رواية القلب بالقلب الفصل الثاني عشر 12 بقلم روز الفياض
ج١٢
نزل الجنطه وبقى كاعد كبالي بالصالة ..
ماحاجيته ولاحاجني بقيت مدنكة مسوية روحي اسبح بأصابعي بس جذب ..
مدنكة لان ادري بي جاي يباوعلي مانزل عينه ..
خلص عمي تبديل واجت السيارة ..
طلع هو صعد الجنط وانه سلمت على عمتي وجوانا ..
ياس: جوانا شو جنج فرحانه مفاركتني عبالك بايكة رجلج 
..
..جوانا تضحك مدري تفتهم دردمتي مدري تضحك بلية فهم …
عمتي: لتخافين ترحين وترجعين بالسلامة ولتخافين عليه زوجج بالحفظ والصون هههه …
حضنتها ودمعت عيوني ..
دخل هو ظل واكف يباوعلي طاحت دموعي ..
احتاريت شلون اطلع كدامه بدون مااحاجيه واسلم عليه ..
ظليت واكفة وامسح دموعي المثل المطر صارت ..
عمتي طلعت وره عمي وجوانا فاتت جوه ..
سويت نفسي اعدل بحجابي وعباتي كبال جامة الكاونتر مال المطبخ ..
كرم : ديري بالج على نفسج ..
طاحت دمعتي ومسحتها بسرعة ودرت وجهي عليه كتله :
ان شاءالله ..
كرم : مستعجله؟ تردين تخلصين؟
ياس: ياروح مابعدج روح …
كرم: حقج .. تعبتي ..
ياس: قليلة هالكلمة ..
اتحسر شوية بعدين كال:
يالله مااريد اعطلج اكثر .. ادري بيج مستعجلة ومشتاقلة ..
سلميلنه عالكل واذا احتاجيتي شي اتصلي وشوكت ماردتي ترجعين هم اتصلي علي او دزي مسج ..
ياس: مااتوقع ارجع ..
كرم : نشوف بعدين ..
باوعتله وفريت ايدي عالثقة العنده ..
طلعت وهو واكف يباوعلي ..
صعدنه بالسيارة وهو واكف وعينه علي وعمتي واكفة يمه وبيدها طاسة ماي تريد تذبها ورانه ..
انطلقت بينه السيارة بس ماارتاحيت ..
حسيت عفت كلبي واجيت بلايه كلب ..
انعصرت روحي ..
جان السايق مخلي قرآن والدنيا بعدها ظلمة شوية ..
خليت راسي ونمت ..
وماكعدت الا من وصلنه للمطعم ..
نزل عمي غسل هو والسايق وانه بقيت بالسيارة اباوع عالدرب حسيته وحشة ..
شمالك يكلبي تحب المايحبك ..
شوكت تكولها ياكرم ..
شوكت تحبني وتكلي احبج ..
ولك شيبت من قهرك وانت ماحنيت ..
صافنه وادردم ويه روحي ..
رجع عمي سكتت ..
عمي: هاا ياسه جوعانه بابا؟
ياس: لا عمو ماجوعانة .
عمي: خاف متردين تاكلين لحدما توصلين لاهلج هههه؟
ياس: هههه لاوالله بس ماجوعانه .
عمي: يالله هسه تشوفيهم وتشبعين منهم ندري بيج مشتاقتلهم بس مو تنسينه عاد وتحلالج الكعده هنا هههه ..
كتله وانه اجر حسرة:
لاوالله عمو اصلا والله جاية بس مافرحانه احس روحي بقت هناك ماادري شلون راح اتحمل افارككم اتعودت عليكم ..
عمي: لا اتشاقه وياج اتونسي ويه اهلج وخواتج وشبعي منهم وشوكت ماردتي ترجعين بس اتصلي تليفون واني اجيلج ..
ياس:ماتقصر عمو الله يخليلياك يارب ..
اجه السايق وسكتنه ..
بنص الطريق شغل اغاني وكل اغنية تطلع اتخيل جاي يغنونها على حالي ..
اول ماطبينه لمنطقتنه كعدت عدل اباوع من الجامه اشوف الشوارع شكو بيها متغير ..
اريد اشوف الناس ..
