رواية القلب بالقلب الفصل السادس 6 بقلم روز الفياض – للقراءة المباشرة والتحميل pdf

ج٦

بقت اسبوعين وانه كل شي ماجهزت رغم عمي انطاني مهري بس ماردت اشتري منا شي كلت اروح لبغداد واشتري اليعجبني ..

مرت عمي اتفقت وياي من اروح لبغداد نطلع انه وياها نختار بدلة العرس وتاخذني للصالون يشوفون شعري شمحتاج من تغيير ..

خلال هالايام جنت يومية بالليل اطلع الذهب الجابولياه احطه عالجرباية واحط يمه الحلقة واباوعلهن ..

شكد عدي ذهب ابوي مامقصر بس حسيت هذا اله طعم مختلف ..

التليفون الطتنياه مرت عمي جان بي شريحة ومسجل بي رقم كرم وعمي ومرت عمي ولنى ..

ماجان بيني وبين كرم تواصل بالتليفون بس مرات من تتصل مرت عمي ويكون موجود يسلم علي ..

المفروض خلال هالفترة هو جاب اخشاب وضبط الطابق الفوك لان المفروض غرفتي تكون فوك ..

قبل لااروح لبغداد ب( ٣ ) ايام امي سوتلي حنة والتمن الحبايب كلهن ودك وركص لليل ..

بس وراها شبعت بجي .. عبالك رايحة لاخر الدنيا وعبالك ماراح اشوف امي واهلي بعد ..

الساعة ب( ٣ ) بالليل ابوي كال نطلع ..

صارت الساعة ب(١٢) وانه افتر بالبيت ماخليت شي مارحت شفته يمكن صدك راح اشتاق لهذا السجن …

رحت كعدت بالحوش الوراني يم دجاجاتي وظلت دموعي تصب ..

سمعت صوت اخوي مصعب يدور علي كمت على حيلي بسرعة اريد ادخل للبيت اشوفه بس مالحكت اكوم رجعت انجبحت على وجهي .. عثرت بالظلمة تعورت ركبتي بس كمت ودخلت للبيت وصار مصعب بوجهي كال:

هاا ياسه ؟ انتي هنا وانه ادور عليج ..

ارد اسلم عليج .. تعاي ..

فتحلي ايدية يريد يحضني وانه عبالك يكلي ابجي …

حضنته وبجيت .. بجيت ..لحدما بجوا كلهم ..

امي وسلامة وفهيمة جانوا واكفين وراه كالوا:

ياا ايدج ايدج تصب دم ..

وخرت ايدي شفتها تصب دم ماحسيت بيها من اتعورت لزمها مصعب وصاح عالبنات جابنلي شاش وديتول ..

غسلتها وعقملياها ولفها بالشاش ورجع حضني ..

وانوب اجه مضر وحضنه اثنينه وتلاثتنه ظلينه نبجي ..

مصعب : اريدج ترفعين راسنه … تديرين بالج على رجلج وعمج وعمتج ..

هزيت راسي اي ..

دنك باس راسي كلي:

يابعد اخوج ..

.

.

.

.

بقيت كاعدة ماغمضت عيني وهمه هم ماناموا بقت كلها وياي كاعدة متانين السيارة تجينه ب ( ٣ ) ..

الولد اتفقوا ويه واحد من كرابتنه عده بهبهاني حتى تكفينه انه وامي وابوي وعمي ابو امير وعمتي رسمية ..

مااشتريت اشياء هواي لجهازي بس سلامة وفهيمة بنات عمي واختي جورية ماخلن شي ماجابنه ..

ب( ٢) ونص اجت السيارة صعدوا الغراض وسلمت عليهم واحد واحد حتى الجهال رحت بستهم وهمه نايمين بس من طلعت ماشفت اخوي مضر ..

دورت عليه بالبيت مالكيته ..

طلعت وانه ضايج خلكي مايهون علي اروح واسلم عليه …

ياس: يالله سلمولي على مضر ..

درت وجهي وصعدت بالسيارة وسديت الباب وانه عيوني تتلاكط على الفرع اتمنيت اشوف حتى الجيران واسلم عليهم كبل لا اروح …

طاحت دموعي …

شوية وماحسيت الا الباب اليمي انفتح حيل كمزت ..

باوعت اخوي مضر …

شهكت من شفته :

خويه ..

