_ جذب كفها بشياكة شديدة وقربهُ لفمهُ ليقبلهُ .. بينما علقت أنظارهُ على عينيها التائهتين .. وفجأة أنفتح الباب ليظهر كريم من خلفهُ ، وقد أصابه العجز عن النطق مما رآه ..
هل هذا هو الرجل الذي طالما مقتتهُ وبغضت وجودهُ.. الآن هو الأقرب إليها ..
حدجهما بعدم تصديق ، بينما تنهد قُصي بسئم وهي يقول بنفاذ صبر :
– خير ياكريم !
يارب متكونش جاي عشان حاجة تافهة
كارمن وهي ترمقهُ بإنفعال بيّن : قُصي ، خلي بالك من كلامك مع أخويا
قُصي بنبرة متفهمة : I’m sorry يابيبي
كارمن وهي تنهض عن جلستها لتتقدم من شقيقها : عمومًا إحنا خلصنا كلام ، عن أذنك
قُصي :……..
_ سحبت شقيقها خلفها لتكون خارج هذا المحيط الذي يخص ” قُصي ” بينما توقف شقيقها وجذبها بعنف وهو ينطق مستفهمًا :
– أنا عايز أفهم اللي بيحصل بالظبط!
كارمن وهي تحرر رسغها من قبضتهُ : مفيش حاجة بتحصل ياكريم
كريم مشيرًا بسبابته وبلهجة محذرة نطق : أوعي ياكارمن ، أوعي تفكري توافقي على عرضهُ
كارمن وهي تطلق تنهيدة مختنقة من صدرها : ليه لأ ؟
كريم بعدم تصديق وقد أتسعت عينيه عن آخرها : تتجوزي ده !
كارمن وهي تخفض بصرها بقهر : لسه بفكر !
كريم : تفكري ! ده أكتر واحد كنتي بتكرهيه في حياتك ! إزاي ممكن تتجمعي معاه في مكان واحد
كارمن وهي تنظر حيالهُ بثبات مُريب : أديك قولتها ، كنت ! يعني فعل ماضي وراح لحالهُ .. عن أذنك عندي شغل