رواية القلب بالقلب الفصل الحادي عشر 11 بقلم روز الفياض – للقراءة المباشرة والتحميل pdf

بدلت وجهزت ونزلت جوه حتى نطلع نتعشه بمناسبة نجاحي ..

لكيت كرم كاعد جوه من شافني ابتسم كال:

هاا … مبروك النجاح ..

ياس: شكرا ..

كرم : عفية عليج والله شاطرة درجاتج كلها عالية يكولون ..

ياس: اي الحمدلله ..

كرم : معناها تطلبينه هدية النجاح ..

ياس: مايحتاج تعبكم وياي كافي ..

كرم: لا ميصير لازم هدية ..

درت وجهي وكتله:

هديتك واصله …

من زمان ..

.

.

طلعنه واتمشينه واتعشينه واتونسنه …

بس جانت اكو غصه بكلبي …

كلت ميخالف .. هذا يومي ولازم اعيشه وافرح بي ..

هذا تعبي وهذا نجاحي ..

خليه بعيد مااريد شي يغير مزاجي ويضيع فرحتي …

جان يحاول كدام اهله يبين ماكو اي خلاف ولا اكو اي مشكلة ..

وين مااكعد يكعد … ويفتح وياي مواضيع اشكال والوان حتى احجي وياه ..

ماجان عدي استعداد اتجاوب وياه بعد اللي كاله ..

بس بنفس الوقت ماجنت اريد اخرب فرحة الكل بيه ..

طول الوقت لازم ايدي وكل شوية يخلي ايده على جتفي ويبوس راسي ..

ريم : يمعودين على كيفكم شوية رحمونه من حبكم ورومانسيتكم شوية مو احنه هم بشر هههه ..

كرم : والله احنه احرار ..

عمتي: عوفيهم براحتهم خليهم يعيشون عمرهم يلحكون عالعيب والمايجوز باجر من يكبرون ..

كرم : اندري خلينه شوية نتنفس ..مو لو مو مو؟ شتكولين ياسه ؟

ياس: بكيفك ..

عمي: ياسه شوكت تردين ترحين لاهلج عمو؟

ياس: شوكت ماصار عندك مجال انه ماعدي شي هسه لادراسة ولاشي ..

عمي: واني هم ماعندي شي جهزي نفسج وشوفي خاف تردين

تطلعين للسوك او شي حتى فد يومين او تلاثه نروح ان شاءالله ..

كرم : زين واني كاعد هنا مالي دور يعني؟ ندري انت عمها بس تره اني زوجها ولازم تستأذني بالاول تاخذ موافقتي مو صح؟

دار علي يسألني ابتسمت كوه جذب وانه خايفة يسوي فلم وقصة وكتله :

طبعا غير انه امانه عدك وانت مكفيني وموفيني …

دك تليفون عمتي .. رضا ..

حجت وياه عمتي وسدته كالت:

رضا وحنان جايينه للبيت ملاكين احد بس جوانا كتلهم تعالوا ورانه خل نتعشه سوه بمناسبة نجاح ياسة ..

عمي: هلا بيهم ..

بقينه كاعدين ننتظرهم لحدما اجوا ..

طول الفترة الفاتت جانت علاقتي عادية بمرت رضا سلام وعليكم السلام ..

البنية جانت حبابة بس مو اجتماعية وجربت مره مرتين اتشاقه وياه حسيتها ضاجت وماعجبها شقاي فكلت اتصرف وياها بصورة رسمية احسن شو لا انه يمها ولاهي يمي هي مره بالاسبوع تجي …

رضا جان عكسها تماما ( ٢٤ ) يتشاقه ويسولف ويضحك ونفسه حيل حلوة بس هي حسيتها شوية حريصة …

وجانت تتنرفز من اشيل واحد من جهالها بس انه مالي شغل بيها ابوهم ابن عمي مو بس حماي واحبه واحترمه وذوله جهاله وانه مرت عمهم يعني عمتهم من حقي اشيلهم وابوسهم والاعبهم ..

كعدت مقابيلنه هي ورضا كالت:

اليوم العشه على حسابنه ..

