– كده مفيش قدامنا غير إننا نستعين بالشركاء الأجانب في المجموعة و……
_ قطع ريان حديثه ، ونهض عن مقعده ليتجه نحو شاشة العرض الكبيرة .. وقف أمامها لثواٍن قبل أن يهتف بنبرة مرتفعة
– مش هلجأ لأي شريك أجنبي ، وأول فرصة هتجيلي عشان أتخلص منهم هتخلص ومن غير تردد
المستشار وهو يذم على شفتيه بتبرم متسائلًا : يبقى في حلول تانية عند سيادتك !
ريان وهو يتفقد مؤشرات البورصة التي تسببت في إفلاس مجموعة شركات والدهُ : آه
_ أستدار بجسده لينظر للجميع ، ثم نطق بعبارة جعلتهم يُصعقون من هول ما دار بخُلده و….
– إحنا هناخد قروض كبيرة من البنوك بضمان المجموعة ، عارف إنها مجازفة كبيرة خصوصًا إن وضعنا صعب ، لكن مفيش حل تاني هقبل بيه غير ده
المستشار وقد أنفرجت شفتيه غير مصدقًا : حضرتك كده هنضيع المجموعة كلها ، لأننا مش ضامنين إن الشركات هترجع زي الأول ، كده إحنا بنرمي نفسنا في النار
ريان وهو يستدير برأسه لينظر إليه بإستخفاف : عارف ، واللي بيخاف من النار يقدم إستقالته وأنا هقبلها فورًا وبدون تردد
_ ألتفت لينظر للجميع بنظرات جامدة ، ثم كور قبضتيه ليضرب بهما على سطح الطاولة وهو يزأر بصوته هاتفًا
– الشركة دي كانت بيتكم التاني ، كلكوا كلتو من خيرها ، ودلوقتي لو مش عايزين تقفوا وراها عشان ترجع أحسن من الأول يبقى متلزمونيش ، الفترة الجاية أصعب فترة هتمر على تاريخ الشركة كلها ، اللي مستعد يقف معانا أهلا بيه ، اللي مش عايز في ستين ألف داهية .. والقرار ليكم