عبرنه على ام فلاح ام الباجلا افيششش على ذيج الايام ..
اجتني ايام مااقبل اتريك الا باجلا من جنت زغيرة وامي تروح من الصبح لام فلاح تجيبلي حتى اقبل اروح للمدرسة هههه من يومي مؤذية …
مشينه شوية شفت جنة بيت ابو ماهر البراس الفرع عباتها على راسها وبيدها علاكة المسواك وبالايد الثانية تسحل بأبنها وتدردم عليه وهو يبجي ..
الظاهر مجلبله بحاجه بالسوك وشالع كلبها …
وصلنه لبيت اهلي عمي قبل لانجي كال ماراح اكللهم جايين ماله داعي يتحضرون ويتعبون كتله بكيفك ..
المهم وصلنه للبيت وكفت السيارة كبال الباب والباب جان مفتوح ..
طلع حميد ابن اخوي وشاف عمي صفن يمكن بالبداية ماعرفه او شبه عليه بس من اجت عينه علي ظل يكمز وطب جوه للبيت يركض واسمعه يصيحلهم :
اجت عمتي ياسه …
اجت عمتي ياسه …
نزلت من السيارة وعمي نزل الجنط هو والسايق ..
دخلت من باب الحوش وعفت عمي يحاسب السايق ..
اول مادخلت شفت امي خطية حاطة عباتها على راسها وطالعة تتلكاني …
امي: هلا .. هلا بياسه .. هلا ببنيتي ..
رحت اركض شبكتها وبست راسها وايدها ..
امي وابوي جانوا كل جم شهر يجون لبغداد واشوفهم بس البقية ماشايفتهم بس مره مصعب جان جاي يزور ومري علي ..
طلعت فهيمة كالت:
صلاوات .. توه رد النور للبيت ..
عفت امي ورحت حضنتها والدموع عشرة عشرة انه ابجي وهي تبجي ..
فهيمة : خيه ياسه … عنيتي علينه خيه ..
ياس: انه هم مشتاقتلكم والله ..
فهيمة : لاخيه انتي موش الاولية رحتي هناك صرتي من اهل بغداد بعد ماتعرفينه ..
ياس: لا والله حرام عليج ..
سمعت صوت سلامة من وراي كالت:
لا خايبه هذا كله من اكريم تعلميني بيها ههههه ..
درت عليها كتلها:
هو كله من اكريم هههه ..
شبكتها ولاساعة ولاساعتين تبوس بيه اخر شي كتلها:
كافي سلامة كسرتي فجوجي سلام الاسود ..
سلامة : 
خايبة ماتصيرلج جاره ..
خايبة ماتصيرلج جاره ..ياس: ابد ..
سلامة: الله يساعد رجلج عليج …
اتحسرت حسره جبيرة وكتلها:
اوووف اوووف يارجلي ..
فهيمة : ها خايبه شمالج فد لا جايه زعلانه ؟
سلامة : خايبه شتزعل شو هي كضت الزلمة وانهزمت ماصدكت بعد زعلانتيش بس هاي تسوي هيج حتى تطرد عيون ….
دخلنه جوه جانوا الولد وابوي طالعين عدهم طلابه ..
دخلت كبل لغرفتي ولميت الجهال كلها يمي ابوس هذا واهد هذا وهمه يكلولي :
عمه صايره شحلاتج ..
خلصت اليوم افتر بالبيت رحت شفت دجاجاتي لكيت وحده منهن ميته ومتت من القهر حتى مااتغديت ..
انوب اجوا ابوي واخواني ومن شافوني انصدموا لان ماعدهم خبر بجيتنه …
خلص اليوم سلام ومباوس وبالليل هم رحنه لبيت عمي ابو امير سلمنه عليهم ..
رجعت نعسانه بس ماكدرت انام رغم فرحاااانه بس بالي يمه ياترى هسه شيسوي …
ارتاح مني يمكن؟
لا الصبح حجيه وياي واسلوبه مو مال واحد فرحان بروحتي بالعكس …
يجوز جان يمثل علمود ارجع ..
زين شيسوي برجعتي اذا ما رايدني ومجبور علي المفروض يفرح لان راح يفتك مني …
والله ماادري ..
