلب الدكاترة كانو مطبقين شغل، غير كان فيه عمليات كتير امبارح، ففيه دكاترة طلبناهم كمان بالتليفون امبارح ودلوقتى زى ما انت شايف ادى نتيجة السواقة المتهورة كل شوية والتانية مصيبة
نظر له الشاب برعب موضحا
_المشكلة يا دكتور انه المريضة نزفت دم كتير ولازم تدخل جراحة يا اما هتضطر انى اطلب منهم يروحو مستشفى تانى وده مش فى مصلحة المستشفى وسمعتها؛ وان طلبت اى دكتور دلوقتى بالتليفون هياخد وقت على ما يوصل
إلتف سليم ينظر جهته بقوة قائلا
_انا جاى معاك متطلبش حد، انا جاى اشوف الحالة بس خلى قسم الاشعة يجهز، وخلى كمان دكتور التخدير يجهز، وعقملى اوضة العمليات، وانا جاى اشوف الحالة دلوقتى، وابعت معايا ممرضة علشان هنسحب عينة دم للتحاليل المطلوبة اللى انا هشوف اننا محتاجينها
اومأ الشاب برأسه ليركض ملبيا طلباته فى حين امسكه على من ذراعه قائلا بهدوء
_متأكد يا سليم انك هتقدر؟ انت جاى من مشوار سفر ودى ارواح ناس
ابعد سليم ذراعه عنه قائلا بهدوء
_متأكد يا عمى انا مبلعبش ولا بستعرض وانتَ عارفنى
اومأ على برأسه ليتحرك الاخر فى حين تمتم هو قائلا
_ربنا يحميك ويحفظك يا بنى