فياض ضحك بخفه وقال…لاه اتعاركنا وفضناها …اتاخرت
عقبه ضرب كف على كف وقال….برضو…لا حول ولا قوة الا بالله ..يا ود الحلال انا مش قولتلك اتجنبه…ما انت عارف اللي فيه
فياض كان مخنوق و خرج عن شعوره وقال بغضب…وانا مين يعرف اللي فيا…يشهد ربي دوست على نفسي قد ايه لجل ابقى على عشرتنا وصحوبتنا اللي هو نساها…شوف يا عقبه انا مبقيتش عايز اتحدت في الموضوع ده واصل….ولا تقلي معلش ولا اتحمل علشان خلاااص جبت اخري …قدامه حيطان الكفر كله الحيط اللي يعجبه يخبط راسه فيه
عقبه قال بسرعه…طيب طيب استهدى بالله حصل خير
فياض اتنهد وكمل بحزن بيحاول يخبيه وقال…مفيش خير واصل …عيل كيف الطور لا فاهم ولا بيستنى يفهموه ..كان هيموت الغفير من غير ذنب…وطول يده خلاني مديت يدي عليه
عقبه ابتسم بحزن وقال…وانت زعلان لانه طول يده ….ولا لانك مديت يدك عليه
فياض اخد نفس عميق وقال بتعب..انا زعلان من الدنيا بحالها يا عقبه…مفيش حاجه عجباني من اساسه
وقرب منه وقال بهدوء..المهم.. خطاب بيه باعتني الجبل بكره
عقبه قال باستغراب …الجبل…ليه
فياض اتنهد وقال..ابقى كداب لو قولتلك فهمت ليه …المهم ..ابقى لو اتأخرت شق على امي وفاطمه …انت عارف انهم هيبقو لوحدهم