اما علي فكان هناك من يهندم ملابسه ويسحب المشط ليصفف له شعره ، ليزيد ما تفعله من ابتسامته ويرد : انا كده حاقعد ومش حاسافر خالص
ميار وهي تسحب الجاكيت الخاص به وتلبيسه اياه : لا يا حبيبي حتسافر واول ما توصل حتكلمني تطمني عليك ماشي
علي وهو يلفها بذراعه ثم ينظر لها بجدية : ميار ، انا بحبك اوي ومش عارف حاقعد الكام يوم دول من غيرك ازاي ، بجد مش قادر اتخيل اني اصحي وانتي مش جانبي
ميار بحب : ايه يا علوة انت اول مرة تسافر ولا ايه
علي بضيق وهو يتجه الي الباب : لا ابدا بس حتوحشني اوي
ميار بجواره امام الباب : وانت كمان والله حتوحشني اوي ، يلا بقي عشان مش تتأخر
اما علاء فزفر وهو يضع الفطار امام رخامة المطبخ وبدأ يأكل واقفا ، اتت ريم من خلفه تنظر له : احضرلك الاكل احسن علي السفرة
ليرد علاء ساخرا : من امتي يعني ، ادخلي كملي نومك وممكن متعمليش غدا انهاردة انا حارجع بالليل وحاكون متغدي
ريم بضيق : طب يا علاء اعملك شاي
علاء وهو منهمك في طعامه : لا مش عايز حاشرب في الشركة
خرج من المطبخ ليجدها تتبعه التفت لها ثم زفر : روحي نامي روحي
ريم بضيق اكبر : طب حاروح انام مالك مش طايق نفسك ، انا مستنياك تنزل
ليرد علاء ساخرا مرة اخري وهو يفتح الباب : طيب سلام عليكم