———————————————
توسطت شمس يوم الجمعة السماء لتتجهز كل اسرة امام الفطار والتحضير الذي سيبدأ علي قدم وساق في منزل ام عمرو فكعادة كل يوم جمعة ستتجمع كل الاسرة علي وجبة الغداء لتبدو مديحة في المطبخ منهمكة في التحضير فتقاطعها علا التي دخلت المطبخ : ها يا ماما اطلع الحاجة عند ميار ولا لسه
مديحة : خلاص اهو بصي انا عملت اللحمة عصاج والرقاق اهو ودي الشربة ، طلعي الرقاق الاول وبعدين تعالي خدي الشربة
التفتت لتجمع الاشياء بيدها ثم سألت : محدش لسه نزل يصلي
علا وهي تسحب الاشياء من يدها : لا لسه اعتقد خلاص حينزلوا دلوقتي
لتتجه الي السلالم باتجه شقة ميار ، طرقت الباب ليفتح علي ممازحا : ايه ده رقاق سيدي يا سيدي ، دي ماما متوصية انهارده
ابتسمت ميار وهي تتجه الي الباب : جمعة مباركة يا علا
علا وهي تعطها ما بيدها : امين يا رب ، انا وانتي وريم حنعمل الرقاق هنا ، حانزل اجيب الشربة واطلعلك عايزة حاجة
ميار بابتسامة : لا يا عروستنا ، مستنياكي وحاشوف ريم اقولها
استدرت علا لتنزل بينما اغلقت ميار الباب ليستعد علي و بقية رجال المنزل لصلاة الجمعة
ليطرق باب البيت طرقات كانت علا تعرفها ، اتجهت لتفتح لتجد امامها زوجة عمها سعاد وهي تحمل ابناء ريم جني واروي لتعلو الابتسامة وجهها وهي تنظر الي زوجة عمها : ازيك يا طنط سعاد
سعاد مبتسمة: ازيك انتي يا علا
علا وهي تفسح الطريق لدخولهم : الحمد لله
ثم نزلت علي ركبتها لتحتضن اروي التي تمسكت بها لتحتضنها وقالت مازحة : البيت كان هادي والامن كان مستتب ومسمعناش صوت ماما امبارح خالص شوفتي بقي
لترد اروي وهم باتجاه الصعود : انا كمان مسمعتش حاجة خالص وانا عند تيتة
لتضحك علا : بجد ، طب تعالي بقي وانا حاسمعك
لتقف علا تمازح اروي وهي تدغدها فتضحك ، مزاحها جعل اروي تسحب نظارتها كعادة كل مرة وتجري منها لتختبئ وراء ما لم تكن تتوقع وجوده وظنته ذهب الي المسجد لكنه دخل خلفهم و وقف في صمت يتابع مبتسما ، لترد اروي من خلف خالها كريم : تعالي خوديها انا مليث دعوة
لتلتفت علا مبتسمة حتي تفجأ به فتتسمر في مكانها : كريم ، انت هنا من امتي
كريم مبتسما : لسه داخل ، اصلي كنت عايز اشرب قبل ما اروح اصلي الجمعة ، قلت ادخل اشرب مفيش عندكم مايه
لترد اروي : لا عندنا ، احنا كمان عندنا فيتير
لتضحك علا وهي ترد : اسمه فيتير ، ممكن بقي تجيبي النضارة
اروي مداعبة : هو مش خالو كريم حيتجوزك يبقي يستريلك واحدة تانية ، وانا حالبس تي
كريم لاروي : ادي عمتو النضارة يا اروي
اروي وهي تهز رأسها وكتافها : لا
ثم ارتدتها ونظرت لكريم : مين احلي انا ولا عمتو علا
لتقفز ابتسامة اخري علي وجهة كريم وهو ينظر لاروي ثم الي علا
رغم خروج السؤال ببراءة الاانه كان سؤالا محرجا ، قررت علا ألا تنتظر ان تسمع اي رد وتقدمت باتجه اروي ونظرت بحدة : هاتي النضارة يا اروي
لتختبئ اروي اكثر خلف كريم وهي لازالت علي شقاوتها : لا يا عمتو ، انا عايثها
ليتدخل كريم من اجل الحل ، التفت لاروي وحملها بيده ورد : تيجي معايا صلاة الجمعة
اروي مبتسمة : ماسي اجي
كريم : طب ممكن تدي عمتو علا النضارة بتاعتها
