شرد قليلا وتفهم تلك العلاقه المترابطه التى بينهم ولكن لم تصرحه بوفاه والدتها الى الان وشعر بلمعه حزن سكنت عينيها ، يريد محوه
– وليه قضيتي اول سنتين من عمرك فى بيت خالتك ؟
ابتسمت بألم : عشان ماما فيروز اتوفت بعد ولادتي بسبب اهمال فى المستشفى وأنا كنت فى الرعايه لم حصل كده لماما ، بابا خاف عليه افضل موجوده فى رعايه المستشفى وخالتو اخدتني عندها وفضلت معاها وقتها كنت محتاجه رعايه خاصه بسبب ضعف الرئه عندي ، بس بسبب اللى حصل لماما بابا ماكنش عنده ثقه فى أي مستشفى ، وبابا سجلني باسم فيروزه عشان ماما كانت فيروز وبعد سنه خالتو طلبت من بابا يتجوز وماما دريه كانت صديقه خالتو ووافقت على ظروف بابا بس أنا كنت مرتبطه بعامر اوى ، بس بابا ماكنش حابب افضل عند خالتو وعشان كده اتجوز ماما دريه وبعد سنه جت رِهام اختي
امسكت القلاده المحاطه بعنقها وابتسمت بحب : دي فيروزه سلسله ماما وبابا لبسهالي لم كان عمري خمس سنين ومن وقتها ماقلعتهاش
ابتسم لبسمتها واقترب منها يقبل جبينها : حسيت فعلا انها غاليه عندك اوي وكان عندي فضول اعرف مين هداهالك ووقتها قررت اجبلك شبكتك من الفيروز وفعلا رسمت العقد والاسوره والخاتم
نظرت لذلك الخاتم الموضوع باصابعها : ذؤقك جميل جدا ، وعجبني اوى اختيارك الفيروز