_آدم المنشاوى هو اللى بيقول حاجة زى دى!!
ابتسم لها بهدوء وان كانت ابتسامة حزينه ليجيبها بلطف شديد وهو يهز كتفيه ببساطة:
_حتى آدم المنشاوى قادر يحس ويفهم، ميغركيش السكوت اللى انا فيه ده بس انا مش معدوم الاحساس
نظرت ارضا بخجل من تعنيفه الخفى لها وبكل تلك الرقة والحنان الذى ينبع منه دون ان يحرجها او يضايقها حتى بحرف، لتجيبه بخجل شديد وتوتر اكبر:
_مش قاصدى، بس متوقعتش انك تتفهم مشاعر بنت وخصوصا انها غريبة عليك ومتعرفهاش
نظر لها بتعجب ليجيبها بثقة وحسم:
_ومين اللى قال انِك غريبة عليا، لازم تُبقى عارفة انِك انتِ اقرب ليا من اى حد دلوقتى، انتِ رباطى بالدنيا
ارتفع وجهها بصدمة ليومئ برأسه يقول بثقة وهو يؤكد على حديثه قائلا:
_ايوة انتِ مش غريبة انتى مراتى، انتِ اللى وصانى ربنا عليكِ ليوم موتى، يعنى ان مفهمتكيش اكون قصرت فى فهم نفسى، ان منصرتكيش اكون منصرتش نفسى، من النهاردة انا وانتِ واحد يا ملك يعنى مينفعش اقل منِك، مينفعش انى اتجاهل مشاعرك او رغباتِك، مينفعش ان انا محاولش حتى افهمِك، انتِ اللى المفروض ارتبط بيها باقى عمرى كله ف ان مكانتش علاقتنا مبنية على التفاهم والاهتمام ماهتعيش ابدا ولا هتقدر تواجه الحياة