اروي وهي تقترب من علا بنظارتها : اتفضلي
غير معقبة التفتت علا لتصعد السلالم ، ليقطعها صوته مرة اخري : طب انا حافضل عطشان كده
دون ان تلتفت اخرجت صوتها بصعوبة لترد : ثانية واحدة اجبيلك مايه ولو ان اللي عطشان المفروض يطلع يشرب
كريم وهو ينظر لاروي : تصدقي انا غلطان يا اروي كنت خاليت النضارة لما المايه تيجي
رغم ابتسامتها اتجهت الي شقتها دون رد منها لتجلب الماء ، ليصعد كريم باروي فيستوقفه نزول علي وعلاء ليتجمع الثلاثة امام شقة علا ، لتفتح الباب ممسكة بيدها كوب الماء ، سحبه علي مداعبا وهو يقربه الي فمه : هاتيله بقي كوباية مايه تانية اصلي نازل عطشان
علاء : دي من الفيتير
كريم بضيق و هو يريد سحب كوب الماء : يا اخي بقي بلاش رخامة ده الواحد كان راح شرب من المسجد
علاء ساخرا : ايه ده هما المعيدين اللي في الجامعات الخاصة ممكن يشربوا من الشارع عادي زينا مش بتأرف
كريم بعد ما سحب كوب الماء وشربه دفعة واحدة : اووووووووف اعوذ بالله ، ده الواحد كان اشتري ازازة ماية
علي لعلاء : ده اللي بيأرف، الله يكون في عونك يا علا
كريم لعلاء : امسك شيل بنتك ويلا بقي عشان نلحق الصلاة
علاء وهو ينزل : شيل مين يا عم اللي قالها اخدك صلاة الجمعة يشالها
ليحملها علي علي ظهره : سيبك منهم خالص يا رورو ، انتي حبيبة عمو علي صح ، يلا بينا
اروي وهو تنزل مع علي : عمو علي ثالني
لتضحك علا علي تصرفاتهم وصوتهم و تدافعهم ،لتبدأ الحركة في بيت السويفي كعادة كل جمعة لينزل يوسف ويحيي وطارق باتجاه المسجد ، سلمي ويمني و يارا و نور الي منزل جدتهم ، ثم مصطفي تتباعه عبير واخيرا عمرو
—————————-
ليطرق عمرو الباب المفتوح وينظر الي امه : مش عايزة حاجة يا ام عمرو
مديحة : تعيش يا حبيبي ، كله تمام ربنا يخليك لينا يا عمرو
نظرا الي شقة وكانه يبحث عن احد : امال فين علا
مديحة : في اوضتها
ليلتفت عمرو لمن خرجت من الحمام متوضأة : ازيك يا مرات عمي
سعاد : اهلا ازيك يا عمرو ، ازي شيرين والعيال
عمرو : كويسين والحمد لله
اتجه ليدخل غرفة علا ، واتجهت سعاد لتفرش سجادة الصلاة وهي تسأل : شيرين بردوا مش حتنزل الا في الاخر زي كل جمعة
مديحة : يوووووووو عليكي يا سعاد ، انتي اللي تعديه تزيده
سعاد بضيق : والله صعبان ان بعد السنين دي كلها ولسه شايفني مرات ابوها وكأنه كان ذنبي ، نفسي تعتبرني زي امها الله يرحمها
مديحة : ربنا يديكي الصحة يا سعاد ومعلش شيرين طيبة بس هو الموضوع ده معقدها شوية ، معلش يا سعاد انتي كبري دماغك ومتزعليش منها
—————————————
عمرو وهو ينظر في ساعته : ها يا علا قولتي ايه ،شكلي حاصلي الجمعة بكرة
علا بخجل : اللي تشوفه صح يا ابيه اعملوا
عمرو وهو ليفها بذراعه : فاكرة يا لولو لما كنتي صغيرة وبتقولي لماما انا عايزة عمرو هو اللي بابا بدل بابا
لتبتسم علا وترد : فاكرة يا ابيه
عمرو مبتسما : انا بقي عايزك تعرفي انك فعلا بنتي قبل ما تكوني اختي الصغيرة ، اي حاجة محتاجها او اي حاجة ناقصكي بس شوري يا علا وانا كل اللي عايزه اني اطمن عليكي ، خلاص اكلم مع كريم واحدد كل حاجة
علا وهي لا تزال علي خجلها : ماشي يا ابيه
—————————————-