هى ترى هانى قد شرد عن نفسه ولولا أن شروده يؤذى الجميع ما فكرت في ما طلبته منها سندس حالياً ، ربما خيط من الفرح يعيد جمع شملهم الذى يتفنن هانى نفسه في تمزيقه
رأت الفتاة قادمة باتجاهها لتسير نحوها متعمدة وقلبها يدعو الله أن يحسن ابن أخيها رعاية هذه الزهرة .
_ السلام عليكم ، ازيك يا طنط مرفت
تبسمت مرفت برحابة رغم ما تعانيه لمبادرة حبيبة المحببة
_ الحمدلله يا حبيبة عاملة ايه وماما وبابا عاملين ايه ؟
_ الحمدلله يا طنط انا عارفة أننا مقصرين فى حق حضرتك ، هو استاذ جاد عامل ايه دلوقتي ؟
_ الحمدلله يا حبيبتي انا كنت عاوزه اجى ازوركم والله
زاد تهلل وجه حبيبة لمجرد الفكرة بشكل يسهل ملاحظته
_ تشرفينا يا طنط ده واجب علينا
اقتربت مرفت خطوة وهى تخفض نبرة صوتها بحيث تتخلص من تطفل المارة
_ الصراحة يا حبيبة انا عاوزة اخطبك لهانى ابن اخويا
غابت كل البشاشة التى اشرقت فوق ملامح الفتاة لدرجة انقباض قلب مرفت وهى تشعر أنها تسببت لها في ألم لا تفهمه مع تهرب عينيها وكأنها تحاول اخفاء دمعة تهدد بكشف ما ستره القلب
_ انا آسفة يا طنط مابفكرش فى الجواز دلوقتي وهانى مستبعد تماما من تفكيرى دورى له على عروسة تناسبه وربنا يسعده
_ انا مش هسألك ليه لأن مش من حقى بس هطلب منك تفكرى براحتك