فاطمه راحت تركب معاه بس قبل ما تطلع قالتلو بسرعه…معلش اطلب منك طلب…ممكن متقولش لفياض علشان امي بعتاني من وراه….اصل هو بيجيب لنا كل الطلبات ونسينا نقوله عايزين سكر وامي خافت يرجع يعوز شاي يقولها ليه مفيش سكر فبعتتني من وراه وهو مش بيرضى يطلعني لحالي خصوصا بالليل
دياب ضحك جامد على التفاصيل اللي بتحكيهالو وقال…طيب مش هقوله متخافيش …واسمعي كلام اخوكي …قمر زيك متطلعش لحالها لا ليل ولا نهار
فاطمه هزت راسها بالموافقه بكسوف من كلامه واعجاب اكبر وطلعت معاه وهيه مبسوطه جدا انها شافته
عند اوصاف كانو خلصو شغل وقاعده بغضب في الصاله ونعيم جوز عمتها بيعد الفلوس بطمع بصتلو وقالت بحده….تقدر تفهمني ايه اللي عملتو انهارده ده…ازاي تساوم عليا كده مقدراش افهم
نعيم قال بضيق…ولا هتفهمي واصل…لما يكون في يدك تجيبي كل الخير ده وترفضيه يبقى عمرك ما هتفهمي
اوصاف وقفت وقالت بغضب…انت عايز تتاجر بيا يا راجل يا اريل…قولتلك معيزاش امشي في الطريق ده هو عافيه …ربنا ياخدني منكم وارتاح
ولسه هتمشي افتكرت حاجه مهمه ورجعت قالت بغضب…هات فلوس من دي….مش جايبها على شرفي هات منها الف ولا اتنين محتاجاهم
نعيم قال بغضب…ليه مش مكنتيش عيزانا نجيبها ….وبعدين عايزه تاخدي الف او اتنين دفعه واحده .. هتنهبي اياك