رواية القلب بالقلب الفصل التاسع 9 بقلم روز الفياض
هل جربت ان تكون في موقف محب من طرف واحد؟
هل كنت يوما في مثل موقفي؟ ..
هل جربتم الحب من طرف واحد؟..
انه ليس حب فقط ..
انه وجع ..
وجع من طرف واحد …
………………………….
مااصعب ان تحب انسان بكل ذرة من كيانك وتتفاجأ بأنه لايبادلك نفس المشاعر …
تحب سكوته وبروده تحب جموحه وثورانه ..
تحب كل تقاسيم وجهه وكل نظرة والتفاته ..
تحبه رغم وجع وجوده في حياتك ..
هكذا انا احببت رجلا لايراني ..
رجلا تساوى لديه بقائي ورحيلي ..
تساوى لديه وجودي وعدمه ..
تساوى لديه حبي وكرهي …
حاولت ان اكرهه … ولكن هيهات …
كيف اكرهه؟..
وهو الرجل الاول واللمسة الاولى والنظرة الاولى واحلى واجمل واول القبل ..
وسأبقى احبه مهما حصل …
احبك ..
احبك ..
احبك ..
مهما حصل 
..
..……………………………..
وبدا ينام بره بالصاله الفوك ..
يوميه بالليل ياخذ مندر يفرشة بالصالة كبال غرفتنه وينام …
هو ينام وانه اظل فاتحة باب الغرفة واباوعله ..
اباوعله شلون نام .. شلون غفه ..
مرات اتمنى اكدر اروح وانا بحضنه …
شيصير لو رحت شلت الغطا واتغطيت وياه وحضنته ونمت …
شيصير لو اتنازل شوية عن كبريائي وكرامتي واجرب يمكن .. يمكن يحس لو يصير شي يخليه يتغير .. يحن ..
شيصير ..؟
واتنازلت ورحت امشي على اطراف اصابعي من شفته نام …
ووصلت يمه وظليت واكفة كباله وباوعله شلون غافي …
ظليت متحنطه لاكدرت ارجع لغرفتي ولاكدرت اكعده …
ظليت اباوعله واحاجيه بكلبي ..
شيصير لو حبيتني ؟
شيصير لو تغلط مره وتمثل علي تحبني .. لو يوم واحد يشفعلك عندي ..
روحي ياسه رجعي لغرفتج بسرعة كبل لايكعد ..
بس مااطاني كلبي اروح ..
رجليه جامده ماكدرت اتحرك كعدت كباله ودموعي خانكتني ..
لو بس اعرف شبيك ؟
لو بس اعرف العيب والصوج بيه لو بيك ؟ لو هيج من الله ..
لو بس الله يهديك تشوفني وتحجيلي شكو بكلبك …
جريت حسرة جبيرة ودنكت خليت راسي بين رجلية ماادري شلون اتصرف ..
كمزت حسيت شي دبه على رجلي نزيت .. باوعت شفته فاتح عيونه ويباوعلي ..
ولازم رجلي ..
ردت اكوم كلي:
شبيج ياسه؟
اسلوبه البارد او المااعرف اسميه شنو يخليني احتار شجاوبه …
كرم : حلمانه؟
طاحت دموعي … اطاني عذر …
مثل المجدي اجديلي منه عذر حتى انام بحضنه …
انام بحضنه انسى كل شي ..
انسى المشاكل الماعرف سببها بينه ..
انسى حزني وحزنه وكآبتي وكآبته وانسى حتى هو مايحبني ..
انسى اني مفروضه عليه ..
انسى كل شي ويبقى بس هو وحبي اله ..
هزيت راسي اي ..
رفعلي اللحاف واشرلي بعيونه تعاي …
مافكرت لابكرامة ولابكبرياء ولا بغلط ولابصح ولابسبب ..
فكرت بس انام ..
يمكن ..
يمكن … الصبح الكه كل شي محلول ومنتهي …
خليت راسي بصدره بدون كلام وغمضت عيوني ..
راسي على ايده ..
حسيت بي كأنما يريد يحضني بس متردد ..
ماخجلت .. حضنته ..
زوجي ..
