RAHMA NABIL 美心
كان يسير رامي وهو يستند علي احد أصدقائه وهو مينا ويضربه / ابو دي مستشفي معندها ريحه الدم يا أخي وانت يا حيوان جاي تاخدني بعربيه من مخلفات الحرب يا حيوان
تحدث مينا بتذمر / الله وانا ذنبي ايه محتاجينك عشان فيه عجز
رامي وهو يدعي / يا أخي عجزتم واحد واحد يابعيد ده انهارده كتب كتاب اختي يا معفنين يعني رجلي مكسوره وفرح اختي هتدوني اجازه أمتي لما القيامه تقوم
زفر مينا بملل / يا خويا خلاص بقي منا زي زيك متنيل اهو بقالي يومين مرجعتش البيت لما نسيت مراتي شكلها ايه اساسا
ضربه رامي وهو يستند عليه / وانا مالي تنساها ولا تفتكرها انا مالي يارخم انا واحد رجلي مكسوره مش قادر اتحرك ايه اكشف وانا علي كرسي متحرك بروح أهلكم
ضحك مينا / خلاص بقي يا عم كلت دماغي
رامي وهو يضربه اكثر / اسكت خالص يابجح مش كفايه عربيتك اللي بتذقها آكتر ما بتركبها دي أتفضل شوفلنا تاكسي خلينا نخلص
نظر مينا /اصبر خلاص نطلع للشارع الرئيسي واشوف توكتوك
رامي / توكتوك لما يعدي عليك يفرمك يا بخيل انت
مينا بتذمر / بس ياض لسه مقبضتش يا خويا بعدين انت عارف ان مراتي حامل ومحتاجه مصاريف و…..
كان مينا يتحدث ولم ينتبه لرامي الذي تيبست قدمه بالأرض وهو يري مايحدث امامه
صدم رامي مما يري فهذه ندي التي تقف مع أحد الشباب في زاويه الطريق وهو يقترب منها بشده ويربت علي خدها بطريقه قذره شعر بدمائه تفور وبشده نظر لصديقه وتحدث بصوت بالكاد خرج هادئأ / معلش يا مينا روح انت وانا هحصلم عشان نسيت حاجه
نظر له مينا بتعجب / نسيت ايه ارجع معاك م…
قاطعه رامي وهو يغير اتجاه سيره / لا معلش روح انت وانا هحصلك
مينا / طب اجي معاك احنا بعيد عن البيت
رامي بملل / يوووه بقولك روح انت بص هاخد توكتوك وارجع ومش هتأخر معلش
هز مينا رأسه بعدم اقتناع وسار وهو ينظر لرامي الذي اخذ ينظر له بشرود حتي احضر مينا توكتوك وصعد اليه ورحل وهو ينظر لصديقه بتعجب علي تصرفه بينما رامي اخذ يسير بعكاز واحد تجاه الزاويه التي توجد بها ندي وهو يدعي ربه ان يكون أخطأ وانها فتاه اخري وليس صغيرته البريئه يدعو الله الا تكون تلوثت زهرته الغاليه التي خاف ان يتزوجها الان حتي لا تذبل مبكرا أراد أن ينتظر حتي تنضج