وصل اليهم ونظر فى عينى سلمى قائلاً:
-أنا عارف مكانه، اتفضلوا معايا!
نظرت ألاء له بضيق فهو يبتسم كالأبله لسلمى، التى أخفضت نظراتها خجلاً من نظراته، فقالت ألاء بحدة:
-يالا بينا يا حضرة الضابط
ذهبوا معه الى مكتب حمزة، ودق مصطفى على الباب حتى أذن لهم حمزة بالدخول قائلاً
أُدخل!
دخل مصطفى ومعه ألاء بنظراتها القوية النافذة، وسلمى بنظراتها الخجولة.
وقف حمزة وحياهم، وعندما جلسوا أمر لهم حمزة بشئ بارد ليشربونه ،فقالت ألاء ببرود:
-إحنا مش جايين نشرب يا حضرة الضابط، إحنا عايزين الفيلم بتاع الصور!
إبتسم لها حمزة قائلاً:
-الفيلم موجود ،بس ممكن اعرف ليه بتعرضى حياتك للخطر كده؟
ابتسمت له ألاء ببرود وقالت:
ده شغلى زى ما سيادتك بتعرض نفسك للخطر علشان شغلك!
زفر حمزة قائلاً بضيق:
-يا أنسه إحنا رجالة، إنما إنتوا بنات، إنتى مشفتيش صاحبتك كانت بترتعش إمبارح إزاى، دى كانت ميتة من الخوف!
نظرت ألاء لسلمى وقالت بقوة:
لإنها مكنتش عايزة تيجى ؛وجت بس علشان مبقاش لوحدى.
زفر مصطفى بغيظ قائلاً:
طيب مفيش غير قسم الحوادث اللى إنتوا شغالين فيه؟ فين الطبخ والفن اللى فى الجريدة عندكم؟
إغتاظت سلمى من كلام مصطفى ،فتحدثت قائلة:
ليه يعنى مفيش فرق بين الست والراجل، أنا صحيح كنت خايفة لإن المكان كان خطر ،وطبيعى يبقى جوايا شعور الخوف إن لو اتمسكنا هيحصل فينا زى البنات التانية!