جني راح يروح عمري وانه مااعرفك انت شتريد يكرم …
طلعت تليفوني ليكته متصل علي من الظهر ..
وموديلي مسج :
( الحمدلله عالسلامة .. شلون جان الطريق؟ سلمي عالجميع وديري بالج على نفسج ) ..
حتى المسج ماله رسمي مابي شي خاص ..
اكتأبت اكثر مارديت عليه طفيت التليفون ونمت مااريد افكر بعد انه هسه هنا واريد ارتاح ..
نمت وكعدت من غبشة الله صليت ومثل كبل طلعت لميت البيض وكعدت يم امي تسوي ريوك ..
امي: ها ياسة .. شو جنج مالج خلك؟
ياس: مابيه شي يمه بس تعبانه من الطريق ..
امي: هاا .. خاف حامل؟
هزيت راسي وكتلها :
لا ..
امي: جا انتم شني سالفتكم ماوداج للطبيب رجلج ماشفتولكم جاره ؟
ياس: جارتيش يمه ..
امي: هايه اليسوونها بالصوندات ..
صفنت شنو هاي اليسوونها بالصوندات …
ياس: ياصوندات يمه ؟
امي: خايبه هاي اليسوون بيها الفروخ ..
ياس: مفرخه ؟
امي: يااا دهر فرج كون خايبه مو فروخ الدجاج اليسوون بيها الجهال الصوندات مال الجهال …
ظليت صافنه شوية افكر امي شتخرط على راسي من الصبح ..
بعدين اتذكرت وفطست من الضحك :
امي: هاا اسم الله شمالج ؟
ياس: اتذكرت الصوندات
امي: يا 
ياس: قصدج اطفال الانابيب
امي: اي .. اي هي هاي مال الانابيب مدري شسمها ههههه .
ياس: خرب حظي
كعدن سلامة وفهيمة ومن سولفتلهن ماتن من الضحك على سوالف امي …
الظهر اجت اختي جورية وباتت عدنه …
اتونست حيل ..
عمي ثاني يوم رجع لبغداد وبقيت انه ماادري شوكت ارجع هو كلي:
الج اجازة مفتوحه بس مو تطولين علينه …
ابوي: لا ان شاءالله اسبوع ونردها الكم مره معرسة مايصح تعوف رجلها بحده ..
سكتت ماحجيت شي ..
المهم مرن علي يومين مرتاحة مابين ناس جايه تشوفني ومابين انه اروح اشوف ناس واسلم عليهم ..
اليوم الثالث طكت بخشمي ريحة الباجلا …
العصر ..
امي ماكو رايجة تلاجي ( رايحة تعزي ) بوحدة بالمنطقة ..
فهيمة جانت تسبح وسلامة تنوم ابنها ..
ياس: اشتهيت باجلا من فلاح ..
سلامة : هسه يجون الجهال ووديلج واحد منهم يجيبلج ..
ياس: حتى يجيب الطاسة فارغة ..
سلامة: ياا لا ماياكلونها جهالنه ..
ياس: ولج مو ياكلونها مو ذيج المره وديت بتج النادرة عود اجت جايبه الطاسة فارغة ماكلينها منها الجهال وهي الفاهيه تباوع عليهم ..
سلامة: ياا ههههه حيل وياج لبسي عباتج وروحي جيبي وتعاي بسرعة ..
ياس: ياا بالله شافني ابوي ..
سلامة: وين يشوفج هو ومضر راحوا للولاية للمعارض يشوفون سيارة ..
صفنتلها كلت شكو بيها البس عباتي واروح اجيب الباجلا شو هي هاي ام فلاح شبختين عن بيتنه ..
كمت على حيلي وكلت لسلامة:
يالله جا خل اروح كبل لايجون .. امري لله مابيجن خير ماتكولن حماتنه جاية خطار احنه نروحلها ..
سلامة : هههههه لامانكول ..
رحت لبست حجابي وعباتي وشوية غطيت وجهي مالي خلك امشي واسلم ..
انطلقت ادندن ويه روحي واغني رحت لام فلاح سلمت عليها واشتريت الباجلا ورديت ..
بطريق الرجعة حسيت شي طخ برجلي باوعت ماكو شي كملت مشيي ..
