– يارب ، أنا ما كنتش عايزة أموت كدة ، عمري في يوم ما فكرت انتحر ، بس أنا خلاص مش قادرة استحمل ، أنا مش مسمحاهم يارب لا أبويا ولا مالك ولا شاهين ولا أهل البلد كلهم ، كلهم ظلموني ، وخاضوا في شرفي وقهروني ، يارب سامحني بس أنا خلاص مش قادرة استحمل
أنزلت رأسها تنظر للبحيرة من جديد أغمضت عينيها تعتصر جفنيها بعنف لا تريد أن ترى ما ستفعل ، تتلو الشهادتين :
– أشهد أن لا إله إلا الله ، وأشهد أن سيدنا محمد رسول الله ، يارب سامحني
كانت على بُعد خطوة واحدة من أن تقفز ولكنه منعها ، شهقت مذعورة تفتح عينيها على اتساعهما حين شعرت بذراعها تلتف حول جذعها تجذبها للخلف يلتصق جسدها بجسده الواقف خلفها ، لم تكن تحتاج للقليل من الذكاء لتعلم أنه هو ، رائحته مميزة كانت سلفا تشعرها بالأمان ولكنها الآن تذكرها بأنه الشخص الذي هشمها روحها وجسدها وكبريائها إلى فتات ، ليظل محتفظًا بصورته المقدسة أمام أهل القرية ، نزلت الدموع من عينيها حين وصل صوته إليها :
– مش هتموتي يا رفق ، أنا كنت وراكي من ساعة ما خرجتي من البيت ، يا ريتك كنتي بتحاولي تهربي بس تعيشي ، أنتِ بتحاولي تموتي نفسك ودا مش هسمحلك بيه ، أنا عارف في اللحظة دي إن أنا أكتر شخص بتكرهيه في الدنيا وأنا مش هبرر اللي عملته ، الغضب والحقد اتملكوا مني ، أنتي عارفة فين المشكلة إن أنا اكتشفت أن أنا ما انتقمتش من أبوكِ وأخوكِ ، أنا انتقمت منك ومن نفسي قبلك ، بس مش هسيبك تموتي بالطريقة دي ، أنا عارف أنك مش هتسامحيني ، بس خليني أكفر عن جزء بسيط من غلطتي في حقك وأعيشك الحياة اللي كان نفسك تعيشيها ، جهزي نفسك كلها كام ساعة وهنسافر القاهرة