فتح باب الشقة بالمفتاح لينظر الي البيت المقلوب دائما ، زفر وهو يضع حقيبته و ينظر الي ريم التي لا يعرف اين هي فقرر ان ينادي : يا ست ريم
لتخرج ريم من الحمام وهي تحمل جني وتبحث عن منشقة ، ثم تقترب من علبة حفاضتها وتسحب واحدة وهي ترد : انا هنا اهو
علاء بضيق : طب كويس فين الغدا
ريم ولازالت الي جوار جني تبدل لها ملابسها : خلاص الاكل خلص 10 دقايق بس كنت باغير للبنت وبعدين—————
وقبل ان تكمل قاطعها علاء : ييييييييييييييي اوف بقي يا شيخة ، مفيش مرة تغلطي واجي الاقي الغدا جاهز ، دي بقت عيشة تقرف
ريم وهي تجري الي المطبخ : خلاص يا علاء اهو والله معلش والله معلش ، انا بس اللي اخرني اني روحت السوق انهاردة
علاء بعصبية وهو يدخل الي الحمام : وامبارح ايه اللي اخرك واول امبارح ، تصدقي يا شيخة انا ساعات بيبقي هاين عليا مطلعش البيت ده واكل عند امي بس اقول ايه ، اخلصي
ليملئ ريم الضيق وهي تحاول ان نتهي ما لديها ولكن كعادة كل مرة لن يمر اليوم ابدا بدون شجار ، باتت ريم اقصي امنية لديها الا تتشاجر هي وعلاء بات احد احلام حياتها
ليسمع علاء وهو يخرج من الحمام صوت شيئا يكسر فينادي غاضبا: يا ست ريم يا ست ريم هانم
ريم وقد حاولت وبشدة التماسك حتي لا تبكي واتجهت نحوه : ايوة يا علاء حاضر
علاء بعصبية : قولت بدل المرة الف الكوبايات والحاجات اللي ممكن تتكسر او تعور العيال تتشال من قدامهم ، قلت ولا مقولتش
ريم بانكسار : قلت
علاء امرا : اتفضلي بقي يا فالحة لمي اللي اتكسر ، يلا
ريم وهي تتجه الي المطبخ ودموعها كالعادة لن تخذلها ونزلت : حاضر حاضر حاضر
————————————
امام الباب استقبلته مبتسمة
ميار وهي تحمل عنه الحقيبة : حمد لله علي السلامة
علي مبتسما : الله يسلمك ، ايه روايح حلوة اوي
ميار وهي تتجه الي دولابه : انهارده عندنا سمك معمول في الفرن حيعجبك اوي
علي وهو لا يزال علي ابتسامته : انا قصدي ريحة البرفان بتاعك
ميار بدلع : بقي كده ماشي ، انا رايحة احضر الغدا ولا حتتغدي برفان
علي بخبث : هو انا ممكن اتغدي حاجة تانية بس كمان شوية
ميار: طب يلا علي السفرة
———————————————