رواية الهجرس الفصل السابع عشر 17 بقلم رواء هادي – للقراءة المباشرة والتحميل pdf
هجرس_مستعد ماحجي وياج وماخذ سلسبيل ودمر حياتها انا اعرف نفسي شنو ومنو ماراح اكدر
انطي السعادة لسلسبيل
خليت وطلعت مقهور من جديتي بقى ابو محمد يمها يبجي ويتوسل بيها عدل لغرفتي صعدت بس سديت الباب نزلوا دموعي ليش هيج يصير
وياي الكل تريد تمشيني بكيفها هسه كوه أخذ سلسبيل انا مالي نفس بيها صح اتغزل بيها مرات واحب اشوفها كدامي بس حالها من حال مناوي ورحاب
وبنات عمي لاحبهم شلون جديتي تريدني اتزوجها وهي تعرفني كلش زين بعدني متاثر بحنين والليل ماجاي انامة من وراها مامستعد ادمر حياة
انسانه بريئة علمود ارضي جديتي .
مسحت دموعي …بسرعة ودخلت للحمام غسلت اباوع لشكلي متغير هواي وملامح وجي كبرانه أكثر من قبل وشعر رأسي صاير بي كم شيبه وانا بعدني
صغير بأول عمري وشعر رأسي شاب من القهر سمعت الباب اندك صحت من باب الحمام ”
جدي _انا تعال اطلع عندي موضوع وياك
جريت المنشفه نشفت وجي وطلعت شفته واكف بنص الغرفة ويباوعلي ”
هجرس_هاا جدي شعندك ؟
جدي_ جديتك متعاركه ويه ابن أخوها علمود منطي بته لابن اخوي …انت تريد سلسبيل؟
جدي_ ليش ماتريدها ؟
هجرس_مالي نفس بيها خلوا البنية تمشي بحال سبيلها
جدي_هذا آخر سؤال اسأله الك أخاف باجر عكبة تكلي اريد سلسبيل وصرت احبها ومن هذا الحجي تره اكسر راسك فمن هسه اكلك تريدها لو لا …