رواية القلب بالقلب الفصل الثالث 3 بقلم روز الفياض
استمرت حياتي مملة ماكو شي جديدة ضووجه ..
قررت ادرس جهال المنطقة بالبيت لحد صف السادس ابتدائي هذا العرفله بس …
ظليت اسبوع اتوسل بأبوي يالله قبل …
جنت مرات ادرس جهال اخواني هسه اريد اوسع مشروعي ..
جنت من اباوع عالتلفزيون واشوف البنات شلابسات وشلون يحجن وشلون يتصرفن جنت اتخيل روحي مثلهن …
ندمانه …
حيل ندمانه لان بطلت من المدرسة …
جنت اتخيل روحي لابسة مثلهن واحجي مثلهن هيجي كلي ثقة واعرف ارطن مثلهن بالانكليزي وحتى بالعربي …
جنت اتمنى اصير معلمة او مدرسة ..
هيج اريد اصير مثل معلمتنه كبل ست فوزية ..
الله يذكرها بالخير ..
جانت حلوه وكشخة ومثقفة جاية من الولاية درستنه بصف السادس وبعدين راحت ..
يكولون عرست وانتقلت لغير مدرسة يم بيت عيالها ..
جنت اظل صافنه عليها من تحجي وتشرح وتأشر …
امداني 
..
..بديت ادرس الجهال بالحوش حوشنه جبير وكله زرع واخوي وسلامة وفهيمة يومية يغسلنه ويساعدني افرشة ويطلن وياي المخاد ونسوي بي كعدة مرتبة …
ماجانوا هواي الجهال اليجون بس (٥) وال (٥) الثانين جهال اخواني …
ماجنت اخذ منهم فلوس بس اريد اتونس وابقى اتذكر القراية والكتابة …
جنت مرات اوصي امير ابن عمي رجل جورية اختي يجيبلي من الولاية قصص اقراهن لو كتب دينية ..
مرت الايام والاشهر وعمي مارجع علمود سالفة البيت ولاطالب بفلوس حصته ..
وبيوم اندك بابنه قبل المغرب بشوية ..
طلعت فهيمة فتحت الباب ورجعت كالت :
ام طالب وبتها وجنتها ..
امي : ياام طالب ؟
فهيمة : ام طالب الكبل جانوا يمنه براس الفرع .. الشالوا راحوا للولاية علمود ابنهم طب للجامعة ..
امي : يااا خايبه عرفتهم …اتذكرتهم … دخليهن دخليهن للديوانية وحطي القوري عالنار ..
انه متمددة اباوع عالتلفزيون وسلامة سابحة وكاعدة يمي تظفر بشعرها ..
سلامة : خايبة ماترحين تشوفينه شعدها ام طالب وجربزتها هنا ..
ياس: والله ولا اروح .. اريد اشوف المسلسل هسه راح تطلع ..
سلامة : خايبة بسرعة شبيج سوي روحج تردين تسلمين عليهن سلمي وتعاي …
ياس: ماا .. روحي انتي هزي طولج وروحي سلمي عليهن صارلج ساعة تظفرين براسج .. هن شعرتين شتظفرين بيهن هسه لو شعرج طويل جا شسويتي ..
سلامة : ياا خايبه شمالج كسرتي واهسي ..عود اشتهيت اسوي كصيبه مثلج .. مااريد بعد مالازم …
كامت لفت شعرها وراحت …
شوية ورجعت تركض كالت:
خايبة ياسه ..
ياس: هاا؟
سلامة : خايبة كومي امج تكول خل تجي تسلم عالوادم عيب سألوا عليج ..
باوعتلها ورجعت اباوع عالتلفزيون كتلها :
راح تبدي المسلسل متانيتها مااروح …
سلامة : خايبه بس ماترحين تجي تلعب بيج جوله …
ياس: اي ادري بس خل اسمع الاغنيه مالتها يالله اروح اموت عليها ..
طلعت المسلسل وبدت الاغنية ولان مسلسل كوميدي الاغنية تضحك وتركص ..
كمت على حيلي اخذتلي ركصة شوية وسلامة تضحك علي وتكلي :
خايبه انتي شوكت تكبرين وتصيرين مره .. تظلين عقلج مثل الجهال … وانوب تريد تعرس وهي لهسه تكوم تردح عالاغاني والهوسات مثل الفروخ الزغار هههههه ..
كضيت سلامة من ايدها وخليتها تكمز وياي وركصتها غصبن عليها وهي تضحك ..
فجأة انفتح الباب كمزنه .. فهيمة كالت :
ياا خايبات … لحد يجي ويشوفجن ..ذبيتن فلك وعلي …
خلصت الاغنية وكعدت وسلامة وفهيمة يضحكن ..
