وليد……
كان سامعها ، اه لو ماما سمعتك تموتك دلوقتى
جنى……
اخس عليك ياوليد خضتنى وبعدين انت رايح فين كده
وليد…..
نتفق ، انا مش هجيب سيرة لماما وانتى مش تقولى لها انى هاروح البلاى ستيشن ماشى وعد ، بس ارجع الاقى الكيكه
جنى …..
ماشى ، وخرج وليد ودخلت جنى المطبخ وبدأت تجهز الكيك ودخلته الفرن ، وبقت توضب المطبخ وطلعت على رسبشن الجناح الخاص بسناء وغيرت نظامه كله وولعت بخور ودخلت المطبخ تطلع الكيك سمعت صوت من بره
حضرى لى الحمام وجهزى هدوم بسرعه هدومى اتبهدلت فى المصنع انا داخل الحمام ، وحلوة التغيرات دى ، انا سيابك الصبح تعبانه ، بسرعه عندى قعدة ……..
كانت جنى بترص حاجات فى درفه المطبخ من تحت ومش باينه منه ، وقفت متردده تظهر ولا لاء ، طلعت الكيك من الفرن وسمعت الصوت ، ايه فين الهدوم
هزت راسها ودخلت اوضه النوم وطلعت له جلابيه وحطتها على السرير ، وجريت جابت جزمه نضيفه وحطتها جنب السرير وقزازة برفان هى بتحبها ، وخرجت من الاوضه جرى
حسين…….
طلع من الحمام لاقى الهدوم والجزمه جنب السرير والبرفان ، هز كتفه هى من امتى بدخل الجزمه هنا ، وكمان البرفان ، اومال الصبح كانت قالبه نكد ليه ، وزعلانه علشان رايح اعمل قعدة لابوها وأخواتها، اخ من النسوان دول ، ولبس هدومه وخرج الصالون بص لاقى طبق كيك وفنجان قهوة ، استغرب أكتر، انتى اخيرا عملتى الكيك اللى وليد طلبه ده هيفرح اومال هو فين ، سناء انا بكلمك ، هو انتى ساكته ليه ، مافيش صوت سناء ، سناااااااء وراح دخل المطبخ ، لاقى اللى واقفه وشها محمر ومكسوفه وحاطه راسها فى الأرض