رواية الوجه الآخر للرحمة الفصل الخامس 5 بقلم عبير ادريس – للقراءة المباشرة والتحميل pdf

اهالي القرية ألتموا ، رياجيل تركض وجهال خايفة من النار ..

كاموا يطفوها بسطلات ماي بس شيفيد اكلت بيت اخواني والحلال وجزء من البستان ، الزرع والحلال يرجع فد العوائل شلون شيرجعها؟

بين اللهيب والدخان مرت لحظة سكوت غريبة منها ميزت صوت نوح وهو يهمس

نوح : يمة جهالي ؟ وينهم طلعتوهم

امي هزت راسها بلا وكامت تشيل التراب وتحطه على راسها ..

صرخ بأعلى صوته وركض يدور جهاله وزوجته ، مجنون يتخبط ما يعرف شنو يسوي ومن وين يبدي ،انتهى كلشي ..

اجه صوت كميل مكسور وهو يصبر بنوح ..

كميل : قدر الله وماشاء فعل ، الرضا والصبر يخوي الرضا والصبر ..

ورا ما حجى هيج ، وكع على ركباته توسد الكاع ، ضايع منطفي مهزوم فد ما نزلت منه دمعه وحدة

نخاف نتقرب نواسيه كميل ما يقبل يتواسى بمصيبته …

بعد ما الخراب ترس المكان والناس طشت كلمن لبيتها ، ألتمينا مهزومين مفزوعين تايهين حايرين ، حيرة الدنيا توسدت صدورنا ..

صافنين ونحجي ما نعرف منو الحرك بيوتنا تاهت علينا ، اعدائنا كثروا

الشك ترس عقلنا..

بيت عمي ابراهيم ؟

الناس اللي هدوا علينا ؟

لو منو؟

لهناك وسمعنا صوت زيون ورضوة من بعيد ألتفتنا عليهم ركضنا اخذناهم لحضنا ، نفتش بجسمهم وين الحرك ؟ ما مصدكين عايشين ، لهناك واجتي نبأ وراها سمر … فز كميل من مكانه حضنهم بقوة ويبجي جسمه كله يختض ..