من حقي ..
بس ماحضني …
بقت دموعي تنزل وامسحها بدون صوت وهو جان كاعد بس مغمض عيونه ..
جنت اسمع حسراته واكول تهون المهم الليلة ..
آخر شي يمكن مل يمكن تعب يمكن انقهر علي ويمكن حس كلي:
ياسه؟
ماجاوبته ..
رفع وجهي بيده وكلي:
شبيج؟
هزيت راسي ماكو شي ..
كرم : ياسه؟ باوعيلي ..
ماكدرت … اعرف روحي ابجي واخاف اعاتبه واعرف روحي مشهورة مااعرف احجي واعاتب بصوت ناصي انفعل مو بيدي ..
باس راسي …
ماصدكت .. بس بهاللحظه حسيته كسرني .. مو ياسة القديمة .. اول تالي انه ابجي ..
اول تالي اجلب بشي مو الي …
اول تالي احب واحد ومو اي واحد لارايدني ولاشايفني ويجرحني باليوم الف مره بكل كلمة ونظرة وتصرف …
حسيته كأنما يريد يقشمرني بهالبوسة .. يريد يسكتني ..
يريد يعتذر بس مو لان ندمان لااا جان يكلي مو بيدي ..
اتحملي ..
صبري …
مابيدي شي اسويلجياه ..
حضني حيل وخلاني بجيت حيل كتله :
ليش انه متمسكة بيك وانت بايعني؟ ليش؟
كرم : اششششش .. نامي .. كافي بجي ورجاءا لاتفتحين هالموضوع لان ماعندي اجابات …
رفعت راسي باوعتله كتله:
زين شسوي؟ وين اروح ؟ المن اطي وجهي ويكلي شبيك؟
مد ايده على شعري يوخره من وجهي وباس خدي وكلي:
لاتسوين شي … ومايحتاج تسألين احد عني لان محد راح يكلج شي …
ياس: وتالي ؟ وتالي وياك موتتني .. والله مخنوكه ..والله .. ماكو هوا … هذا صدري مابي هوا …
ضربت صدري بيدي ..
اتحسر حيل ولزم ايدي باسها وكلي:
صبري … اتحملي …
ماحجيت بعد مايفيد الحجي ..
درت وجهي ردت اكوم كلي:
الخلل مو بيج … يمكن الخلل بيه اني … من ينسد علي باب وياج ماادري …
وسكت …
عفته ورجعت لغرفتي وسديت الباب وخلصتها لحد فجر الله بجي ..
بس هم مااطاني كلبي …
جنت اطل عليه من فتحت مفتاح الباب واشوفه كاعد عالكرسي بالصاله ويدخن ..
جكارة وره جكارة هو محترك وانه محتركه …
.
.
.
.
يومية الفجر جنت اكعد اصلي وبعد مااصلي اكعده حتى يكعد يصلي واركض الم فراشة كبل لاتشوفه عمتي لو جوانا وتكل لعمي وتصير سالفة وقصة وينزل يتريك ويروح لشغلة طبيعي ولا كأنه اكو شي وانه هم اتصرف مثله ..
لحد ذيج الليلة …
بعدما حجيت وياه وبقينه كاعدين الصبح ماصلى ..
استغربت بس ماحجيت ..
نزلت شفت جوانا اذا حضرتله الريوك وصعدت حتى اشوفه لان تأخر …
انصدمت من دخلت للغرفة …
جان واكف يطلع هدومه من الكنتور وياخذهن للغرفة الثانية …
ظليت واكفه اباوعله ماادري شكو وشجاي يسوي بعدين كتله:
شتسوي؟
كرم : مااسوي … اخلي ملابسي بالغرفة الثانية ..
ياس: ليش؟
بقى شوية ساكت بس بعدين كال :
احسن ….
مااكدر كلما اريد حاجه ادخل لهاي الغرفة …
ظليت واكفة متحنطه … ماادري شجاي يصير …
ياس: هسه غير تفهمني شكو؟ شصاير؟
دار علي كلي :
ماصاير شي … اروح بذيج الغرفة احسن …
بالبداية انقهرت .. كلما جايها تضيك علي الدنيا ماادري شكو والفرج ماكو …
راح يصيرلي سنة على هاي الحال متحمله وساكته واشتكي لله ..
