_ تقوست شفتيها وهي تهز رأسها بتفهم ، ثم مالت عليه لتهمس بخفوت :
– أنا منصحكش تاخد ولا خطوة نحيتها ، ريان بيخاف على أخته بصورة متتخيلهاش ، يعني مش هيسمحلك تقرب حتى منها
كريم وقد بدأ تفكيرهُ يتطور : أمــم ، بس انا آ….
يسرا وهي تقاطعه بحزم : مش بقولك أي كلام وخلاص ، فكر بس تزعل تاج ولا تنكشها هتلاقي أخوها في وشك على طول .. وريان غبي في الحاجة اللي تخصهُ
كريم وقد أحتدت نظراته وهو يتابع : أنتي شيفاني إيه بالظبط ! خلاص رايح أكلها مثلًا !
يسرا وهي تجتهد لتوصيل المعلومة بشكل مهذب : لأ مش ده قصدي ! لكن مش ده النوع اللي تلاغيه وبعدين تسيبه وتمشي ياكريم
كريم وقد ضاقت عينيه بضيق : بما إنك عرفاه كويس كدا ، يبقى تعرفي علاقتهُ إيه بأختي ! ؟
يسرا وقد تسرب التوتر إليها : هه ! لأ مفيش ، just friends ( مجرد أصدقاء )
كريم بعدم تصديق : بصي على عنيه كدا يايسرا ، دي مش نظرات صديق .. دي نظرات واحد واقع على بوزو
_ لم تستطع يسرا كبح ضحكتها عقب عبارته الأخيرة .. ثم تابعت بصوت يختلجهُ الضحك :
– فعلاً
كريم وقد جحظت عينيه بعدم تصديق : نعـم !
يسرا بصوت متعقل : بص ياكريم ، أنا عارفة إنك مش بتدخل في حياة كارمن ، ودي كانت رغبة أونكل جلال دايما .. لكن عشان دماغك متلفش كتير أنا هريحك ، ريان وكارمن مش بس بيحبو بعض ، دول خلاص كتبوا أساميهم على أسامي بعض