حضني وظل يبجي بصوت عالي ..كالي:

ولج ياهي اليونسنه بعد …

بقيت ابجي وهو يحب براسي ويكلي:

انتي عزيزتي … بتي مو بس اختي .. انه المربيج …

بعدين حب ايدي كلي:

يالله يابعد اخوج روحي .. اتوكلي … الله يسهلج ..

سد الباب وحركت بينه السيارة ..

وانه عيوني اتلاكط عليهم ظليت ملتفته واعاينلهم لحدما طلعت السيارة من الفرع …

همزين ليل والدرب اظلم .. صدك وحشه .. بس احسن محد يشوف دموعي …

ولو هي اول مامشت السيارة ماظليت اسمع بس الشخير …

.

.

الصبح وصلنه لبيت عمي جبر جانوا كاعدين مستعدين لجيتنه ..

كبل حطوا الريوك ..

اتريكنه وخلصنه وبدت مرت عمي وخدامتها يشيلن الاكل وكمت وياهن اساعدهن ..

من دخلت للمطبخ كضتني ..

ام كرم : هلا بعروستنه … عيونج حمر .. باجيه؟

بس كلتلي باجيه بجيت ..

حطت ايدها جتفي كالت:

لا ازعل عليج .. على شنو تبجين قابل احنه اغراب وتحسين بالوحشه عدنه .. احنه اهلج ماما وهذا بيت زوجج يعني بيتج وبيت ابوج .. واني هنا بمكان امج شتحتاجين كوليلي لتستحين مني ولناوي اختج وهسه تجي بقية العائلة وتتعرفين عليهم ..

المثلج هسه فرحانه … صارله اسبوع ماضاك طعم النوم شلونه قابل علمود منو؟ علمودي؟ غير علمودج اشتاقلج واشتاق لسوالفج الحلوة ..

حسيت بفرحة من سمعت كرم يمكن مشتاقلي ومتلهف على جيتي ..

بس اتذكرت :

جا اليشتاق شبي مايخسرله خمستالاف رصيد ويخابر يسأل يكول ياناس ياعالم شلونكم شخباركم ؟

ضحكت مرت عمي حيل وكالت:

روحي كعديه من النوم وعاتبيه ..

فكيت عيوني متعجبه :

اكعدمن ؟

ام كرم : كعدي زوجج خليه يصبح بهالوجه الصبوح هالوجه الحلو والعيون الملونه ..

ظليت اباوعلها وابلع بريكي .. بطرانه هاي المره مدري اكو احد مسلطها علي حتى تخليهم يعدموني ..

ام كرم : روحي كعدي شمنتظره ؟

ياس: يححح غير ابوي يحط براسي جيله .. ادخل عليه اكعده .. لا لو اموت ..

ضحكت بصوت عالي كالت:

شبيج جبانه .. اذا بالحالتين ميته هههه .. كيفج ..كيفج ..

ياس: غير استحي ..

ام كرم : زين صعدي شوفي غرفتج اخشابج شوفي شنو جبتلج يجوز اكو شي ناقصج او معاجبج حتى اليوم اخذج وياي ونجيب كل النواقص ويجوز يعجبج شي ..

ابتسمت عجبتني الفكرة كتلها:

وينها الغرفة ؟

ام كرم : فوك اول ماتصعدين الدرج اول باب هاي غرفتج ..

رحت اركض عالدرج صعدت للغرفة فتحت الباب ..

حلوة الاخشاب وكل شي مرتب ..

فتحت الكنتور صدك المره مامخليه شي ملابس النوم ملابس البيت جراجف مناشف كل شي موجود ..

شوية وصعدت وراي كالت:

ياسه جربي ملابس الطلعة خاف يطلع القياس مو مضبوط ..

بدت تطلعلي وانه اقيس ..

اخر شي طلعتلي صفطت بنطرونات ..

وكفت كتلها:

انه ماالبس بنطرون ..

ام كرم : ليش؟ تره كلها البنات تلبس .. زوجج مو من هالنوع اللي يدقق بكل شي .. بعدين اني اعرفج متلبسين وملتزمة بحجابج لذلك جبتلج وياه قمصان طويلة …

طلعت القمصان كالت :

لتخافين مختارتلج ملابس محجبات .. بس كم قطعة تستقبلين بيها الناس اللي يجون يباركولج ..

طلعتلي تنوره قصيرة للركبة سودة وبيها طوبات ملونه كل طوبه من لون ووياها سترة لونها اخضر ليموني ..