شوية لا والله هالمره اكو شي صخره هاي واحد جاي يشمر علي صخر ..
التفتت ماكو احد ..
مشيت اسرع وهالمره اجت الصخرة براسي ..
وكفت ودرت شفت فلاح ابن فلاح المنغولي ..
ياس: خرب حظج ياسه منين طلعلج فلاح هسه ..
عفته ومشيت وهو اتولاني بالصخر والحصو زلغ رجليه درت لا اكدر اوكف ولااكدر احاجية هو شيفتهم واحاجية ..
ماصدكت وصلت للبيت طبيت وكعدت يم باب الحوش ..
فحطت من المشي بسرعة ..
كلبي ظل يخفك ..
ياس: شكول عليك يافلاح تعبت منك لله ..
كعدت اباوع لرجليه كلها مزلغة وطالع منها دم :
ياا دهر كون مكسر رجليه تكسر ابن الحلوه ..
راسأ اندك الباب بس مابيه حيل اكوم حسيت جسمي يرجف مديت راسي من وره الباب وانه كاعدة وكلت:
منوووو ؟
ماشفت كبالي بس رجلين واحد لابس بنطرون كابوي ازرك ..
رفعت راسي شفت كرم !!!!
ياس: دهر الدهرج ياسه ..
واكف ويباوعلي وانه ماده راسي من وره الباب …
كرم : يصير افوت ؟
ياس: هااا؟ اي فوت .. فوت ..
دخل وكف كبالي وانه كاعده مبسطه بالكاع وكبالي طاسة الباجلا كلي باستغراب :
شتسوين كاعده هنا؟
ياس: مااسوي ..
كرم: لعد كعدت هنا شكو؟
ياس: ماكو …
ظل كلبي يدك مابين صدمتي بشوفته ومابين بعدني برعبتي من فلاح المنغولي ومابين خوفي اذا كتله جنت رايحه اجيب باجلا …
بلعت ريكي كتله:
مو سلامة خطية تتنسه ورادت باجلا من ام فلاح ومحد هنا يروح يجيبلها ..
كرم : اي؟ وانتي رحتي مو؟
هزيت راسي اي كتله:
اي طبعا انه اروح جا ياهو يروح خوما اعوف البنية الحامل هي تروح بالله صار بيها شي؟
كرم : اممم … وليش كعدتي هنا ؟
ياس: تعبت .. كلبي ظل يخفگ ..
كرم : شبيج؟
ياس: مو هذا فلاح ابن ام فلاح ..
انتبهتله اتغيرت ملامحه وكلي بنبرة حادة:
شبي؟ شسوالج؟
ياس: يشمر علي صخر وحصو فشخني وزلغ رجليه اجيت اركض ركض منه ..
زمخ علي بعصبية:
وانتي شكو ترحين تجيبين؟ وشنو يشمر عليج صخر وينه هو؟ وين بيتهم؟
ظليت ارجف كتله:
براس الفرع المره الكاعدة بالباب وحاطه كبالها جدر عالجوله …
طلع مد راسه من الباب باوع ورجع شمر الجنطه بالحوش وكلي شكبره هذا الادب سز ؟
ياس: شمدريني جبير من جنت جاهله هو جبير ..
طلع وكلي :
حسابج بعدين ..
طلعت اركض وراه:
كرم .. كرم .. تعال اوكف ..
التفتت علي وصاح :
رجعي للبيت احسنلج ..
ياس: راجعه والله بس اصبرلي خل اكلك شغله .. خايب اوكف ..
كرم: رجععيي .
ياس: اوكف خايب بس احاجيك … كرم ..
هو منغولي مايفتهم ..
وكف بمكانه ودار علي وعيونه بكصته ..
من شفته هيج رجعت للبيت اركض ..
طبيت للبيت كبل حتى الباجلا نسيتها بالحوش ..
دخل وراي وبقى واكف يم باب المطبخ متاني البنات يلبسن حجاباتهن ..
رحت فتحتله باب الديوانية وصحت عليه دار ..
لزمني يم باب الديوانية ظل يباوعلي كلي:
انتي شوكت يصير براسج عقل متكوليلي؟
ياس: ماادري .. يعني ماعندي عقل ؟
خل ايده عالحايط الوراي ودنك علي كلي:
مره ثانية اذا شفتج طالعة ومسوية هالسواية متلومين الا نفسج ..