واكول الحمدلله عالاقل محد يدري .. بس هسه لااا
ياس: هسه لااا
كرم : شنو؟
ياس: لااا ماتروح هناك … مصختها … كافي كرم اذا مو لخاطري لخاطر عمي وعمتي … ادري مالي خاطر ومتحمل وحاطه نع…. بحلكي وساكته … اكول الحمدلله محد يدري بالجاي يصير بينه بس كافي لخاطر الله كافي لاتزيد النار حطب علي مالي حيل … والله مالي حيل … لاتخليني حجوه بحلك شمات … عفيه لخاطري .. لخاطر الله عوفهن …
ابقى نام بالصالة براحتك ..اصلا اتعودت معتبره نفسي مامتزوجه بس كل هذا متحملته حتى لاتصير مشاكل واكول لعل وعسى … بس اذا اخذت هدومك هناك راح يعرفون .. كلهم راح يعرفون … وماراح تستفاد شي بس مشاكل بينك وبين عمي ومشاكل اكبر بيني وبين ابوي وامي …
كافي حرام عليك انه هم روح .. هم بشر ..
كافي كسرت بختي ..
هسه هم جاي تكسرني كدام اليسوه والمايسوه من كلها تدري انت مارايدني ولاتحبني …
المصيبه لا حتى لو اشتكي محد راح ينصفني .. اولهم ابوي يرجعني مثل الجلبة الك …
ومااراح احصل بس الحجي واللوم والشماته …
فدوة كافي والله تعبت والله …
ظل ساكت وداير وجهه …
بقى واكف وانه واكفه كباله ومجلبه بأيده ..
ياس: انه احظرلك هدومك من الليل شنو تريد شنو تحتاج اخليهن الك هناك الصبح بدل هناك واطلع مااخليك تشوف وجهي ولا راح اضايقك بس لخاطري لاتسوي هيج …
شمر الهدوم بالكاع وطلع …
جنت كلما اكول وصلت لمرحلة بعد تشبعت من سوالف كرم وقهره وبعد ماابجي جان يسوي شي جديد يبجيني على زماني …
.
.
.
.
يمشي العمر بيه وانه مقاومة ..
وكرم مثلما هو ويزيد ..
دخلنه بالسنة الثانية ولا حمل .. ولا تطور .. ولا كرم متحسن وياي …
وماادري شسوي ..
جنت ادوس على نفسي وعلى مشاعري وعلى كلبي وانه اشوفه يومية يعبر على باب غرفتي عبالك غريب …
اسأل نفسي مرات معقولة محد حاس بالوضع ؟
معقولة محد منتبه لتمثيلنه؟ …
معقولة محد عرف بي ماينام بالغرفة؟
يالله مو مهم …
بكل الحالات محد راح يهتم ومحد راح يحجي كلها تغلس مادام انه ساكته …
بس لشوكت اسكت …
بيوم من الايام جنت كاعدة يم انى حماتي الزغيرة بغرفتها وجانت تدرس كيميا وانه اقرا وياها من باب الفضول …
جنت من اشوفها تكعد تقرا اجي اكعد يمها واقرا .. الهي روحي من التفكير والقهر ..
بالليل خابرتني جورية اختي وسولفنه شوية الى ان وصلنه لكرم واخباري :
على حطة ايدج .. شيصير يعني صار سنتين ماكو كل فرق هسه بيوم وليلة يتغير ..
جورية : اووف على حظج ياياسة منين اجاج هالكرم ؟
ياس: جورية اكلج انه جاي افكر بشي واريد اكلج عليه شتكولين بالله ؟
جورية : دكولي بالاول غير اعرف شنو هو الشي؟
ياس: يااا جا انه ماكلت … يامصيوبه ياياسه على هالعملة … اي عود اريد ارجع للمدرسة ..
جورية: يااا شيرجعج … شطولج شعرضج ترجعين ويه الفروخ الزغار؟
ياس: لا لا … لا مااروح للمدرسة اريد ادرس خارجي يعني ادرس وانه كاعدة بالبيت ومن تخلص السنة اروح بس امتحن ..