لبستهن ووكفت كبال المراية متعجبه على روحي ومرت عمي حلت شعري وظلت تباوعلي ..

ياس :شلون اطلع للناس بهاي التنورة يححح استحي …

ام كرم : تاكل وتشرب عليج ..

درت عليها كتلها:

بس استحي .. مامتعودة البس كصير ..

قبل لاتجاوبني انفتح الباب التفتنه .. كرم ..

توه كاعد من النوم ماباوع بس شاف امه بالغرفة رجع بسرعة وسمعته كال:

آسف ..

وطلع …

كلبي ظل يدك همزين ماشافني بهاللبس يافشلة الفشلة ..

بعدني اجر نفس مااشوف الا مرت عمي فتحت الباب وراه وصاحت عليه :

كرم ..تعال ..تعال ..

يبست بمكاني وين البد خاف يشوفني وكفت وره الباب ..

اجه بس مادخل للغرفة ..

ام كرم : الله عليك شوف مو حلو عليها ؟ مو يجنن؟

دارت كالت :

وينج؟

شافتني وره الباب اشرتلها باصبعي :

اشششش ..

بس مالحكت لان دخل كرم للغرفة مايدري شكو وشصاير ..

دخل مستغرب وباوع علي وره الباب ..

رغم بروده وسكوته ورغم ماجان عنده اي رد فعل بس ماادري ليش حسيته يباوعلي لاول مره نظرة رجل لامراة ..

والدليل بقى واكف ماطلع من الغرفة رغم هو مانطق بكلمة بس بقى واكف يباوعلي …

استحيت متت …

ام كرم : عاشت ايدي مو؟عالعروس وعالملابس هههه ..

هز راسه اي ..

ام كرم : هاي عليمن عالعروس لو عالطقم ؟

تقصد هزت راسه ..

ماحجه شي بس ابتسم شوية ..

شو هاي طلعت وعافتنه وحدنه بالغرفة ..

بس طلعت انه رجعت فتحت الباب واشرتله يطلع بره ..

رفع حاجبه يمكن انصدم ويمكن ماعجبه ..

مشى خطوتين باتجاه الباب بعدين دار علي كلي:

والعباية؟

عكدت حواجبي وكتله:

شبيها؟ تره هذا البسه بالبيت من يجون كرايبكم يتباركون مااطلع بي بره … والعباة ماانزعها بالطلعة ولااتنازل عنها واذا ماعاجبتك بعدنه تره تونه نكول ياهادي ذولاك عمامك وابوك وانزل كللهم بطلت مااريد العرس …واذا صعبة عليك انه اكللهم بمكانك هسه بس ابدل ..

صرت عصبية غثتني حجايته … بس هو بقى واكف يباوعلي وعاكد حواجبه ..

وخري ايدي من الباب وطبكه حيل ..

كمزت كتله :

شوية شوية على كيفك ..

اتدنه علي خطوه خفت كلت راح يكفخني …

كرم : شماكله من الصبح متفهميني ؟ باجة؟

اتفاجأت برده بس كتله :

لا والله خاف ماعاجبتك ..خاف ماعاجبك لبسي؟ كول من هسه ليش تتورط وتورطني وياك ..

ظل يتلفت بالغرفة بعدين كال:

وينها العباية؟

ياس: جوه ..

كرم : اممم .. اوك اني نازل قبلج اكوللهم وانتي غيري ملابسج وتعالي وراي بسرعة ..

نزل وانه ركضت ابدل هدومي حتى انزل وراه ..

بدلت ركض ونزلت اكمز عالدرج كل بايتين احسبها بايه واطفرهن حتى اللحك عالهوسه والعركة الراح تصير جوه من يكللهم مااريدها ..

وجووب .. اتكربحت من الدرج على وجهي ..

رفعت راس محد شافني يمكن الحمدلله كعدت عدل شفت رجلي البارحة طحت عليها واليوم هم ..

ظلت توجعني وايدي هم كلللش وجعتني ..

كمت وانه اعرج شوية وادردم بصوت ناصي :

الله يكطع ابليسك … كربحتني وكسرتني من امس لليوم كلساع اطيح … آآآخ رجلي … اووي ايدي موتتني ..

كرم : شبيها ايدج ؟

كمزني كتله:

اسم الله منين طلعت ..

كرم :شبيج ؟ وين اتعورتي؟

سحبلي كرسي واشرلي اكعد .. كعدت ..

