معقولة يكون طارق قالها علي موضوع سارة عشان كده راحت للكوافير ، راحت عشان عايزة تهتم بيا من تاني ، معقولة عبير حتفوق لنفسها ، يا ريت يا عبير حاجة تفوقك بدل الغيبوبة اللي انتي فيها ، بس ربنا يستر ، ناوية علي ايه يا عبير حتسكتي ولا حتواجهي ، حتهتمي بيا ولا كالعادة
لم يستطع النوم وشعر بكل ضيق الدنيا يلف صدره ، اراد ان يري شيئا من زيارة ماهر ، لكنه كان ينتظر ان يراه بالغد ، لكنه سرعان ما ظهر اليوم ، ليتجه عمرو الي الشرفة رغم برودة الجو ، ويقف شاردا يشعر باليأس وقد استقرت فكرة واحدة في رأسه تثبت منها اليوم :
دلوقتي اهتمتي بنفسك يا شيرين ، دلوقتي صبغتي شعرك وبرفان وهدوم جديدة ، كل ده عشان ماهر جاي بكرة ، يا تري لسه بتفكري فيه ، ولا الماضي خلص ، عمري ما كنت اتخيل ان عمرو السويفي كوبري ، وطبعا حيعرف بموضوع الطلاق ، طب انا حاسيبك كده زي البيت الوقف ، طلاق مش حاطلق ، بس لو شكي طلع في محله ، حيكون التمن غالي ، عشان مش عمرو السويفي اللي ينضحك عليه