باااااك **
جت الاسعاف واخدوا سارة عشان ينقلوها لمستشفي كبير متخصصة لعلاج الامراض النفسيه وراح معاها احمد واسلام عشان تبدا اول مرحلة في علاجها
وصلوا المستشفي وحجزوا لها اوضة واتعلق لها محاليل ولبست زي المستشفي باسها باباها في راسها وخرج من الاوضة هو ويحيي واسلام
خارج الاوضة
يحيي : دلوقتي استاذ احمد هتسيبني مع اسلام محتاجه جدا عشان هو في اعتقادي دواء سارة
احمد بتنهيده طويلة كلها حزن : حاضر يا دكتور .. طلع لاسلام فلوس وادهاله وقاله انا ماشي وقت ما تخلص روح انت …
اسلام وبيبص في الارض بخجل : حاضر يا بابا
مشي احمد ويحيي اخد اسلام لاوضته في المستشفي
ومن هنا هتبدا سارة رحلة العلاج اللي بقي اكيد ان مرضها نفسي مش اكتر
يحيي بهدوء وهو قاعد علي مكتبه : اسلام تشرب ايه ؟
اسلام : لا مش عايز .
يحيي بمرح : لا يا عم ايه مش عايز دي لا احنا مطولين هنا اوي احتمال يبقي فيها بيات ها اجيبلك عصير فريش كده
اسلام : ماشي … طلب يحيي العصير وابتدي يدردش هو واسلام
يحيي : ها بقي يا ابو الكباتن ممكن تحكي لي عن ساره حابب اعرف كل حاجة …
اسلام وبيمسح علي وشه بضيق وحاسس بتانيب الضمير الشديد: سارة اممممم ابدا منين ولا منين ابدا من اول ما اتولدت كان عندي ساعتها تقريبا 5 سنين ماكنتش طايقها بسبب اني كان نفسي في ولد بعد ما ماما ولدت هبة اختي الاصغر مني علطول وبدات افقد الامل ان يبقي ليا اخ ولد فمن صغري وانا اخانق فيها وهي لما كبرت شويه وبدات تتكلم كانت مش بتسيب فرصة الا لما تخانقني فيها وكانها بتلعب ولما اضربها ولا ازقها بعيد عني وتعيط اجري عليها اطبطب عليها وامسح دموعها واخدها في حضني … اسلام وبيتنهد بالم : سارة مش بس اختي ساره بنتي سارة كل حاجه حلوة في حياتي بتخانق معاها بس عشان احس ان انا موضع اهتمامها بضربها عشان تزعل واصالحها ونفضل نتكلم علطول انا بحب كل اخواتي بس سارة ليها محبة خاصة في قلبي
جه الساعي وحط قدامهم العصير وخرج شرب اسلام شوية منه وبياخد نفسه
يحيي : يا سلااااام .. ده انت لو مش اخوها هقول عليك العاشق الولهان ايه يا عم الكلام ده ؟
اسلام بابتسامة حزينة : عاشق اختي ايه المشكلة ؟!! واهو بغبائي موتها بايدي …
يحيي : يا شيخ الملافظ سعد .. سارة زي الفل بس هي محتاجاك جنبها شوية وبتدلع عليك
اسلام : انا هعمل اي حاجه بس تخف … بس انا متاكد انها مش طيقاني
يحيي : تعالي اثبت لك كلامي…. اخد يحيي اسلام وراحوا اوضة سارة وقعدوا جنب سريرها
اسلام بيتامل ملامح سارة وشها لسه في كدمات من ضربه ليها مشى بصوباعه علي جروحها ونزلت دموعه غصب عنه وفجاة حس بتغيير في ملامح وش سارة بص ليحيي بتعجب وتساؤل
يحيي بضحكه خفيفة : لسه مالحقتش اشرح اهو ده اللي كنت عايز اقوله سارة سامعنا حاسه بينا عايزة بس تطمن انك مش هتاذيها تاني وربنا جعلك داء ودواء سارة هتقدر علي كده يا اسلام ؟
اسلام باندفاع : انا هعمل اي حاجة بس ترجع لي ..
يحيي : علي بركة الله …. تعالي معايا اقولك هنعمل ايه
اسلام باس سارة في راسها وقام مع يحيي وخرجوا من الاوضة