وضعت سلمى يدها على ذقنها بتفكير وقالت:
-امممم صحيح هو سايبنى أشتغل فى الصحافة ،بس بقوانينه هو…. يعنى ممكن تقولى كده بيخلينى أعمل اللى عايزاه حسب طريقته ودماغه هو ،وأنا عاملة فيها مطيعة وهبلة وسايباه يعمل اللى هو عايزة، أصلى مش هقدر أقنعه يكلم أستاذ خليل يخلينا نمسك قضايا كبيرة ،فياريت تهدى نفسك بقى وإنسي حاجة زى دى ،وإعملى المطلوب منك وخلاص لإنك مش هتقدرى تغيري حاجة.
حدجتها ألاء بنظرات نارية، وجاءت لترد عليها الرد المناسب، قاطعها صوت هاتفها يعلن عن إتصال وارد لها ،وكان المتصل حمزة!
نظرت سلمى لشاشة الهاتف التى تضيئ بإسم حمزة، ثم نظرت لألاء بخبث وقالت:
-إيه مش ناوية تردى على خطيبك!
نظرت لها ألاء بسخرية ،وأمسكت الهاتف وردت عليه قائلة :
-السلام عليكم.
جاءها الرد قائلاً :
-وعليكم السلام، إذيك يا لولو!
ابتسمت ألاء لاسم الدلع الذى يطلقه عليها، وأجابته قائلة :
-الحمد لله أخبارك ايه يا حمزة؟
ابتسم حمزة وأجابها :
-الحمد لله، بقيت كويس لما سمعت صوتك يا زوجتى المستقبلية.
كانت ألاء تلعب بالقلم وترسم خطوط وهمية، وهى تسمع حديثه الذى دغدع مشاعر الأنثي بداخلها، فقالت بابتسامة:
-عايز إيه يا حمزة؟ ايه اللى ورا المقدمة دى؟