_ملك كبرت يا هنا، ملك بقت عندها ٢١ سنة وخلاص هتتخرج من كلية العلوم، ذكية جداً يا هنا أكتر مما تتخيلى، دايما من الأوائل
ثم بدأ بكاءه يتعالى صارخا بألم
_شبهك يا هنا، الخالق الناطق أنتِ، مخدتش منى غير رتوش، لون شعرى وعيونى غير كدة إنتِ، حتى رقتها إنتِ، ملك بقت آيه فى الجمال ياهنا
ثم بدأ بكاءه يتحول الى بكاء طفل صغير كمن فقد والدته وهو يحتضن صورتها ويتكلم من بين شهقاته
_مقدرتش أحميها يا هنا، فكرت انى بهروبى وإنى اتخبى انى اقدر أحميها منهم لكن طلعت زى ما قولتى إن الدنيا بالنسالهم كخرم ابرة، ملك لولا ستر ربنا كانت هترمى نفسها فى وسطيهم، كانت هتروح منى يا هنا، الهدف إللى أنا عايش علشانه كان هيروح منى فى غمضة عين، كنت فاكر بهروبى بحميها لكن اكتشفت ان زى ما إنتِ بتقولى بضيع وقت مش أكتر ولازم المواجهة
بدأ يومئ برأسه لها وكأنها تراه وهو يقول من بين شهقاته
_أهو جه يا هنا، مش هفضل جبان، أنا اتصلت ب المنشاوى وكلمته وهروحله، ملك برده منهم ومن عيلته وهو هيقدر يحميها أحسن منى، كان لازم أعمل كدة من زمان بس كل شئ ب أوانه ودلوقتى أوانه، دلوقتى حان وقت إن ملك الدوينى تظهر على الشاشة علشان تاخد نصيبها وحقها إللى ضاع منها من سنين بعد ما كملت السن القانونى، دلوقتى وقت إن كل شئ يرجع لمحله يا هنا والحقوق ترجع لأصحابها، أنا عملت المستحيل وهربت سنين وعشت فى جحر زى الفيران علشان اللحظة دى