هزيت راسي اي ..
دخل للديوانية ودخلت وراه ..
كعدت كبالة وبقيت ساكته ماادري شجابة ..
يباوعلي بخزره وساكت بعدين كال:
وين عمي والولد؟
ياس: راحوا للولاية يشترون سيارة.
كرم: وعمتي؟
ياس: راحت للفاتحة تلاجي ..
كرم: تلا شنو؟
ياس: تلاجي يعني تلطم .. شدعوه متعرف الا نشرحلك ..
كتله وانه اعوج بحلكي ..
باوعلي وابتسم نص ابتسامة وكلي:
هذا لسانج اذا مكصيته مااطلع كرم ..
ياس: كصه .. انت الخسران اظل على كلبك انت بدون شي مامشتهيني انوب اصير خرسة ..
ضحك حيل من كل كلبه بس ماحجه ..
بقيت ساكته واتأفف بعدين كلي:
تعورتي من ضربج المنغولي؟
ياس: اي طبعا اتعورت فشخني براسي هسه هاي صارت بي عنجوره ..
كتله وانه اتلمس براسي ..
كرم : هههه يالله زين مادام عنجورة وحده على كولتج ..
ياس: لا جا ورجليه التزلغن ..
اتدنه كعد يمي جفلت واتدنيت شوية منه ..
كرم : خل اشوف رجلج .
بلعت ريكي كتله:
شتريد من رجلي؟
كرم: اريد اكسرها حتى بعد متطلعين من باب البيت ..
درت وجهي وانه ادردم لان متشمت بيه ويضحك علي كال:
انطيني رجلج ولاتدردمين ..
ياس: مابيها شي طابت ..
رأسا كعد كبالي وسحب جف رجلي ..
لان جنت امشي بسرعة وشارعنه مامبلط رجليه صايرة ملح من التراب وانوب زلغهن فلاح المنغولي يبووي هسه شيكول علي شبيهن رجليها ملحات 
..
..امداج ياسه
كرم : بسيطة مابيهن شي ..
بقيت ساكته كال:
يعني احسنلج هيج كدام الناس بالشارع وزين ماوكعتي لو ضربج ضربه قوية اذاج بيها ؟
ياس: اوووف هو انه شحجي من الصبح اكلك البنية حامل وتتنسه ومحد هنا يروح يجيبلها خطية ..
بعدني مامكلمة جذبتي دكت فهيمة الباب ودخلت بيدها طاست الباجلا …
خرب حظج ياسة …
سلمت على كرم وبعدين كالت:
جا شو طلعت لكيت هاي الطاسة بره بالحوش وسلامة كالت هاي الباجلا مالت ياسه جانت مشتهية باجلا وراحت جابت بس يمكن شافت رجلها ونستها ههههه ..
ضحك هو حيل خرب من الضحك وانه ظليت اغم بروحي وفهيمة صافنه علي متعجبه ماتدري شكو اخر شي كالت:
ياا شمالج ..
ياس: مابيه شي سلامتج جا غير الله جابج بالوقت المناسب ..
رجع ضحك هو ..
فهيمة استحت عبالها قصدي شي ثاني مثلا كرم جان يريد يبوسني …
اترخصت وطلعت ..
التفتت عليه رجع ضحك كتله:
ضحك خير ان شاءالله وشرنه على بيت ام فلاح ..
هالمرة فطس من الضحك ..
من سكت كال:
ليش شتردين منهم حرام ..
ياس: كله منها لو مبطله ماتبيع باجلا مو احسن من هالحال …
كام هو اخذ طاسة الباجلا وكلي:
هاي بعد متاكليها ..
ياس: ليش 
؟
؟كرم : كيفي ..
ياس: لا لا اريدها والله طاستي دخلت بمعارك ويه فلاح المنغولي علمودها ..
ضحك كال:
لا ..ظلت بره هواية خاف وكع بيها شي ..
ياس: وربك لو طايح بيها تمساح هم اكلها … لا كرم جيبها عفيه ..
كام وطلع بره هو والطاسة وانه اركض وراه ..
ذبها بالزباله ورجع ..
فصول الرواية: 1 2