استحيت اكله البارحة طحت واتكربحت واليوم هم زحمه شيكول شبيه قابل مااشوف ..

ياس: مابيه … ماتعورت ..

ابتسم نص ابتسامه وكال بنبرة واحد حاصرته الضحكة :

لعد شبيج مكسرة هيج وكلج اصابات؟ خاف وكعتي من الدرج ؟

من كال هيج انه عرفته شايفني من طحت ..

انقهرت كتله بعصبيه:

يعني شفتني طحت واتكربحت واتكومت بالكاع واتزلغت رجلية وما اجيت كومتني لا كتلي اسم الله ولا وجعه من الله ؟

ضحك حيل ظل يكركر وانه اباوعله لحدما سكت سحب كرسي وكعد يمي كال:

شبيها ايدج؟ وصدك رجليج اتزلغت ..

كال هالكلمتين ورجع يضحك ..

ضجت هذا شبي يضحك كمت ردت اطلع من المطبخ اروح يم اهلي اتانيه حتى يجي يكللهم مااريدها ..

دخلت مرت عمي كالت :

هاا انتو هنا ؟

كرم : اجيتي بوكتج ..

ام كرم : هاا خير ؟ شبيكم؟

كرم : اكو حجي مااكدر اكوله كدام ابوي وعمامي .. كلت اكولج انتي وانتي بطريقتج تحجينه ..خاف يزعلون مني لو حجيته …

كلبي ظل يدك … هذا حظي انخطب جم يوم وكبل العرس يكول مااريدها ..

امده حظي

.

.

ام كرم: كول حبيبي ؟

كرم : عاشت ايدج ..

هي ابتسمت وانه استغربت لحدما التفت علي كال:

عالاثنين عالعروس وعالطقم …

بلعت ريكي وغلست كال:

ياسه كعدي شوية خل اشوف ايدج … رجعت كعدت فتح الشاش وشاف الجرح كال:

بشرفج اكو عروس تجي هيجي عبالك جانت بعركة ايدها مجروحه شلون جرح ورجليها مزلغه … وانوب هسه وكعت من الدرج وظلت تمشي وتعرج … وين جرحتي ايدج هيجي ويامن اتعاركتي ..

ياس: مااتعاركت شنو شايفني دشر الشراني امشي واتعارك .. بس البارحة طحت بالحوش الوراني بالليل واتعورت ماادري بشنو ..

كرم : اممم ..

ياس: وهسه طحت لان نزلت اركض حتى اشوف العركة ..

ام كرم : ياعركة؟

ياس: العركة الراح تصير بين ابوي وعمامي وبينه ..

واشرت براسي على كرم ..

امه كالت:

ماتفهموني شكو؟

كرم: ماكو شي يووم بس ياسه خافت خاف اروح احجي الحجي الحجيته الج قبل شوية كدام ابوي وعمي وتعرفين عمي ماعنده تفاهم ..

حجه هالحجي وابتسم وطلع من المطبخ ..

بقيت ساكته هذا جان يلعب علي ويضحك علي بس لايطلع مخبل واتورط بي ..

ام كرم : اييي؟ بالله خل اشوف ايدج؟

ياس: شديتها ..

ام كرم : ورجليج؟ لو بس لكرم ههههه ..

مافهمت شكالت .. ابتسمت مثل الثولة وطلعت من المطبخ انوب افتهمت ورجعت اركض اريد اكللها تره والله ماشاف رجليه هذا جذاب ..

بس مالكيتها …

.

.

.

.

.

خلال هال ( ٣ ) ايام كرم بعد ماشفته خلصتها خواره من السوك للصالون للخياطة للمدري وين المهم ماكعدت بالبيت كلها مشاوير ..

بس اتعرفت على ابن عمي الثاني رضا ازغر من كرم اجوا هو ومرته حنان وبته .. واجت هم بت عمي اختهم اسمها ريم …

كلهم جانوا طيبين ..

جان الاتفاق ماكو عرس وحفلة كرم مايرضى بس زفة للفندق وجنت اتمنى يسوولي عرس وافرح مثل البنات ..

بس مرت عمي بليلة العرس هم كلتلي اسويلج حفلة بسيطة بس الاهل حنه يعني وريم ومرت رضا كل وحده جابتلي نفنوف ..

صدك فرحت … بس اهلي مكانهم فارغ لاجورية اختي لافهيمة لاسلامة ..