ريم : على ابوي عازمنه .

حنان: لا والله توه كلت لرضا نعزمهم احنه عالعشا هدية نجاح ياس ..

ياس: مشكورين ماتقصرون بس ماله داعي ..

حنان: لا ميصير اول واجب يصير عندج لاعندج حمل ونجيلج ولاولادة ..

حسيت نفسي مو بس انجرحت لا اتفشلت يعني انه احجي وياها بكل ادب شبيها هاي ..

الكل انصدم من جملتها وظلوا ساكتين شوية بس عمي رد عليها كللها:

ان شاءالله الله يعوضها بتؤام .

عمتي: قابل همه شكد صارلهم ..

حسيت دمعتي وصلت لطرف عيني بس جريت نفس وكتلها:

الحمدلله على كل حال هذا رزق من الله وكرم عندي مكفيني وزايد رجلي وحبيبي وامي وابوي وابني واذا عالواجب واصل …

انخلست هي بس حسيت رضا انحرج ..

حسيت بأيد كرم ضاغطة على ايدي التفتت عليه شفته مدنك ساكت لاحس ولانفس بس وجهه احمررر ..

ماادري اذا جان متعمد يضغط على ايدي لو هذا جان رد فعل لاارادي ..

بقيت مغثوثة من حجايتها طول فترة العشه وساكته وكرم هم ساكت ..

جنت رايحه اريد اتونس بس الظاهر ماكتوبلي بس القهر ..

ضجت حيل باوعت لكرم شفته ملتهي بموبايله وهمه كلهم مندمجين ويه حنان تسولف عن شغلها ومشاريعها ..

باوعت لرضا جان يحجي ويه ريم شافني اباوعلهم ومبين على وجهي ضايجة كلي:

مبين نعستي؟

ياس: اي الجو يخلي الواحد ينعس ..

رضا: وره العشا اريدج بشغلة ..

ياس:شغلتيش؟

انتبهت على كرم عاف الموبايل وركز ويانه ..

رضا: بعد العشا ان شاءالله نحجي ..

بقيت كاعدة على نار انه مو مال واحد يطيني راس السالفة ويكلي بعدين منيلي صبر ..

خلصت عشاي بسرعة وبحماس لان رضا جان شخصيته حلوة ومتعاون وخدوم وغير هذا جان عكس كرم بكل شي ..

جان مهتم بيه اكثر من كرم يسال عني من يشوفني ضايجة يكلي اذا تحبين نمر عليج اني وحنان ونطلع ..

يسولف وياي ويشكيني ولو انه مااشتكي بس مرات تحس المقابل يدري شبيك مابيك ويواسيك بدون مايفتح وياك اي مواضيع ..

ماادري هيج احسه ..

المهم بعد العشه كرم ورضا طلعوا يدخنون بره ..

بقيت اباوع عليهم يسولفون وانه متانيه رضا يكلي شنو الشغلة اليريدني بيها ..

اجت حنان كعدت بصفي بمكان كرم وبيها بتها كالت:

كل مره اريد اسأل انتي دتراجعين دكتورة علمود موضوع الحمل ؟

باوعتلها ورديت عليها جذب:

اي راجعت …

حنان:وشنو كلتلج؟

ياس: عندي خربطه بالهرمونات ..

حنان: يااي …مو خوش هاي السالفة متعبة وتاخذ سنين … اختي هم مثلج تعبت من العلاج وتالي زوجها النذل ماصبر عليها راح اتزوج من وراها وبعدين هي من عرفت كلبت الدنيا وكالت مااريده بعد ..

ياس: وتالي صار عدها؟

حنان: لا وين مقبلت تبقى عنده بعد طلبت الطلاك واتطلكت ..

ياس: شكد بقت متزوجه؟

حنان: ( ٨ ) سنوات

ياس: الله يباوع لحالها ..

سكتنه شوية بعدين كالت :

اكلج شعدهم رضا وكرم صارلهم فوك النص ساعة بره ؟

ياس: علمي علمج ..