فهيمة: هسه هي مخبلة وعقلها عقل جاهل انتي الجبيرة الدبيره شمالج 
شجاج ..
شجاج ..طلبت امي علينه واحنه نحجي ونضحك كالت:
ولج مو وديت عليج كتلج تعاي سلمي عالوادم ؟
ياس: اي يمه جنت اركص شوية هسه اجي …
امي : يالله بسرعة ..
راحت امي وانه كمت رحت غسلت وجهي ولبست وبدلت ثوبي ولبست ربطتي ورحت دخلت للديوانية حتى اسلم على ام طالب وجنتها وبتها ..
بت ام طالب نجاة جانت وياي بالمدرسة بس انه بطلت وهي كملت للثالث متوسط وعرست اظن مااتذكر والله ..
دخلت كامت نجاة سلمت علي وكامت مرت اخوها هم بس امها رادت تكوم ماخليتها دنكت انه سلمت عليها ..
كعدت بصف نجاة وظلت تسألني:
شلونج ؟وشخبارج ؟ يالكاطعة .. شدعوة عليج ..
ياس: هو بكيفي … تدرين انه مااطلع من البيت بس بالمناسبات والا امي لو البنات وياي … بس انتي شمالج سألي كولي امر عليها بيوم واشوف اخبارها ..
نجاة : ماالحك منا الجهال ومنا ابوهم ومنا عدي عمتي ام رجلي نسرة الله لايراويج … والله حتى لاهلي مااروح الا كل شهر لو شهرين ..
ياس: مشتاقتلج وللبنات ..
نجاة : والله حتى انه والبنات هم يسألن عليج دووم بس انتي ماعدج نقال بيش يخابرنج ويسالن …
ياس: غير ابوي مايرضى تدرين بي .. يوميه اظل اتوسل يكلي من تعرسين وترحين لبيت رجلج سوي اليعجبج بس هنا لا ماارضى …
نجاة: اكلج محلوة ..
ابتسمت ..
نجاة : والله صايرة تخلبين … ماعرستي ؟ ماانخطبتي ؟
ياس: لا مو هلتشوفيني مكابلة امي وكاعدة … مايبقلون الولد يكولون بعدج زغيرة …
نجاة : خايبة يازغيرة مو هاي انه بكدج وعدي ( ٣ ) جهال كل سنة احبل وهسه هم يريد بعد ..
صفنت عليها وهي تحجي وافكر شوف البنات حياتهن مستمرة وتمشي مامتوقفة مثلي … ومبين عليها مرتاحة وية رجلها لان تحجي بحماس وجاي تشجعني اعرس …
هي مستمرة تحجي وانه مستمرة بصفنتي ..
ماحسيت الا من كامن يردن يرحن ..
كمت طلعت وياهن انه وامي للحوش وصلناهن ويم الباب نجاة كرصتني ..
ياس : آخ ..
نجاة : ولج عيني باردة عليج شهالوجه .. الا ازوجج على ايدي …
.
.
.
.
بعد ماسلمن وراحن دخلنه انه وامي للبيت وكعدت يم الصوبة بالمطبخ وامي راحت تصلي …
صبيتلي استكانة جاي وكعدت اشربها واجت فهيمة كالت:
هاا ولج راحن؟
رفعت راسي باوعتلها وكتلها :
راحن …
فهيمة : شكالن بالله ماحاجنج ؟
ياس: شحاجني ؟
فهيمة : ماكالن المن جايات؟
ياس: شمدريني …
فهيمة: امداج 
ياس : ياا شمالج شكو؟.
فهيمة : خايبة لشوكت تظلين لاعلم لافهم .. صرتي شكبرج وشطولج اطول مني وانتي بلا عقل وكل شي ماتعرفين …
ياس: خايبة شكو ؟ غير تحجي وتخلصني …
فهيمة : خايبة شحجي عبالي بيج خير وعرفتي عليمن جايات .. عبالي جايات يخطبنج …
ياس: يااا … شوف حظي .. عبالي عدج شي بي خير ثاريج هم مطفية اكثر مني وجاية تحجين علي .. لا مااظن ماحجن شي يمكن جايات يشوفنه …
شربت جايي ورحت اصلي …
.
.
.
.
.
.
وره يومين ابوي وامي كالوا راح يرحون لبغداد ..
ابوي عده مراجعة لطبيب وامي تريد تروح تزور الكاظم سلام الله عليه ..
ياس: يمه عفية خل اروح وياكم ؟
امي: شعدج رايحة هو انه رايحين يومين والثالث نرجع ..
