ساره بتفكير :والله اي عريس بيحب واحده بيبقي مستعجل علي الفرح خصوصا ان مفيش ما يمنع للتاجيل يعني و لا انتي لسه بتدرسي و مستنيك تخلصي دراسه و لا هو معهوش فلوس انه يعمل فرح و لا في اي ما يمنع انكم تتجوزوا و بعدين احنا من امته حد في عيلتنا خطب انا الكل بشوفه بيتجوز علطول
اسراء بتفسير : بصي انا بحبه و كل حاجه و انا حبيته جدا خصوصا الفتره اللي فاتت من لما ابتدي يقرب مني اكتر و كدا بس انا عموما شخص دايما بيحس بالتوتر لما اي حاجه بتقرب عارفه اللي هو احساس طول السنه بنلعب في المدرسه او الجامعه و اول ما تقرب الامتحانات تحسي بقاا بروح الدحيحه و ان في حاجات كتيره المفروض كانت تتعمل
يعني انا كان بيعترفلي بحبه زي الفل تمام و عارفه انه عايز يتجوزني و مكنش عندي اعتراض بس دلوقتي حاسه بقلق فكره انك ترتبطي و تشيلي اسم واحد مش سهله من وجهه نظري بعيدا عن الفشل انا بشوف ان الجواز ديه خطوه كبيره لانك بتحكمي علي نفسك بتجربه و بتكون باختيارك فلازم يكون اختيارك صح
يعني ان راجل يتجوز واحده يعني في حاجات كتيره في حياته هتختلف من ناحيه الصحاب من ناحيه حدود الزماله انه يعرف ان خلاص كل حاجه ليها حدود
و إن واحده تتجوز واحد لازم تعرف يعني ايه تشيلي اسم واحد و تصونيه و انك برضو هتغيري حاجات كتيره في حياتك هيبقي ليكي مسؤولية الموضوع مش سهل و مش لعب عيال و مش مجرد حب و بس