حنان: شراح تسوين هسه بعدما نجحتي؟

ياس: مااسوي .. شسوي يعني .. لازم اصبر بعد تلث سنوات حتى اكدر امتحن سادس ..

حنان : زين ليش متشتغلين ؟

ياس: اشتغل؟ شااشتغل؟

حنان : صديقتي وزوجها عدهم مدرسة اهلية اذا يعجبج اسألهم الج اذا عدهم وظيفه شاغرة؟

فرحت .. مو بس فرحت لا طرت من الفرح كتلها:

عود صدك تحجين؟

حنان: اي والله ليش مستغربه؟

ياس: الله … هيج واشتغل

حنان: التهي مادام ماعندج لاماما ولاداده ..

ياس: بس شيشغلوني قابل مخلصه معهد معلمات انه توني نجحت من الثالث ..

حنان: لا مو معلمة كاتبة او عالطابعة موظفة يعني مو معلمة ..

ياس: اي والله علواه كليلهم عفيه ..

حنان: تدللين ان شاءالله اليوم او باجر اتصل بيهم او امر عليهم واحجي وياهم …

ياس: ان شاءالله ..

بهالاثناء دخلوا رضا وكرم ..

بس رضا بعد ماكلي شراد مني ومن سألته قبل لانرجع كلي:

خلص فهمته لكرم هو يحجيلج بعدين ..

ماافتهمت شي بس هزيت راسي اي وسكتت ..

رجعنه للبيت انه وكرم بسيارته …

جنت ساكته بس بداخلي احوس ..شلون احجي وياه واكله على سالفة الشغل ..

اكول لو مااكول؟

لا خل اتاني اول البنية ترجعلي خبر يالله ..

صافنه واخطط وسمعته حاجاني بس ماسمعته شنو كال كتله:

هااا؟

كرم : على رضا احجي ..

ياس: شبيه؟

كرم: يكلي خلي ياسه تداوم وياك بالمختبر تتعلم بدل مكاعدة بالبيت مكابله الحيطان …

ياس: شااتعلم؟

كرم : اعلمج تضربين ابر .. تسحبين دم .. قابل شتتعلمين ..

ياس: لا مااريد .. اصلا تلعب روحي واخاف اضرب ابر مو انوب اسحب دم ..

كرم : كيفج .. علمودج هو ديحجي كدامج (٣) سنوات قبل متكدرين تمتحنين سادس ..

ياس: حنان راح تشوفلي شغل ..

التفتت علي كلي:

شغليش الي تشوفه الج حنان؟

ياس: ماادري .. كالت صاحبتها ورجلها عدهم مدرسة اهلية ..

سكت ماحجه وانه هم سكتت ..

لزم ايدي سحبتها كلي :

زعلانه ؟

ياس: لا شلون ازعل منك قابل مسوي شي انت يزعل هههه والله يالله ..

كرم: اممم ..

وصلنه للبيت بس عمي وعمتي بعدهم ماواصلين لان راحوا يوصلون ريم لبيتها ويرجعون ..

دخلت للبيت وصعدت كبل ..

بدلت هدومي وجاي اطلع وصعد رجعت للغرفة بس استزحمتها اسد الباب بوجهه وكف هو بالباب كلي:

ياسه؟

ماباوعتله كتله:

ممنوع تلفظ اسمي ..

كرم : مو على هواج … تعاي هنا اشوف ..

ياس: والله اليريدني يجيني على كولت سلامة من جنه جهال ونتزاعل ..

كرم : تعاي احجي وياج مااريد منج شي ..

درت باوعتله ردت ارد عليه شو هذا مثل الكمز ورجع ليوره ..

استغربت هاي اكثر من مره يسوي هيج …

مشيت باتجاه خفت ..

هو صافن بوجهي ونظرة غريبه على وجهه وصلت لباب الغرفة كتله:

شبيك؟

رأسا جرني من ايدي وسحبني من الغرفة ..

ظليت متحنطه ماادري شكو ولاادري شبيه ولااعرف شسوي بس هو جان يرجف ووجهه ينضح عرك …

خفت عليه وماادري شبيه اباوعله صافن علي لزمته كتله:

شبيك كرم؟ تعبان ..

