_ ما نعملها احتياطى يا دكتور
_ لازم ندى جسمها فرصة علشان يتعافى اللى مرت بيه مش شوية يا استاذ . هاتوا لها الفيتامينات دى واهتموا بأكلها ولو طرأ حاجة كلمونى
دخل الجميع للغرفة بعد مغادرة الطبيب حتى هيثم تخلى عن عناقه وفر إلى صدر أمه ، له كل الحق في هذا.
لكم يتمنى أن يحصل على حق مثله أو فرصة لإخماد احتراق مخاوفه عليها!!
اتجه هو إلى غرفته ليطلب رقم أنس الذى أجاب سريعا ، بداية تساءل عن زيارة عبيد للمطعم ليخبره أنس بما أكد شكوكه حول كذب عبيد لقد زار المطعم بالفعل وسأل أنس نفسه عن جاد وأخبره الأخير أنه لا يعلم سبب تغيبه إذا فقد كان عبيد على معرفة بالحادث قبل زيارته للمطعم .
سأله أيضاً عن الخدمة التى طلبها منه بالأمس ليظهر تلعثم أنس فيحتد جاد
_ أنس اتكلم علطول انا طلبت منك علشان واثق فيك
_ ما أنا مش عارف اقول لحضرتك إيه ؟ حاجة غير معقولة ولا منطقية؟
_ قولى شوفت إيه بأمانتك اللى اعرفها
بدأ أنس يصف الحادث الذى تعرضت له هبة كما رآه من تفريغ كاميرات المراقبة كما طلب منه جاد ، تطابقت رواية أنس مع رؤيته وظنونه
_ ابعت لى الفيديوهات دى يمكن احتاجها فى يوم ومش هوصيك محدش يعرف عنها حاجة.
………….
جلست مرفت برفقة سندس وقد غاب عبدالقادر وهيثم برفقة جاد كالعادة وقد خلدت هبة للراحة تعلم مرفت خبايا زوجة أخيها جيداً لذا لا يخفى عليها أن سندس تحاول التحدث عن أمر ما ويمنعها الحرج
_ مالك يا سندس؟
_ ابدا يا حبيبتي مفيش حاجه
_ هانى كويس؟
_ الحمدلله ، والله قلقانة عليه يا مرفت مااخبيش عليك
_ ليه خير
_ مش عحبانى قعدته بطوله كده