ياس: ميخالف يمه والله طكت روحي من الحبسة واريد اشوف بغداد بالله عفية يمه عفية فدوة 
..
..امي : خايبة شو ميلي خليني ادور الصبغ وينه ..
ياس: لا يمه عفيه
امي: وصمة .. كومي يالله صبغيلي شعري .. كومي ..
ياس: شعدج صابغة شعرج شني تردين تفرعين من تدخلين للامام …
امي: ياااا … دهر فرج كون خايبة حرام لايشور بيج .. دكومي كومي جيبي الطاسه والمشط وتعاي ..
ياس: والله ولااكوم .. هم ماترضين اروح وياكم هم تردين اصبغ شعرج ..
امي: خايبة شطولج تصيرين وانتي مثل الفروخ الزغار مجلبة وياي وين مااروح ..
ياس: خب شوف حظي هو انتي ليمته مطلعتني ..
امي: ديالله يالله بعد امج كومي بسرعة صبغيلي هالشيبات واكوي دشاديش ابوج يالله …
ياس: وتاخذيني؟
امي: الله واكبر عليج … كومي خلصيني عود هسه يجي ابوج وكليله مالي غرض ..
رحت اركض جبت الطاسة والمشط حتى اصبغ راس امي ..
صبغته وانه اغني وكل شوية اخذلي ركصة وهي تضحك علي وتكلي فضحتينه …
صبغت شعرها ورحت ركض طلعت جنطة زغيرة وحطيت بيها هدومي وظليت مكابله الكنتور محتاره شلبس لو ابوي كلي تمشين ويانه …
يارب كون يرضى يارب 
..
..وره الغده ابوي هم طلع دشايشة اكويهن اله …
ياس: يدلل الحلو ..
ابوي: اكويهن عدل بعد ابوج ..
ياس: صار … بس عدي شرط ..
ابوي: شرطيش ؟ لاتكولين اريد تليفون …
ياس: لا مو تليفون أيست من سالفة التليفون … بس اريد اروح وياكم انت وامي لبغداد …
ابوي: شعدج .. شتسوين رايحة قابل رايحين نتونس احنه … انه رايح للطبيب وامج تريد تزور ..
ياس: جا بوية انه وحد … هم انه اريد ازور …
بست ايده وظليت اتوسل :
والله ميته من الضوجة … والله طكت روحي من البيت والحبسة ..
ابوي: والجهال مو مسوية روحج مدرسة وتدرسينهم … ياهو يدرسهم من تروحين ..
ياس: بويه هن يومين قابل شكد راح نبقى ..والجهال شني قابل انه ماخذتهم مقاوله … لاماخذ منهم فلس ولاشي بعد شعدهم عدي .. زايد خير مني ادرسهم ..
سكت شوية وانه كاضة ايده وافرج بيها وامرخها على اساس رشوة حتى يقبل 
..
..ابوي: امشي .. جا بعد شكلج .. هو انتي ينكدر عليج …
كمت اكمز يم ابوي من الفرحة وبست صلعينته وهو يضحك ورحت لامي ركض :
يمممه … رجلج قبل .. قبل .. قبل ..
امي: عليمن ؟
ياس: اروح وياكم لبغداد 
.. طمطم طحطح ..
.. طمطم طحطح ..اركص واهوس وامي تضحك وتفر بيدها …
.
.
.
.
خلصت اليوم كله اكوي هدوم وارتب واعدل بالجنط ..
ماخليت شي مااخذته وياي ماجنهن يومين مدري تلاثه الراح نبقاهن هناك …
ماخليت جورية ورجلها ماخابرتهم من تليفون فهيمة ولاخليت بيت خالي ولابيت خالتي ولابيت عمي العشيرة كلها درت انه رايحة لبغداد …
غير جنت فرحانه .. اخيرا راح اطلع واسافر واروح لبغداد …
حتى بالليل مانمت من الفرحة …
اتذكرت من جنت جاهلة وجان يجي العيد ..
جنت احضر هدومي من الليل افرشهن عالفراش كلهن حتى الجواريب …
جنت اظل كاعدة للصبح من الفرحة عبالك اول مره اروح اعيد على اهلي وكرابتي …
بس يمكن لان جنت اريدهم يشوفون هدومي مال العيد واريد افل شعري على طوله واتدلع بي جدام بنات عمي وبنات خوالي …
جانت جورية اختي تكويلي شعري بالليل بالاوتي وشحده جان اليمد ايده على شعري ويجيسه غير اكلب الدنيا ..
اخاف تصير بي كسرة ويخرب …
واهم شي الجواريب ام الكركش ..