أخذني من ايدي للغرفة الثانية دخلني وسد الباب كتله:

لا ماكو هيج فلم عبالك مثل ذيج المره تقشمرني وتالي تنسى روحك وتطلعني وحده مااستحي ومصاحبه الطبيب ابو العيون … هسه هم جاي تريد تهيني؟ ماانصحك لان هالمرة والله والخلقك ماافوتها الك ومااسكت ..

صافن علي ..

مسح وجهه بيده وكعد عالجرباية كلي:

انتي شلون تنامين بذيج الغرفة؟

ياس: شبيها الغرفة بعبع انام حالي حال خلك الله ..

كرم : كعدي هنا ..

درت وجهي اريد اطلع وانزل كتله:

اوووه مالي خلك المغثه كرم روح عفيه كافي شنو عبده عندك انه يومية تمثل بيه فصل ..

كرم: تعاااي هنا ..

صاح علي بعصبيه ..

درت عليه كتله:

مااجي عدك شي تريد تكوله كوله من بعيد ماعدك خليني انزل ..

كرم : عندي .. بس تعاي هنا ..تعاي لاتخليني اصيح ..

ظليت واكفه وأتأفف كام هو واجه يمي كلي بهدوء:

هناك مااشوفج انتي؟

باوعتله وانه عاوجه حلكي باستهزاء:

جا شتشوف طنطل ؟

كرم : كافي تره داحجي صدوك مو وكت سوالفج ..

باوعتله شفته عصبي معقولة الولد يشوف شي انه مااشوفه لو جاي يريد يضحك علي ..

كرم: هسه انتي مو ترديني احجي ..

ياس: شتحجي ؟

كرم : مرات من ادخل لذيج الغرفة اخاف من شكلج …

ياس: هاا ؟

كرم : شكلج مرات بذيج الغرفة مزعج .. او يخوف ..

ياس: شدعوه … يخوف … شنو بس ياسة الله خالق عيونها تك وتك .. بس انت كول اتحجج انه واريد هم اقشمرج عالمرة مثل كل مره الظاهر اتذكرتلك سالفة قديمة ماسائلني عليها بعد ..

عفته ونزلت …

بعدها ماحاجاني ولاحاول يحاجيني ..وانه هم التهيت من زماان مارايحه لاهلي فرحانه وطايرة اريد اروح ميته على شوفت جورية اختي وفهيمه وسلامة والبنات والجهال …

منا ناجحة ومنا اريد اروح لاهلي مااريد بعد شي يغثني ويضوجني لاكرم ولاغيره ..

طلعت للسوك اشتريتلهم صوغة وحضرت جنطتي واحتياجاتي ورحت لعمي كتله:

انه جاهزة ..

عمي: معناها باجر نروح ان شاءالله .. هسه اتصل عالسايق وباجر شوكت تردينه تطلع الفجر لو على راحتنه؟

ياس: لانصلي ونطلع احسن حتى نوصل من وكت ..

عمتي: هههه هي متصدك تروح يا على راحتك .. والله مشتاقتلهم بس الجو حار مو مال سفر ..

شوية ودخل كرم ماحاجاني بس مد ايده الي باوعتله اطاني فلوس ..

ياس: مااحتاج عندي ..

عمتي: اخذي من زوجج لتردينه من ينطيج شي ..

عمي: اخذي عمو اخذي لتستحين حتى لو ممحتاجتهم هسه يجوز بعدين تحتاجيهم ..

مديت ايدي اخذت الفلوس كتله :

مشكور ..

حرك راسه كأنما يكلي العفو ..

لنى: شكد تبقين ياسه؟ باتي وتعاي عفية هسه اظل بحدي اضوج ..

عمي: ههههه هذا الطلب منج لو من كرم ..

ابتسمت بغصه باوعتله شفته يباوعلي دنكت وجريت حسرة ..

لنى: لا بابا والله احجي صدوك ياسه عفية لتطولين .. كرم احجي وياها كوللها حدج يومين ..

