امام حوض المطبخ وقفت وهي تحاول كتم دموعها ، عادت صورة العلبة مرة اخري امام عينها وشردت فيها و كم هو صعب انه بعد كل ما فعلت يكون الجزاء هو الخيانة
لتقف شيرين صامتة ودامعة وفي نفسها تسأل : ليه ليه يا عمرو بعد كل اللي عملته عشانك بعد كل السنين دي يكون ده جزائي عندك
رغم انه لم يسمعها الا ان عمرو عند هذه اللحظة كانت شاردا ايضا في نظرة عينها الحزينة امام دولابه ، قام من كرسيه وتوجه الي النافذة التي كانت في مكتبه ، انطلق بصره للحظة في كل فتاة في كليته ، في ملابسهن واهتمامهن بمظهرهم ليتذكر شيرين كيف كانت وكيف اصبحت فيأتي منه الرد رغم انه كان يتحدث الي نفسه : كل اللي عملتيه عشاني ده مش ده اللي انا كنت عايزه منك ، لا يا شيرين قبل ما تكلمي عن التضحيات انا كمان ضحيت واظن ابسط حقوقي بعد السنين دي انك تحسي باللي جوايا من غير ما اقوله ، انك تديني الحب وتعوضني السنين اللي جريت من غير ما احس بيها وانا غرقان في الشغل ، مش لازم يا ستي تديني حقوقي حاسسني انك بتحبني طبطبي علي كتفي اخر كل يوم ، خضني في حضنك وقوليلي ربنا يخليك لينا اقل حاجة منك كانت ممكن ترضيني
لترد شيرين في شرودها : طب وولادنا اللي كبروا ، وبقوا طولنا ، بعدين ما انت اللي طول الوقت محسسني اني كبرت وعجزت وبقيت وحشة مبقتش الست اللي تملي عينك دلوقتي ، مش كده