جنت اخذ عمامي وخوالي بيت بيت اروح اعيدهم .. واكعد بالليل احسب العيدية واصفطهن واضمهن عد امي …
واظل كل مااريد اشتري شي وامي ماتقبل اكللها مو عيديتي ظامتها عدج ههههه والله ايام ..
نفس الاحساس
نفس الشعور
نفس الفرحة هسه جاي احس بيها …
اول مره اروح لبغداد شينومني … شيصبرني لباجر …
كوه نمت .. ثاني يوم من غبشة الله امي كعدتني ..
كعدت كوه لان مانايمة بالليل ..
كبل رحت لدجاجاتي لميت البيض وسلمت عليهن بقن بس دجاجاتي مادرن بيه رايحة لبغداد ..
..صلينه واتريكنه واتوكلنه على الله 
…
…رغم الطريق بين المحافظات جوله وصحره مابي شي لامناظر حلو ولا بنايات بس ظليت كاعدة واباوع من الجامة ..
امي كاعدة يم ابوي كدام وانه كاعدة وره بحدي ..
جان ابوي حاط قران ..
حسيت روحي بديت انعس ومااريد انام حتى الطريق فرحانه بي رغم تعبه ..
ياس: بويه فدوة مو كافي قران ..
ابوي ضحك كال:
جا شتدرين ؟
ياس: طلعنه اغنية القران ينعس استغفر الله ..
امي : يااا دهر فرج كون ..
ياس: شبيج يمه شبيج كمزتي شكلت قابل ..
امي : اي مو تردين تكمزين وتتمركصين بالسيارة والوادام تتورج علينه .. عبالج كاعدة بالبيت وماخذه راحتج ..
ياس: يااا شمالني اتمركص ..
امي : اي خطيه سوي روحج فقيرة جدام ابوج ..
ابوي: لا شني تتمركص حتى احش رجليها حش ..
ياس: عمي بطلنه ياجلمة ردي لمجانج ..
رجعت اباوع من الجامة والف فكرة اتخيلت كدامي ..
عبالك رايحة للجنة ..
.
.
.
.
.
.
وصلنه لبغداد ومن كال ابوي وصلنه حسيت ماادري شحسيت فرحت فرحة مو طبيعية ..
رحنه للكاظمية كبل ..
نزلنه بفندق انه وامي بغرفة وابوي بغرفة ..
اول ماوصلنه دخلت سبحت ونمت …
كعدت المغرب .. كعدتني امي حتى نروح نصلي بالامام ..
كعدت ركض اتوضيت ولبست ربطتي وعباتي وجواريب ورحت اركض وره امي وابوي ..
امشي واباوع عالناس اويلييي شحلاتها بغداد ..
شوف الناس ..
شوف المحلات ..
شوف كبة ( قبة ) الامام من بعيد تشرح الكلب …
امي وابوي يمشون جدامي وكل شوية ابوي يلتفت يباوع علي ويشوفني ..
حسيته خايف علي ويباوع عالشباب اللي يمرون علينه شلون يباوعولي وهو يخزرهم ويدور يخزرني ..
اتمنيت اكله شبيك بوية تخزرني قابل الصوج مني همه بس يباوعون ..
اصلا ماكو شي مبين مني بس وجهي حتى جفوف ادية مدخلتهن جوه العباة …
رغم شكد جنت فرحانه ومتونسة بس حسيت هاي مو ديرتي وخفت .. يمكن لان مامتعودة اطلع واشوف ناس واشوف الدنيا شلون صايرة ..
خلصت سنيني مكابلة فهيمة وسلامة وفروخهن …
وين جنت انه عايشة ..
شوف البنات شلون حلوات شوف الناس كلها طالعة ..
يمكن بس احنه عدنه عيب البنية تطلع مادام مامتزوجه ..
لا يمكن بس امي وابوي هيج عدهم كل شي ممنوع ..
شيصير لو ابوي جاي هنا لبغداد مثل عمي ..
لو ابوي مثل عمي عاشكلة وحده بغدادية وجايبنه هنا..
..لا لا كش ..
كش ..
اسم الله انوب الزلمة يروح يتزوج على امي وحده بغدادية ويعوفنه ..
امداج ياسة حتى امنياتج مابيها خير خو انتي بيج خير اتزوجي واحد من اهل بغداد ..
اويلييي كون هيج حلو مثل الممثلين الاتراك وكذلته تهف على وجهه وين مايلتفت 
..
..دخلنه زرنه وصلينه وكعدنه شكددد بالامام حسيت براحة نفسية عجيبه …
هاي احلى نعمة عد اهل بغداد الامام يمهم كلما ضاكت صدورهم اجوا هنا يرتاحون ويفضفضون ويذبون حمولهم على الله واهل البيت …
فصول الرواية: 1 2