رواية القلب بالقلب الفصل الثالث عشر 13 بقلم روز الفياض – للقراءة المباشرة والتحميل pdf

كلما هربت منك وجدتك امامي …

مامن سبيل الى الهرب ..

ولكن لاتخف ..

فالعودة لاتعني الهزيمة والحب لايعني الضعف ..

.

.

.

اخذتلي بجيه مدري على طاسة الباجلا مدري لان شفته كدامي خفت ..

خفت من الرجعة وياه رغم متلوعه لان بعيده عنه بس مااريد ارجع ..

خليني بعيدة ومشتاقتله ولا قريبة ومتعذبة ..

بقى كاعد كبالي مبتسم لان ابجي ..

كرم: بالله مو عيب عليج تبجين على صحن باكلا ؟..

ياس: والله جنت مشتهيته ليش ذبيته حرام عليك ..

كرم : مو زين هسه اروح اجيبلج غيره عالاقل كبل من الجدر للبيت مو باقي بره يم الباب ساعة ..

مسحت عيوني كتله:

جيبلي بالفين ..

ضحك كال:

اول مره ادري بيج جوعيه ..

سكتت استحيت ..

كرم : حتى ماكلتي الحمدلله عالسلامة ..

ياس: هو انت اطيتنه فنتك .. كبل رحت تريد تهد على فلاح ..

كرم : هو انتي تنطين مجال كبل لكيتج كاعدة وره الباب مفشخة ومدمايه وطاستج بيدج ..

ياس: ايبباااخ .. كلش تضحك .. شعدك اجيت؟

باوعلي وخزرني كلي:

ليش؟ ماترديني اجي؟ اعتبريني خطار ..

اكو واحد يكول للخطار شعندك جاي؟

اجيت اشوف مرتي … اكو مشكلة؟

باوعتله كتله:

اي اكو … من شوكت هالمحبة؟

كرم : من اول نظره هههه ..

مارديت عليه كال:

مبين مرتاحة هنا؟

ياس: طبعا مرتاحة غير رجعت لبيتي .. بيت ابوي ..

كرم: وهناك مجان بيتج؟ لو مجان بيت ابوج؟

ياس: لاتكولني حجي ماكايلته ..

كرم: زين … انتي بالله كوليلي من شنو ارتاحيتي هنا؟

ياس: هواي اشياء لامغثة لاحجاية تكسر الخاطر .. ولااحس وجودي ماله داعي ..

كرم: ومنو كلج وجودج ماله داعي ..

ياس: خرب كرم .. لاتخبلني ..لاعبالك جاي تضحك على بحجايتين … كرم تره انه مليت والله وتعبت هاي مو حياة مو عيشة لاحجاية لاكعدة لاسالفة … اصلا انه مااعتبر نفسي متزوجة ..

كلي بنبرة مستفزة :

اعتبر هاي الجملة مطالبة بحقوقج الزوجية ؟

صدمتني جملته بس حسيتها اهانة كتله:

متنازلة عن كللللل حقوقي لو اريد الحقوق الي براسك جان مااتحملتك لهسه ..

كرم: عاد انتي حره بنفسج بس اني رجال مااحب اتنازل عن اي حق من حقوقي ..

ردت ارد وافشلة بس اندك الباب ودخل ابوي …

من شفت ابوي واخواني رجعوا طلعت وعفته بس جنت افور ..

المغرب صليت وانه افكر شلون ؟ شسوي هسه حتى ماارجع وياه؟ شنو الحل؟

خلصت صلاتي ورحت لامي جانت كاعدة تصلي بغرفتها ..

انتجيت عالبوفية مالتها وكعدت اباوعلها وانه محتارة شلون ابدي بالموضوع ..

توها امي خلصت صلاتها دخلت علينه جورية اختي ..

امي: هاا يمه شعدج؟

جورية : ماكو شي يمه بس امير كال كرم جاي كتله جا نرجع لاهلي نشوفه وهم اشوف ياسه خاف جاي ياخذها ..

امي: اي خوش ..

جورية: جا شبسرعة اجه وراج مالحكنه نشوفج … شني بس (٣) ايام وانتي هاي اول مره تجين من عرسج ..