بس امي وعمتي رسمية وعمتي رسمية ( ٢٤ ) ساعة نايمة كل فايدة مابيها لاصفكه لاهلهوله المن اجت ويانه ..

ماجان اكو احد غريب بس الاهل ويمكن اثنين نسوان من جيرانهم ..

ام كرم : ابوج ياسه يريد يجي يسلم عليج ..

كمت وكفت استغربت ..

طلعتله يم باب الديوانية باسني وكالي:

ياستي … بوية هذا مال صباحيتج ..

خله بيدي شدة فلوس ..

ياس: شني هذا بويه ..

حب راسي وحضني وكلي:

اريدج ترفعين راسي اعرفج انه مايحتاج اوصيج جويمليه انتي معدلة .. انه راح اروح هسه وامج وعمتج يمج يظلن … بعد ابوج صيري نبهه شتريد عمتج كون ماتقصرين ورجلج هسه انتي مسؤوله منه ماتسوين شي بدون علمة ورغبته .. وشتحتاجين خابريني لو لخوانج اذا تستحين من رجلج .. زين بويه ..

هزيت راسي اي …

سلم علي وراح وبقيت واكفه اباوع وراه والدمعة بعيني ..

بليلتها ماغمضت عيني صدك استاحشت ..

لو جورية اختي وياي عالاقل .. بس مااجت تكول الجهال يشلعون كلبها وزغار ماتكدر تخليهم يم ابوهم …

بليلتها نمت بالنص بين امي وبين عمتي رسمية …

آخر ليلة الي بحضن امي ..

ولو عمتي رسمية خربت الاول والتالي بشخيرها ..

كلها نامت بس انه كاعدة بفراشي اتكلب واسمع جوانا تحوس بالبيت يمكن بعدها تنظف خطية ..

شفت تليفوني بي ضوه باوعتله اكو مسج فتحته …

جورية اختي ..

موديتلي دعاء وكاتبتلي ظلي ردديه منا لباجر وره العرس …

فكرت اودي مسج لكرم .. بس كلت فشله خاف نايم ..

باوعت شفته متصل بس كلت مادام ماحاجاني انه هم مااحاجيه …

ادردم بكلبي ماانتبهت الا وره شوية ..

كعدت على حيلي شفته كاتبلي :

هلووو

ظليت ساكته ماجاوبته انوب اتذكرت حتى لو ماجاوبته مبين عده انه متصله …

امداج

رديت عليه :

هلو

كرم : شعندج كاعده لهسه؟

ياس: ماعندي

كرم : لعد ليش مانايمة؟

ياس: مااكدر انام عمتي رسمية مشغلة صفارة انذار ..

كرم : صفارتيش؟

ياس: تشخر

كرم : هههههههههههههههههه

ياس: وانت؟ ليش مانايم؟

كرم : مااكدر انام ..

ياس: ليش؟ هم اكو يمك صفارة انذار؟

كرم : ههههههه لا ماكو …… بس ضايج شوية

ياس: ليش؟ شمضوجك؟

كرم : ماكو شي ….. سلامتج

قهرتني حجايته .. المفروض يكون فرحان ومتونس باجر عريس يكلي ضايج وانوب مايطي نشد ( سبب ) كله سلامتج ويخليني اظل احوس …

رجعت كتبتله :

عودك ليش تحجي هيج؟

كرم : شحاجي؟

ياس: تطيني راس الخيط وتخليني افر باذاناتي مااعرف التالي ..

كرم :

ياس: عودك شني هاي معناها ضايج ومن اسألك تكول سلامتج يعني سلامتي مضوجتك لو شني الوجبه؟

كرم :

ياس: كل هذا ضحك ؟ هنيال كلبك …

كرم : ياسه ..

ياس: هاا؟

كرم : لتكولين هاا كولي نعم ..

ياس: نعم

كرم : …… خايف منج …….

ياس: ليش شايفني آكل اوادم ..

كرم : هههههههه خرب ابليسج منين تجيبين هالحجي هههههه ….

سكت شوية بعدين كتبلي لاخايف احبج ….

صدمني حجيه …

وحسيت الدنيا ظلمت بعيني …

ليش يخاف يحبني ؟…

شبيه انه يخوف؟

شبيه ماينحب؟

مااتجرأت اسأله ليش ولا كدرت احجي وياه بعد غلقت التليفون وظليت صافنة بالظلمة منا لوجه الصبح غفيت .