كرم : براحتها ..

كسر واهسي .. عبالك يريد يخلص مني ..

مامهتم اذا رحت واتأخرت ..

طبعا مايهتم لايشتاق لايحس بوحشة ..

قابل مثلج ياثولة ..

امداج

بقيت بليلتها كاعدة اراقب ميل الساعة شلون يتحرك بطييييىء كللش بطيئ ..

شيجيب الفجر …

فتحت التلفزيون اباوع فلم لحدما الله يفرجها …

سمعت صوته بره يكح ..

كل شوية اسمع صوته يكح ..

فتحت الباب على كيف شفته كاعد بيده كتاب يقراه والايد الثانية بيها جكارة ..

كلما ياخذ نفس من الجكارة يظل يكح …

سديت الباب ورجعت بمكاني ..

بس ظليت افكر ..

وضميري أنبني ..

شلون اغلس وانه اشوف حالته هيج ..

هذا كله من التدخين ..

مااطاني كلبي اغلس اكثر … كمت فتحت الباب هو رأسا دنك راسه ..

اترددت من شفته هيج بس بعدين رحتله كتله:

انت مرتاح على هاي الحكة؟

رد علي وهو مدنك على كتابه:

انزعجتي؟

اتنهدت كتله:

بس لو افتهم شبيك تدخن .. شناقصك ؟

كرم : رجعي لغرفتج ..

ياس: المفروض انه الادخن من ضيم كلبي مو انت ..

كرم: شبي كلبج ؟ تحبين ههه؟

ياس: هو مو صوجك .. صوجي انه المدوخه راسي بيك ..

رفع راسه بعصبية وكلي:

لج … لاتستفزيني اكثر مو من صالحج خاف شفتيني ذيج المرة فوتتلج الكف تره ماعندي مانع اكوم هسه ارجعلجياه عشرة .. افتهمتي؟

هزيت راسي وكتله:

ادري بيك تسويها وماتنكسر عينك انعم الله عليك ياابن عمي ..

عفته ورجعت لغرفتي ..

ظليت الليل كله اطحن بروحي واكل بروحي اكل شوداني مو انه اعرفه شلون بيه بهالكلب اطلعه واذبه للجلاب لو شسوي؟

وبقى الليل كله يكح ..

حتى من فكرت انام حتى لاافكر وانقهر هم ماكدرت لان صوت كحته عالي .. ويم باب الغرفة ..

أذن الفجر طلعت اتوضه شفته نايم ..واخيرا …

اتوضيت وصليت ونزلت اشوف عمي اذا كعد ..

لكيته يتريك ..

كعدت اتريكت وياه بس حتى لاافشله بس الصدك نفسي مسدودة ..

خلصت وصعدت بدلت ونزلت رحت لغرفة لنى سلمت عليها وهي بفراشها وبقيت واكفة كبال الدرج يصير اروح بدون مااسلم عليه واودعه؟

يصير لو لا؟

مايستاهل اتعنه واصعدله اكيد راح يفشلني …

عوفيه يولي ..

انسيه ..

كعدت عالدرج متانية عمي يخلص لبس حتى اطلب منه ينزلي جنطي ثكيلة مااكدرلها ..

خذتني صفنة وضاك صدري ..

جني رايحة وبعد ماراح ارجع ..

نفس الخوف الحسيت بي من طلعت من بيت ابوي حتى بطني ظلت توجعني ..

وشلون اروح وانت هذا حالك ..

اووف امده كلبي .. ماتحبني ولاعب بيه لعب وافكر بيك واحبك وشايله همك ..

جالو تحبني جا شسوه بيه هالكلب المصخم ..

امداني

غميت روحي صدك وماحسيت الا واحد كلي :

شوكت تجوزين من هالطبع ..

كرم .. منزل جنطتي ..

لو ماالفشلة جا غميت روحي بعد ..

خطية اففف صارلي ساعة ادردم عليه بكلبي وهسه اجه جايب جنطتي ومانايم اكيد حتى يودعني ويسلم علي