ياس: انه مااريد ارجع وياه ..

امي: لا شني ماتردين وياه شني يظل يوميه رايح راجع عليج ..

ياس: يمه انه جنت مخنوكه هناك ..

امي: شمالج مخنوكه اسم الله ؟

ياس: يمه مااريده ..

كرصتني جورية من رجلي حتى مااحجي بس انه جنت اريد احجي خاف اسوي بروحي شي ..

امي: شني هالحجي هذا عيب ماكو وحده متربية تكول مااريد رجلي … شناقصج شمقصر وياج كولي واحنه نتفاهم وياه وهو يتعدل مو تكولين مااريده ..

ياس: يمه يايتعدل مايتعدل هذا … مو صاحي مخبل ..

امي: شبي مخبل يكتلج .. جايج سكران؟ غير تفهمينه ..

سكتتني جورية وهي حجت :

يمه الولد ماادري شبي من يوم العرسوا وهو ماطايقها … بس جم مره متدنيلها ..

امي دارت علي وكلتلي بعصبية:

شني هاللعب هذا وليش ماحجيتي من الاول حتى نفتهم شبي وياج؟

ياس: هو انه هسه مو جاي احجي وانتي ماترضين ..

امي: هذا الحجي مايطلع بره هاي الغرفة والتحجي اكص لسانها …

جورية: يمه محد يدري بس انه حتى لبيت عمي ماحاجيه هي مو صدك ولج؟

ياس: اي والله ماحاجيه لاحد ابد ..

امي: احجيلي شبي وياج ..

كعدت حجيت لامي التفاصيل وامي ساعة تزفني وساعة تصفن وساعة تسكت ..

آخر شي وصلت من كلي مرات اشوفج بذيج الغرفة شكلج يخوف امي كالت:

دخيلك ياعلي .. شنهي انوب هذا ..

جورية: يااا خايبة خاف احد مسويلة عمل ..

امي: استغفر الله .. لايمه لا لاتحطين براسها هذا الحجي هو ياهو وياها بالبيت حتى يسويله عمل هي بس امه وهي الخطبتها والمره شايلتها على جفوف الراحة … شلون تسوي لابنها عمل وين اكو ام تسوي لابنها عمل؟

جورية: والله يمه هذول اليمنه ابنهم هيج جان واحتاروا بي تالي ماتالي طلعت امه مسويتله عمل حتى مايريد مرته ويطلكها .. بس هو صدك طلكها يالله ارتاح يكول جنت اشوفها خنزير …

امي: كش .. فال الله ولافالج دجيبلج طاري بي خير …

ياس: انعم الله عليج طلعتيني خنزير .

جورية: خايبة والله احجي صدك انه شمالج تتمضحكين .. اذا ماطلع اكو عمل مدفون بغرفتكم ..

ياس: خايبه مو بس بالغرفة هو يشوفني هيج حتى مرات من نكعد جوه هم يكمز من يشوفني .. بس مو مثل ما فوك اصلا ينهزم من الغرفة ولايدخللها …

امي: هاي عمله وعلي … كلنه عرست والولد خوش ولد ومدللها وامه زينه وتحبها وعمها مداريها وماعدها احد بالبيت انوب اول ماردت علينه ردت ووياها سالفه هاكبرها ..

ياس: جا هو بكيفي ..

امي: جا من عبنج لهسه لاحبلتي لابيج فرخ ..

ياس: جا منين يجي الفرخ اذا الديج مهزوم ..

جورية:

.

.

.

.

بليلتها ابوي صاحلي وسألني لان امي حاجيتله كلي:

بويه هذا الحجي جبير ويهجم بيوت … لاتحجينه لاحد حتى لرجلج نفسه لاتحجين كبل مانتأكد ..

ياس: شلون نتأكد يابوية منو كال هالحجي صدك ..

ابوي: جا بوية غير انتي تكولين هيج كايلج .. هذا الحجي ماله غير هالمعنى ..

امي: من تردين فتشي غرفتج ..

ياس: يمه مااريد ارد انه مايردني والله مايردني يكلي انفرضتي علي ..

