كان حمزه متسطح علي فراشه وهو ينظر للسقف بشرود فقد جافاه النوم من رحل الجميع والان ذهب احمد في نوم عميق وتركه وحده هكذا يشتاق اليها كثيرا ففي الايام القليله الماضيه اعتاد النوم بين احضانها والأن ينام بعيدا عنها.
شعر بحركه خارج غرفته فنظر بدقه وجد مقبض غرفته يتحرك بهدوء وكأن من يفتحه يتعمد الا يصدر اي صوت تحفز جسد حمزه ووضع يده علي جرس المشفي حتي اذا كان شخص غير مرغوب يطرق الجرس سريعا ولكن حينما فتح الباب وجد جسد ادهم يهيمن علي الغرفه نظر بتعجب وهمس / ادهم
ابتسم ادهم وأغلق الباب مجددا ونظر لجسد احمد المسجي علي الاريكه بجانب الباب واقترب من حمزه وجذب مقعد وجلس عليه ثم تحدث / كويس انك صاحي
حمزه بتعجب / انت جاي هنا دلوقتي ليه
ادهم وهو يتنهد بضيق / زهقان يا حمزه زهقان ومخنوق آوي آوي مش عارف اتكلم مع مين ولا احكي لمين حاسس ان فيه صخره كبيره محطوطه علي صدري يا حمزه مش عايز أبين قدام اخواتي اني لسه متأثر او مش متقبل الوضع
ابتسم له حمزه وربت علي كفه بحنان وطيبه / اهدي بس يا أدهم انا حاسس باللي فيك انت بس احكي وقول اللي حابب تقوله وطلع اللي جواك كله كأنك بتكلم نفسك
ابتسم له ادهم ثم زفر وتحدث / طول عمري عايش وانا عارف اني لوحدي اي حاجه هتحصل هلاقي نفسي لوحدي
ضحك بسخريه /تصدقني لو قولتلك كنت بخاف اموت لوحدي ومحدش يعرف اني مت وعيت علي الدنيا وانا شايف ان صالح هو ابويا وامينه هي امي وفي الاخر…
صمت قليلا ليبتلع غصته / في الاخر طلع ابويا رماني ليهم بفلوس مش شايفها غير كده انه رماني ليهم كان عنده آكتر من ميت طريقه من بينهم يبعتني ليكم هنا ويقول اني ابن اخوه بس لا اختار يرميني لواحد غريب منكرش انه اخد باله مني ورباني كأنه ابنه بس…..
صمت لتسقط دمعه منه / بس انا عمري ما حسيت بحنان ام او سند الاب يا حمزه عارف هما عطوني كل حاجه كل حاجه ماعدا العواطف دي كان نفسي تيجي امي مره وتاخدني في حضنها كان نفسي بابا يجي ويقولي تيجي نلعب كوره سوا كان نفسي ابقي زي العيال الصغيره اللي أهلهم جنبهم….. المهندس محمد اي نعم يشكر كان ساعات يجي معايا العب بس عمره ما خدني في حضنه تخيل
بعد موت آلأتنين اللي كنت مفكرهم اهلي بعتوني لجدتي
ثم اكمل بسخريه / او اللي كنت مفكرها جدتي منكرش اني لأول مره في حياتي احس بالحنان ده عشت معاها كام سنه من أجمل سنين عمري بس حصلت حريقه كبيره في البيت وانا كنت بره وحرمتني منها
شهق ادهم بهدوء / وكل ده والمهندس محمد واخد دور المتفرج واللي بيجي يطبطب عليا تعرف لما فقدت جدتي وحصل اللي حصل حتي مجاش حضني ولو تحت بند ابن اعز صحابي
سقطت دموعه اكثر / كنت عايش حياتي كلها وانا يتيم عايش وحيد كنت بدخل البيت احس ان قلبي انقبض ادهم اللي الكل شايفه سند وقوه أضعف من كده بكتير تعرف
صمت يفكر قليلا في ما هو علي وشك التحدث عنه غض حلقه ببكاء عنيف / مكنتش بعرف انام كل يوم غير لما افضل اعيط ادهم الطفل اللي فقد كل حاجه كان جوايا كل يوم يعيط ويصرخ انه عايز اهله عايز يعيش عايز يرجع يعيش طفولته زي باقي الأطفال كنت كل يوم بليل بعيط لحد ما اتعب واتخيل لو كان عندي ام او اب اكيد مكنتش ههون عليهم اني اعيط كده صح
رفع عينه المليئه بالدموع وهو يسأل حمزه كأنه ينتظر جوابه فجذبه حمزه لاحضانه وربت علي ظهره وهو يحاول منع دموعه بينما ادهم بكي بشده وهو مازال يردد / مكنتش ههون عليهم صح؟؟؟؟ مكنتش ههون
صمت ثم قال ببكاء شديد / بس انا هونت عليهم يا صاحبي هونت علي الباشمهندس محمد يشوفني كل يوم بتدمر آكتر واكتر ومفكر اني قدها وقوي لا انا ضعيف يا حمزه ضعيف آوي أضعف مما تتخيل ادهم الطفل لسه جوايا مش راضي يسيبني وبيقولي انه ما اخدش فرصته يعيش عادي ومش هيسيبني اعيش حياتي طبيعي
