عند فياض كان واقف قدام خطاب وسامعه باستغراب وهو بيقول…فهمتني كده يعني المكان هناك مليان هجامه وقطاعين طرق وناس مايعلم بيها الا ربنا وعلشان نخطف بت من هناك محتاج معجزه
فياض بصلو ذهول وقال…نخطف
خطاب اتنهد وقال ..اه حاجه زي كده ….اصل البت اللي انا رايد اجيبها اهلها مش هيهملوها بالساهل لانهم اصحاب غرزه وهيه اللي بتمشيلهم الشغل …هيه يتيمه وعايشه مع جوز عمتها راجل استغفر الله كلب فلوس وعنده بنات كتير بيشغلهم ….بس اوعى تغلط وتجيب اي واحده … البت اللي انا عايزها اسمها اوصاف صبيه تطلع عشرين سنه او اقل تقول للقمر قوم فز اقعد مكانك ولا يقلهاش لاه
فياض مكانش فاهم اي حاجه وقال بدهشه…..انا برضو مفهمتش انت عايزني اعمل ايه…انت عايزني اخطف البت من ناسها…انا فهمت صوح كده
خطاب قرب منه وقال بثقه…انت عارف انا بعتبرك ايه…انا لما قلت لدياب انك دراعي كنت اقصدها بالحرف …. انت هنه دراعي وقوتي وانا خابر ان محدش في البلد كلها يقدر يطلع الجبل ويجيب منه بنيه من وسط اهلها غيرك علشان كده بقولك…انا لو شايفها صعبه عليك مكنتش هورطك اكيد
فياض قال بسرعه …هو مش صعب عليا..بس…بس يعني …كيف اخطف صبيه كده من غير ما افهم ليه…يعني انت عارف البنات شرف وعرض…وانا مقدرش ابقى …لا مؤاخذه قرني واجبلك حريم لجل تتسلى … دي مش اخلاقي يا خطاب بيه وانت عارف زين