ابوي: لاااا ماكو بت تزعل عدي الزلمة جاي وراج مناك لهنا كون مايريدج المن اجه وراج؟

حتى اسبوع ماكملتي …والمن ماخذج كون مايريدج المن خطبج ؟

ياس: اي يكلي انفرضتي علي .. يعني اهله جابرينه ..

ابوي: لاا مو صحيح عمج من حجه وياي كال كرم شاف ياسه وحاجانه عليها واحنه ماجنه نريده يتزوج هسه لان تعب بذاك زواجه كلنه يرتاح فترة وبعدين نزوجه بس مادام عجبته ياسه بعد احسن هي بت عمه وتتحمله …

صفنت على كلمة تتحمله بعدين كتله:

شااتحمله يابوية والله راح يموتني لاسالفة لاحجاية لاضحكة راح يخبلني .. مااروح .. مااروح ..

زمخ علي ابوي:

تروحين وانتي ساكته وممنونه .. رجلج تتحملينه وهاي السالفة الحجيتيها ماتطلع لاحد واحنه عود نشوف شنسوي حتى نحلها … افتهمتي …

صبت دموعي امي من شافتني بجيت كالت:

كل عرس بي مشاكل اشكال والوان هاي جورية اختج مو هالتشوفينها متحمله وساكته ولافد يوم اجت واشتكت لو زعلت جا شمالج انتي ..

بعد هالحجي من امي وابوي ظليت بغرفتي ماطلعت منها حتى لعشه ..

وره العشة اجت امي كالت:

كومي حطيلج مندرين هنا الج ولرجلج خاف تعبان ويريد يرتاح ..

ياس: شسوي بالمندرين واحد كافي عليه وفرشوله بالديوانية ..

امي: خايبة صيري ادمية ولاتخليني اصيح لابوج عليج وهو يعرف شغله وياج … هنا ينام يم مرته فرشي مندرين الج واله خوما تنامين عالجرباية وهو بالكاع …

ياس: اهووو هذا منين طلعلي عرس الاسود كون ..

مو جنتي كاعدة ومرتاحه احسنلج هيج مشلوع كلبج وطايح حظج مدري مخبل مدري يريد يخبلني ..

افرش وادردم ..

سمعت الباب انفتح درت لامي كتلها:

والله اذا ضوجني الا احط براسه جيله ..

امي جانت واكفة تضحك ويمها كرم واكف مبتسم ..

امي: هاا خلصتي دردمة؟

طلعت امي وهي تضحك وسدت الباب ..

كعد هو على فراشة طلع باكيت الجكاير خلاه يمه واتمدد ..

كرم: ايي ؟ ست ياس منو هذا التردين تحطين براسه جيله بالله ؟

ياس: لاتكلي ياس ..

كرم: شسمج انتي مو ياس؟

سكتت هو اسمي المصخم بعد شكول ..

كمت على جربايتي اتمددت واطيته ظهري ..

كرم : زين عالاقل طفي اللايت …

توني كمت اريد اطفي اللايت طفت الكهرباء كتله:

هاي طفت الكهرباء ..

بقيت واكفة بمكاني اخاف امشي واطيح ظلمة ..

بقينه ساكتين سنطه وظلمة متانين احد يشغل المولد بس ماكو ..

آخر شي سمعت مصعب صاح من وره البيت :

ماترضه تشتغل .. كرم اليوم رجله خضره …

ضحكت من كل كلبي بس هو ساكت ..

فجأة حسيت بي يمكن اتدنه يمي .. كشيت ..

ماحسيت الا حضني ..

ياس: شكو؟

كرم: ماكو .. سلامتج ..

ياس: لا وخر عفية .. كرم وخر ..

كرم: اششش ..

ياس: كرم وخر عاد لاتخليني اصيح ويسمعوني …

رأسا ابتعد ..

رجع لمكانه وانه هم حسيت اتنرفزت وبديت ادوس ماادري وين اريد ارجع لمكاني ..

فجأة دست على رجله واتكربحت بس هو كمز وصاح:

آآخ ..

ياس: خرب حظي ..

ظليت اتلمس الفراش اريد اوصله ..

كرم: خرب يومج كسرتي رجلي ..

