“Meeting_Notes_KR”
والمصيبة؟
الصفحة فيها ملاحظات مكتوبة…
تفاصيل عن الاجتماع…
وكلام اتقال…
وحاجات ماكانتش المفروض ولا حد يعرفها غير اللي كانوا جوّا.
بس في سطر واحد وقف لها الدم:
“مريم… مش قد الخطوة الجاية. هنستغل ده.”
مريم حسّت جسمها كله سخّن، بس وشها فضِل ثابت.
ودماغها اشتغلت بسرعة.
قالت لجاسر بصوت ثابت:
“اللابتوب ده بتاع مين؟”
والواد… بلع ريقه وقال:
“حسب الـ Login… هو… بتاع كريم.”
مريم ثابتة مكانها… واقفة قدّام اللابتوب بعقل شغّال أسرع من الـ Wi-Fi في إعلان. وشها مفيهوش تعبير واحد، وده أخطر حاجة فيها أصلاً.
جاسر واقف وراها، حرفياً ماسك نفسه مايتكلمش زيادة.
مريم قفلت الملف… وبدأت تقلب باقي الفولدر.
لقيت ملفات تانية فيها نقاط عن الاجتماعات القديمة… ملاحظات مش رسمية… حاجات باين إنها مكتوبة بصيغة “حد بيتابع حد” مش “حد بيذاكر شغل”.
وقلبت على ملف اسمه:
Actions_NextStep
فتحت…
ولقت جملة قصيرة:
“الضغط لازم يزيد. خليها تغلط.”
أيوة… مكتوبة كده.
وساعتها… مريم تنفّست النفس اللي بيبقى قبل الانفجار. بس لسه ثابتة.
قفلت اللابتوب… وقامت واقفة مستقيمة كأنها في محكمة.
بصت لجاسر:
“انت متأكد إن اللوجين بتاع كريم؟”
قالها:
“أيوة… اسمه فوق، وحتى الإيميل الداخلي بتاعه هو اللي عامل Sync.”