ياس : ماتفهميني ياهو جاينه اليوم ؟
امي : خايبة بيت عمج جبر جايين من بغداد لينه … ارتاحيتي؟
ياس : ياااا .. جا عليمن هالخبصه شني اول مره يجي عمي ..
امي : لاع مو اول مره … بس هالمره وياه مرته وابنه …
ياس : ياا جا ما طول هيج خل اروح اسبح والبس ثوبي الجديد بس كون سلامة خيطته ..
اريد اكشخ بي جدام اهل بغداد ..
المفروض هسه همه راح يوصلون لان ابوي كال طالعين من غبشة …
اخذت الثوب من سلامة ورحت سبحت وره ماسبحت فروخ اخوي مضر لان فهيمه امهم جانت تعجن ..
امي ماتقبل نكص شعرنه بس المتزوجات يكصن شعرهن عدنه والمامتزوجات عيب امي تكول …
ظفيرتي جان طويلة وبيها لون ولونها راهم ويه عيوني ..
عيوني لاهنه زرك لاهنه خضر …
شفايتلي لو هيج لونهن .. بس عيوني جان بيهن عيب ..
كل عين لون .. يعني عين خضره وعين شهله …
وانه زغيرة جانوا الجهال بالمنطقة يضحون علي ويكولون عيونج تك وتك .. لو يصيحون علي حوله .. بس انه مو حوله ..
شكد جنت احب المدرسة بس ضجت منها بسببهم وبس كلولي بطلي بطلت رغم جنت اتمنى اتعلم وتصير عدي شهادة مثل بنات عمي جبر يكولون كلهن عدهن شهادات ..