ياس: صدك انكسرت؟

لزمت ايده لزمني وسحبني كلي:

كعدي هنا لتتحركين الا تنكسر رجلج لو تكسرين بيه عظم يالله …

ياس: صدك انكسرت رجلك؟

كرم: بالله لو مكسورة رجلي اكعد اسولف وياج بهالهدوء؟

ياس: ماادري ماكاسرة رجل احد قبلك ..

سكتنه ..

اتدنيت خليت راسي على مخدتي ووجهي اله ..

مااشوفه بس وجوده يمي وصوته من يحجي وهو هادئ وراضي ومرتاح كافي عندي ..

كرم : نمتي ؟

ياس: لاء ..شكو؟

اجه يمي حضني .. جنت اتمنى هاللحظات بس خوفي من الصدمة بعد كل فرحة وتفاهم بينه يخليني ارفض واكش ومااكدر اتقبله ..

ياس: وبعدين؟

كرم : شبيج؟

ياس: كل مره ينتهي هالموضوع بمشكلة اكبر من القبلها مامليت كرم .. مالعبت روحك من هالحالة ؟

حاول يبوسني بس دفعته ..

ياس: لا تتجاهلني من احجي وياك ..لاتخبلني ..

كرم: مااتجاهلج بس انطيني مجال .. انطيني فرصة ..

ياس: مجال لشنو؟ تريد تسألني هالمره عن فلاح المنغولي خاف عندي وياه شي؟ هاي الفرصة اللي تريدها يالله اسأل براحتك اسمعك .. بدون هالتمثيلية ..

اتنهد وسكت بعدين كلي:

اكو شغلات متنحجي .. مااكدر احجيلجياها ..

ياس: ليش بالله؟

كرم: هيج .. ماتنحجي مو كل شي نكدر نحجيه افتهمتي ؟

ياس: لااء والله ماافتهمت ..

رجع كعد وخله وجه بوجهي كلي بهدوء:

تعباان .. حسي بيه ..

كتله وانه الهث من التعب والعصبية :

هو منو اليحس بالثاني اذا هذا كله وتكلي حسي بيه …

كرم: ادري تعبتج .. وادري تحملتيني هوايه والله موبيدي ..

مرات من اشوفج ماادري شيصير بيه شكلج مو نفسه … ومرات لا .. انتي ياستي وزوجتي الشفتها واختاريتها ..

ياس: بس ماحبيتها … مو صح ..

كرم : ياسه … اني اتزوجت قبلج عن حب ..يعني زوجتي اللي قبلج جانت تربطني بيها علاقة حب قبل الزواج ..لكن هالزواج اذاني اكثر مما تتصورين … لذلك خلينه نكول اختلف مفهوم الحب عندي … افتهمتي؟

ياس: هو انت شحجيت حتى افتهم .. اذا انت تعبان انه ميته من التعب خليها ابالك والله مرت علي لحظات فكرت اسوي بروحي شي واخلص منك ومن قهرك ..

ظل يتلمس بخدودي كلي:

حبي الج مختلف مو مثل الحب اللي ابالج …

اتحنطت وصفنت بالظلمة افكر كال اللي سمعته لو انه اتخيل …

كرم: ياسه ؟

بقيت ساكته محتارة يحجي صدك لو يضحك علي ويلعب علي مثل كل مره ..

كرم: احجيلج شي …

ياس: شحجي ؟…

طاحت دموعي بالظلمة …

كرم: كولي اي شي ..

ياس:ماعندي شي اكوله ..

كرم: كولي احبك .. كولي راح اتحملك … كولي راح اصبر وياك واتحمل وضعك ..

ياس: مااكدر … مااكدر .. احبك اي احبك والكلمة منك ممكن ترفعني لسابع سمه لو تنزلني لسابع كاع بس وضعك صعب علي كرم مااكدر افتهم انت شتريد مني … تريد صدك تعيش وياي زوج وزوجه لو تريد مثل وضعنه نمثل كدام اهلك واهلي والناس كل شي طبيعي ومتفاهمين وماكو كل مشكلة ..

خله راسه يم راسي واتنهد وكلي:

طبعا اريد نعيش زوج وزوجة حالنه حال الناس … بس هالشي مايجي بسهولة وياي .. يعني راح اتعبج ..

