___________
قفلت باب الأوضة عليّا بهدوء، قلبي كان بيدق لدرجة حسّيت صوته هيطلع من صدري، مسكت الموبايل وإيدي بتترعش، بصّيت على الباب كذا مرة قبل ما أطلب الرقم، كنت خايفة حد يسمعني، بس الخوف اللي جوايا كان اتحوّل لحاجة تانية… غضب بارد، هادي، ومصمّم.
ردّ الظابط، صوتُه كان هادي، وأنا حاولت أكون متماسكة:
_ ألو… لو سمحت، أنا عايزة أبلّغ عن شخص مطلوب للشرطة ومستخبي في بيت عيلته.
سألني شوية أسئلة، وأنا كنت برد بهمس:
_ اسمه فتحي، أخو جوزي، عليه قضايا ومطارد، وموجود دلوقتي في البيت وبييجي كل فترة والتانية في أوقات مختلفة.
الظابط سكت ثانيتين، بعدين قاللي بنبرة رسمية:
_ متأكدة من الكلام دا؟
بلعت ريقي وقلت من غير تردد:
_ متأكدة… وأنا مسؤولة عن البلاغ، وكمان كنت عايزه أعمل محضر ليه لأنه تعدى عليا ومش عارفه اخرج من البيت بسببهم
قفلنا، وأنا فضلت واقفة مكاني، حسّيت رجلي مش شايلاني، قعدت على السرير، حطّيت الموبايل مقلوب، وكأني لو بصّيتله تاني هرجع في كلامي، بس لأ… المرة دي مفيش رجوع.
عدّى وقت تقيل، كل دقيقة كانت بتعدّي عليّا كأنها ساعة، أصواتهم بسمعها لأن في مسقط في البيت، كان صوت ضحكهم وكلامهم واصلني، ولا واحد فيهم حاسس إن الأرض بتتسحب من تحت رجله.