وحضنت فتحي:يا واد يا فتحي فاطمة دي هي اللي هتملى عليك البيت بهجة شقية ومجنونة زيك ربنا يسعدكم يا حبيب قلبي.. والله لأفرشلكم الشقة بأحسن عفش في السيدة كلها ده انت وحيدي ونور عيني.
رواية بنات النجار الفصل الرابع 4 بقلم جنات – للقراءة المباشرة والتحميل pdf
فتحي باس ايديها وراسها:يا ست الكل الفضل ليكي ولدعواتك لولا رضاكي مكنتش وصلت للي أنا فيه ده.. جهزي نفسك بقى عشان ليلة الفرح هترقصي مع الحارة كلها .
الحاجة اعتماد بضحكة صافية:ده أنا هرقص بالصاجات يا واد ده يوم المنى يا ضنايا .
ــــــــ★ـــــــ
البنات روحو ونامو فى البيت بطلب من عاصم وخالد اللى فضلو فى المستشفى مع منصور .
صحيت منار تاني يوم ملامحها كانت زي الصخر لا فيها انكسار ولا أثر لدموع قامت غسلت وشها ولبست هدومها ووقفت قدام المراية تعدل طرحتها بثبات.
زينب دخلت عليها:انتي رايحة فين يا منار؟ رايحة المدرسة يا بنتي في الظروف دي؟ الحارة لسه لسانها شغال والناس مابتصدق تلاقي سيرة تتسلى بيها.. اقعدي النهاردة لحد ما بابا يخرج من المستشفى والأمور تهدى.
منار لفت لزينب وبصت لها بكل قوة : أقعد ليه يا زينب؟ اللي بيقعد في البيت هو اللي عمل عملة وخايف يواجه الناس .. أنا مغلطتش وأنا اللي ليا حق عند الحارة دي كلها. لو نزلت النهاردة مطاطية راسي يبقى كأني بأكد كدبه مجدي لكن أنا هنزل وراسي في السما واللي يلمحني بعينه هأكله بنظرة.