رواية الوجه الآخر للرحمة الفصل الخامس 5 بقلم عبير ادريس – للقراءة المباشرة والتحميل pdf
شهم : سمر سمر ، مناسك وينكم ؟
طلعت مناسك وكالتله سمر مريضة ماتكدر تجي وانه باقية يمها .
شهم: شبيها مريضة البارحة شفتها مابيها شي
مناسك : اي وتمرضت اليوم محد يضل على حاله كلها تتغير
شهم : شنو قصدج ؟
مناسك : افتهم التفتهمه
شهم : حاسج تلمحين لشي ، اعرفج سولفي
مناسك : وعليش ألمح خايفة منك ؟ احاجيك كبل
شهم : وينها سمر اريد احاجيها
مناسك : كلت نايمة
شهم : وخري جذابة هسه عمي كال ماتقبل تجي للعرس
دفعها ووكف بباب الغرفة صاح
شهم : سمر اريد افوت لبسي حجابج
مسحت وجهي عاينت لروحي بالمرايا شنو يشوف منج ؟ لا حافة حاجب لا مرتبة شعرج عيونج مطككة من البجي ، رجع صاح افوت
لفيت شالي وهمست
نطيته ظهري ما عندي قوة اشوفه بهدوم العرس
شهم : شو ما مبدلة ؟
سمر : كالتلك مناسك تعبانة يعني ليش حتى ما اجي ، مو حمل سفر لبغداد
شهم : من شنو تعبانة غير افتهم ؟
سمر : هيج من الدنيا الغبرة
شهم : اكو شي مضوجج ؟ ليش ما كمتي تحجيلي شنو يصير وياج وتكتمين بداخلج ؟
سمر : كبرنا ياشهم وعرفنا العيب من الحرام ، وفصلونا كلمن ابيت انت رجعت لبيتكم وانه رجعت لبيتنا …
انه وشهم اول ما انولدنا اخذونا عمي قادر وزوجته وربونا ، لأن ما يخلفون ، لهذا تعلقي بيه جان يختلف عن الباقين ، حتى من رجعت ﻷهلي ماحسيت بيهم ، اضل يوم يومين وارجع لبيت عمي قادر اللي هو ابوي لان الأب اللي يربي مو اللي يخلف …