سكتت لحظة.
بعدين قالتله:
“اسمع يا جاسر… من اللحظة دي، ولا كلمة.
مشفتش حاجة… ومحدّش يعرف إني كنت هنا.”
جاسر هزّ راسه بسرعة، باين عليه إنه هيحلف ما يتكلمش حتى مع نفسه.
مريم خدت اللابتوب تحت إيدها، كأنها شايلة قنبلة.
وخرجت من الأوضة… والمشي بتاعها ماكانش هادي.
كان المشي بتاع حد رايح ياخد حقه بإيده.
ووقفت قدام باب مكتب كريم.
وإيدها قربت من المقبض…
بس قبل ما تفتحه…
سمعت جوا صوت خافت…
صوت كريم… بيتكلم في التليفون.
بيوطي صوته…
وبيكرر كلام غريب:
“لا… هي مش فاهمة.
ما تقلقش… الموضوع ماشي.
الضغط شغال.”
مريم وقفت برا…
ولكل اللي حصل… فضلت هادية بشكل عجيب.
مريم وقفت برا الباب لحظة، ومع كل كلمة بتتسرّب من جوا، كانت بتبرد… مش بتسخن. البرد بتاع اللي عرف الحقيقة خلاص، ومش محتاجة صريخ ولا دراما.
ثواني…
وبدل ما تقتحم المكتب زي ما أي حد متوقع…
فتحت الباب بهدوء يمرض.
كريم وقف مكانه، الموبايل في إيده، والوش اللي كان بيهمس من دقتين… اختفى.
اتحوّل لوش واحد اتقفش.
مريم دخلت… سابت الباب يقفل لوحده.
ما قالتش “إزيك” ولا “عندك دقيقة” ولا أي مقدمة تحترم الأعصاب.
مشت خطوتين بس… وبعدين حطّت اللابتوب بتاعه على مكتبه قدامه بالراحة… الرخاوة اللي تخوّف أكتر من الخبطة.