_ هبة انا ماقتلتش أخويا ، ياسر اخويا قبل ما يبقى جوزك واللى يربطنى بيه اكبر كتير من اللى يربطك بيه
رغم حدته وغضبه الذى بدأ يعلن عن تواجده لم تجد داخلها سوى التهكم تشعر به تجاهه ، لم تقترب منه طيلة الحوار وظلت قرب الباب لذا رفعت كفها فقط لتطال مقبضه وهى تتابع تقريعه
_ عن اذنك انا سايبة ابنى مع عمتى اللى لازم تيجى تقعد جمب جنابك
سمع صفعة الباب لتثور أنفاسه غضبا
لما لم يواجهها بالحقيقة؟
أتتهمه بقتل ياسر بعد أن ضحى بقلبه لأجله كل هذه السنوات؟
أترى حقا أنه قاتل بارد الدماء !
هل يمكنها أن تطلع على دواخل نفسه لهذه الدرجة ؟
فلما لم ترى عشقه لها إذا ؟؟
صراع بل غليان أطلق حمم حرمانه وغضبه لتكوى صدره وبدنه بلا شفقة على معاناته أو تقدير لآلامه.
……….
وصلت مرڤت المشفى برفقة أخيها ككل يوم رغم أنها تأخرت قليلا رغما عنها .
دخلت الغرفة لتجد جاد فوق مقعد متحرك وحقيبته أمامه لتتعجب ما ترى
_ إيه ده يا جاد رايح فين ؟
_ هروح يا ماما خلاص انا اتخنقت من المستشفى والأدوية ، انا لا هفتح ولا فى أمل من الجلسات ووقف الحال اللى انا فيه ده، انا هرجع بيتى المفروض انا اللى اراعيكى يا امى مش العكس
تدخل عبدالقادر رغم ما يراه من إصرار فوق ملامح جاد