ياس: اكثر من هالتعب ؟ اي زين ريحني وكلي ليش؟ ليش اتعبني ؟ احجي حتى اتفهم وضعك واعرف شبيك ومااقصر وياك .. شلون اقبل على شي انه مااعرفه ؟

كرم: انتي تحبيني؟ اذا تحبيني متحتاجين تعرفين شي اذا تحبيني صدووك انتي من نفسج راح تتحملين وتصبرين ..

ظليت ابجي حسيت نفسي بلغز اخاف اقبل واتورط وارجع للقهر والضيم واخاف ارفض واتندم ..

وضميري يظل يأنبني لان مارجعت وياه ..

شلون بيج ياسة ..

شلون بيج رجل بالجنه ورجل بالنار ..

كرم: لتبجين ..

حضني وبجيت واحس وراي قهر بعد ماادري شضاملي كرم بعد ولاادري الدنيا شضامتلي ..

ياس: ماابجي … اصلا حتى لو ماقبلت غبصن علي لازم ارجع حتى لو مااريد وحتى لو انت ماتريد .. هذا حظي الاسود وقسمتي ..

هي ورطة ومدري انه الاتورطت مدري انت ..

باس كصتي كلي:

احلى ورطة ..

ضحكت من قهري ..

كرم: مو صح؟

ياس: مو هو انت ماتحبني عدك عادي … لاتنقهر ولاتتعب ..

كتله وانه اناشغ واشهك ..

كرم: انتي ليش متفتهمين؟

ياس: شأفتهم ؟

كرم: يعني ماحسيتي بلحظة بحبي الج الا اكول واحجي يعني ..

سكتت شوية بعدني تحت تأثير الصدمة ..

كرم: انتي بعدج زغيرة واكيد جنتي تفكرين تتزوجين واحد رومانسي ويسمعج كلام حلو من الصبح لليل ..

ابتسمت عجبني الحجي وكتله:

وحلو مثل الاتراك ولزكة كلما اطرده يرجعلي ..

ضحك كلي:

اني احبج بطريقتي احبج حتى لو ماكلت هالكلمة يومية افتهمي عاد .. يمكن اني لان عندي تجربة سابقة ويمكن لان عمري اكبر منج ب( ١٤ ) سنة هالشي يخليني ابين بارد او مو رومانسي ..

ياس: لا ماتحبني ..

كرم: وبعدين … هسه بابا والله احبج والله ..

ياس: لاجذب

كرم : استغفر الله العظيم … شسوي يعني حتى تصدكين احبج ..

ياس: مصدكه بس اريدك تعيدها كل شوية حتى اشبع منها ..

ضحك على كيف وكلي:

احب تصرفاتج عفويتج .. عيونج ..

سوالفج ..

بس اكو شغلة مااحبها ..

كعدت على حيلي وربعت كتله:

شنو؟

كال :

امداني وامده حظي …

خربت من الضحك …

ياس: هسه خلينه نرجع لموضوعنه ..

كرم: رجعي ..

ياس: تحبني ..

كرم : ههههههه هاي شيفضها بالله

ياس: شمالك خلكك ضيك .. غير جنت مسوي عدي جفاف كل هالسنين وانت مسودني ماتشوف فلاح المنغولي ركض وراي عباله هم مخبلة ..

كرم: ..

.

.

.

.

نام وهو حاضني …

اول مره احس روحي محظوظه …

اول مره اعرف شكد احبه …

ماادري شعوري صح لو احنه النسوان ينضحك علينه بكلمة ..

رغم مالحكت اشبع من اهلي بس حجيه اليوم كسر عيني خلالني انقهر عليه ..

يمكن فعلا محتاجني …

يمكن عنده مشكلة ويخجل يحجيها ..

بس مادام كلي احبج .. معناها اكو تطور بطبيعة علاقتنه ..

مادام اتنازل وحجه معناها يحبني صدك ..

نمت مرتاحه ..

والصبح كعدت من الصبح وبقيت اباوع لوجهه وهو نايم ..

شكد احبك ..

…………………………

.

تفز انته واموت انه …

تفز من نومتك حليان

وانه عيوني ذبلانه …