قام المشرف على الرحلة بأصطحابهم لداخل الفندق .. ثم تركهم بالساحة الفسيحة لينهي هو إجراءات الأقامة بالفندق ، بينما جلست كارمن على أحد الأرائك المخملية الزرقاء في إنتظار الإشارة بالتحرك ..
وأثناء إهتمامها بالمحادثة مع ” ريان ” تفاجئت بوجود جسد بشري يسد عنها الضوء ، فرفعت رأسها لتكتشف هويته .. لتتفاجأ بـ قُصي ..
أتسعت عينيها عن آخرها وهي تحدق فيه ، وضغطت على الزر الجانبي للهاتف لإغلاقه .. نهضت عن جلستها بتشنج وهي تحدجه بغيظٍ شديد ثم نطقت بإستنكار :
– إنت جاي ورايا !؟
قُصي متمعنًا النظر بها : قررت أقضي معاكي عيد ميلادك بعد بكرة ، ولما عرفت إنك مسافرة مقدرتش أستنى وجيت على طول
كارمن وقد قست تعابير وجهها : أنت ازاي تفرض نفسك عليا بالشكل ده ! لحد أمتى هفضل أقولك أبعد عن طريقي؟
_ لاحظت تاج هذه المشادة الكلامية بينهم ، فتابعت الموقف عن بُعد وقد تنغض جبينها بإستفهام ..
لتجد هاتفها يصدر رنينًا متتاليًا ، نظرت إليه لتجد شقيقها يتصل بها .. فأجابت دون تردد و…..
– أيوة ياريو
ريان بنبرة يشوبها القلق : تاج ، أنا كنت بكلم كارمن على الواتساب وفجأة قفلت ، طمنيني في حاجة حصلت !
تاج وهي تتأمل هذه الأجواء المضطربة بينهم : لأ مفيش ، بس هي بتتكلم مع واحد كده وشكلها بتشد معاه جامد
ريان وقد تحفزت حواسه لعبارتها : نعـم ! مين ده ؟
تاج وقد تلوت شفتيها : مش عارفه أول مرة أشوفه ، بس باين عليه ابن ناس يعني
ريان وقد أحتقنت عينيه بالدماء : طويل ورفيع ، شعره قصير وبني غامق وبشرته بيضا شوية ؟
تاج وقد أرتفع حاجبيها بذهول : إيـه ده ! أنت تعرفه ؟
ريان وهو يضرب بقبضته الحائط وبعنف : إلا أعرفه ! ده عــز المعرفة .. أقفلي دلوقتي
تاج : ريـ….