بس الدجاجات عدنه من الاول ياس من بطلوها من المدرسة ضاجت بالبيت جابولها اخوانها دجاج وارنب زغيرون وبشه ظلت تتونس بيهن انوب اطتهن بقن بس الدجاجات علمود البيض خلتهن …
مرت عمي : اي بعد عليمن تطلع عمها طبيب بيطري واني هم ههههه ….
بس والله حرامات بطلتي من المدرسة .. لازم ترجعين هذا مستقبلج والشهادة سلاح للمرأة باجر يجوز تحتاجيها وتفيدج ..
ياس: مايرضون اخواني ..
جنت اتمنى عدي تليفون مثل البنات بس مايقبل جنت اتمنى البس بجامة بالبيت بس هم ممنوع مايقبل جنت اتمنى اطلع ويه البنات من يرحن للولاية يتسوكن بس ممنوع ..
لااطلع لااطب ولااشوف احد ..
جانت جورية اختي مرات تشوف سوالف وهدوم عالفيس بتليفون امير رجلها ومن يجون تراوينياهن ومرات جنت اخليها تطلبهن الي بسكوت بدون مااحد يدري …
البسهن بغرفتي واوكف كبال المراية اتفرج عليهن وافتح شعري واخلي مكياج … جنت العب لعب تالي الليل من ينامون كلهم ..
اسد علي باب غرفتي واظل البس وانزع …
مليت اتوسل بأمي وابوي على كل شي ومايفيد كله مرفوض امي جوابها الوحيد هو :
باجر من ترحين لبيت رجلج سوي شماتردين …