بكي اكثر وهو يتحدث/ تعرف انا روحت لدكاتره نفسيين كتير اوي لحد مابقيت كده بقيت من بره بارد انا الأول كنت علي حافه اني أقع يا حمزه تعرف مفيش حاجه هونت عيشتي دي غير الوقت اللي كنت بقضيه مع مليكه دايما بس لما سافرت وسابتني رجعت لاكتئابي وادويتي دي تاني كنت بعاني وانا محبوس في أربع حيطان لوحدي الوحده وحشه اوي يا حمزه وحشه اوي
بكي ادهم بشده بينما حمزه كانت تسقط دموعه علي ما عاشه ابن عمه من كان يظن ان خلف ادهم القوي والصامد والبارد ادهم طفل مازال يختبئ في الظلمات أسفل الفراش ينتظر من والدته ان تأتي وتنتشله من ظلمته وتضمه بحنان الي صدرها وتخبره ان كل شئ بخير مازال ينتظر أسفل فراشه حتي يأتي والده ويخبره انه دائما معه وانه دائما يشجعه لقد عاني كثيرا في طفولته وعمه أخطأ مجددا وايضا من تحمل خطأه هو أولاده وليس هو كما فعل مع مليكه وملك وأسر أخطأ عمه أخطأ وبشده
تحدث حمزه بهدوء وحنان وهو مازال يربت علي ظهره بحنان / هتتعدل يا أدهم والله هتتعدل الدنيا هتضحك ليك وتبتسم كمان ضاقت فلما استحكمت حلقاتها فرجت وكنت اظنها لا تفرج، ثق ان ربك بيجهز ليك فرحه كبيره تنسيك كل حزنك ده وياسيدي احنا بس نخلص الوش ده كله وهجوزك البت سندس يلا مش خساره فيك البونبوني بتاعي
ضربه ادهم علي كتفه وهو يحاول التحدث بصوت طبيعي / بس ياض انت بونبوني في عينك انا بغير
ضحك ادهم بشده وابعده وتحدث / عارف بتخيل ايه دلوقتي
نظر له ادهم بتعجب فاكمل حمزه / بتخيل سعديه وهي بتفتح الباب زي الزوجه اللي قفشت زوجها بيخونها علي سريرها وتقول ( آه يا معفنين مستنين يحصل ايه تاني عشان تتوبوا اتفوووووو عليكم وعلي الفجور اللي انتم فيه يارب ارحمنا يارب استغفر الله)
انفجر ادهم ضاحكا علي طريقه تقليد حمزه لسعديه ثم تحدث وهو يمسح دموعه ولا يستطيع كتم ضحكاته التي شاركه بها حمزه / بجد يا حمزه انا سعيد جدا اني رجعت مصر واتعرفت عليكم كلكم بجد مليكه ليها الفضل في الموضوع ده من بعد ربنا
حمزه وهو يضع يده علي كتف ادهم / ده قدر يا أدهم قدر انك بعد السنين دي تلاقي عيلتك اللي تضمك تآني.
ابتسم ادهم ونظر لذراعه وأشار لها / بتوجعك
نظر حمزه لذراعه وحركتها بخفه / لا خالص بص هو تشنج صغير بيها
ابتسم ادهم / الحمدلله جات علي قد كده بس هو اللي خبط العربيه كان اعمي
رفع حمزه عينه لادهم وتحدث بسخريه / لا كان قاصد آكتر من كده بس ربك بقي اقوي منهم ومن كل اللي زيهم وارادته هي اللي نفذت
تحفزت حواس ادهم واعتدل في جلسته ونظر له بجديه وتحدث بنبره توحي بعوده ادهم البارد برود القطبين /قصدك ايه بكان قاصد
ابتسم حمزه ببرود / إيهاب كان بيهزر معايا بس هزاره كان تقيل شويه
انتبه له ادهم جيدا فقص حمزه كل ما حدث له / بس كده وانا اول ما بقيت قدام الشارع الفرعي حسيت بصوت عربيه جامد اوي كأنها هتطير من علي الارض لسه ببص جنبي لقيت عربيه جايه باقصي سرعتها ايدي تلقائي اتمدت للباب جانبي لأنها كانت جايه من الجنب التاني مش ناحيه الباب بتاعي بس ملحقتش للأسف انط الا ولقيتها خبطت فيا باقصي قوه عندها ومن قوه الاصطدام جسمي اترمي بره العربيه من الباب اللي كنت سبق وفتحته والحمدلله لولا كده كان زماني مفروم وهما بسبب الخوف هربوا بسرعه من غير حتي ما يشوفوا حصلي ايه وانا كنت في الأرض واقع علي دراعي وجم ناس وجاوبني هنا والحمدلله اديني قدامك اهو
هز ادهم رأسه بشرود فتحدث حمزه / بتفكر في إيه.
ادهم ببسمه مرعبه / بفكر اننا احنا كمان لازم نهزر مع إيهاب هو مفكر أن هو بس إللي دمه خفيف
ابتسم حمزه بسمه مخيفه