ارتسمت ابتسامة كبيرة ساخرة على شفتيه تحمل وعيد مخيف ، وكأن عقله فجاءة وجد الفكرة المناسبة التي ستجعل الشيطانة تدفع ثمن ما فعلت غاليا ! ، نظر صوب شاهين ومن ثم تنهد يطلب منه :
– احكيلي بقى اللي حصل معاك ، أنا واثق أن اللي حصل كتير ، وكتير أوي كمان
ارتسمت ابتسامة حزينة باهتة على شفتي شاهين عاد بظهره إلى ظهر كتف ذراعيه وأغمض عينيه وبدأ يقص عليه كل ما حدث له ، هب زياد واقفا يصرخ في وجهه مرتعبا :
– يا نهارك مش فايت يا شاهين ، دا أنا أكتر واحد عارف أنت قد إيه بتحبها ، إزاي تعمل فيها كدة ؟! ، أنا مش متخيل أن القرف دا طلع منك أنت على رفق ، شهرت بيها واتجوزتها غصب عنها ، وختامها مسك اغتصبتها ، لاء وبجح بتزعق معاها قبل ما تيجي ، كل اللي هي قالته ، أنت خوفت على شكلك وصورتك يا شاهين
ادمعت عيني شاهين وهب واقفا يصرخ في صديقه بكل حرقة :
– أنا ناقص تقطيم يا زياد ، أنت مش عارف حالي عامل إزاي ، أنا في جهنم مش لاقي مخرج ، أختي واللي حصلها ومش عارف أخد حق ولا باطل من الكلب دا ، عشان الرسالة اللي هي كتباها إنها هتهرب معاه بمزاجها والوسخ خلاها تكتبله نسخة منها ، ونفسي أشرب من دمها بس أمي هتروح فيها ، ولما جيت اخد حقي ، أذيت نفسي ما أذيتش حد غير نفسي ، أنت مش متخيل رفق حالتها عاملة إزاي ، بتكرهني إزاي ، كل دا عشان حامد الوسخ ياخد العمودية وعضوية مجلس الشعب ، ويدخل القرف اللي بيدخله وما حدش يقوله بتعمل ايه ، اديني سيبت البلد كلها وهاخد أمي وأختي وبعدين هحرقها على دماغ حامد وابنه والكل ، أنا بس نفسي رفق تسامحني ، ماليش عين حتى أقولها سامحيني ، أنا آسف ، أنا حيوان ، أنا مش قادر أعيش وأنا شايفك بتتدمري قدامي وأنا اللي دمرتك بأيدي