رواية بين الحب والانتقام الفصل السادس 6 بقلم نور محمد – للقراءة المباشرة والتحميل pdf
نزلت تحت بهدوء، وفجأة سمعت صوت جاي من ناحية المكتب. قربت أكتر، ولما دخلت… شافت علي واقف بيتكلم في التليفون.
علي بصوت واطي في المكالمة: “تمام يا بدران… أنا جايلك.”
وقفت وعد مكانها، قلبها دق بسرعة وهي سامعة اسم أبوها. علي لمحها بسرعة، قفل المكالمة وبص لها.
وعد (بتوتر): “كنت بتكلم بابا؟”
علي (بهدوء): “آه.”
وعد: “قالك إيه؟ كان بيكلمك عليا؟”
علي (بحزم): “لا.”
سكتت وعد وبصت له بتركيز، تحاول تقرأ ملامحه.
علي (بصوت جاف): “باين إنه ميعرفش بالخلاف اللي حصل بينك وبين رانيا… ولا حتى إنك مش موجودة في البيت.”
كلامه وقع على قلبها تقيل، كأنه بيكسر آخر خيط ليها مع أهلها.
وعد (بصوت مبحوح): “لو كان عرف… أكيد مكنش هيكون هادي كده.”
علي: “دي الحقيقة. هو معرفش… وأعتقد حتى لو قلتي، رانيا هتنكر.”
بصت له وعد بعيون فيها وجع، وكأنها بتسلم باللي بيقوله. بعد لحظة سكتت، وبعدين قالت بصوت واطي متردد:
وعد: “دلوقتي عرفت ليه مش عايزة أرجع البيت… أوقات بحس إنه…”
وقفت عينها في عينه، كأنها محتاجة قوة تكمل كلامها. وبعد لحظة همست:
وعد: “بحس إنه مش بيتي.”
سكت علي بعد كلامها، قام واقف قدامها بعينيه الساكنة اللي صعب حد يقراها وقال بهدوء:
علي: “اقعدي هنا براحتك… لحد ما تكوني عايزة ترجعي.”