جورية : ورجلج ؟
ياس: هو وينه رجلي يدري بيه وين الله حاطني …
جورية: جا شلون تطلعين بدون علمه؟
ياس: لا هو اول وتالي بعد لازم اكله … عالاقل استفيد بدل ماكاعدة طول النهار بحدي وباقي اليوم اطحن بروحي .. راح يصير بيه سكر من القهر ..
جورية: اسم الله … وينج ووين السكر … هم حظج هذا .. شكلج ياياسه اذا يقبل رجلج ادرسي احسنلج واستفادي لاتظلين مثلي تلتهين بالرجل والجهال وتنسين روحج … عيشي حياتج وعوفيه .. لاتفكرين بي انسيه جنه ماموجود هو لابد يرجعلج بيوم … استغلي وجودج هناك وسوي كل التتمنينه مادام هو قابل كل الممنوع عد ابوج لاتضيعين شبابج وعمرج وانتي مامحصله المشيتين …
هذا الكلام اللي غير تفكيري ..
غير حياتي ..
وخلاني افكر بنفسي ..
احطلي اهداف بحياتي ..
حياتي مالازم تتوقف على كرم …
لا مثل ماكالت جورية لازم استغل الوضع واحقق الاتمناه ..
.
.
.
ظليت يومين افكر بالموضوع ومحتارة شلون افتح الموضوع وياه …
انتظرته بالليل يرجع واحجي وياه ..
سبحت وكشخت واتعطرت وكعدت جوه ويه عمي وعمتي واهز برجلي من التوتر …
عمي: ياسه بابا شبيج؟
ياسه: مابيه شي بس مو جنه كرم اتأخر ..
عمتي: لا ماتأخر هذا وقته مثل يومية هسه يجوز بالطريق بس يجوز انتي مشتاقتله اليوم هههه …
ابتسمتلها جذب وانه صدك الشوك ذابحني بس كطعت الامل منه ..
كافي سنتين حتى الضحك نسيته اخلص نهاري اسوي شكو حاجه يحبها مااخلي جوانا تسويله وانه موجوده ..
سنتين حتى لاهلي مارحت مايطيني كلبي اعوفه واروح ..
نايم بره الغرفة بس هم قابله ..
المهم موجود ويمي ..
المهم ارفع راسي من المخده اشوفه كبالي نايم ..
خدمته وانه الممنونه ..
اخذ هدومة للغسالة واتحسر على ريحته وريحة عطرة ..
اكويهن وارشهن عطر رش ..
اعلكهن بغرفتي اشبع منهن شوف واتخيله لابسهن …
قبل لا اوديهن للغرفة الثانية ..
حتى احته ريم واخوه رضا ومرته جم مره سألوني:
متضوجين ياسه من كعدة البيت؟
ليش متكولين لكرم يطلعج؟
مادام ماعدكم طفل يربطكم طلعوا عيشوا … ليش متسافرون ؟
وجنت اكللهم :
مشغول … كرم ماعنده مجال عنده شغل ومايكدر يعوف المختبر ..
جنت اشوف بعيون الكل اسأله انه المفروض اسألها الهم ..
ماظليت اضحك ..
ماظليت اتشاقه …
المهم اكل روحي اكل …
جنت اشوف اخوه شلون مهتم بمرته وجهاله وجنت اسأل روحي معقولة هم مثلنه بس كدام الناس هذا ضحكهم وحجيهم ؟
جنت اشوف اخته من تجينه كل شوية يتصل بيها رجلها يسال عنها ويشوفها خاف محتاجه شي …
جنت اشوف عمي يسأل عمتي مرات اذا ضايجه وحابه تطلع حتى يفرغ نفسه الها ويطلعها …
بس هسه خلص …
اريد افكر بشي ثاني غير كرم .. وحياة كرم وغموض كرم وبروده …
اريد افكر بشي ايجابي …
اريد افكر اسوي شي الي .. لنفسي .. لمستقبلي …
من حقي ..
وره نص ساعة اجه ..
طلعت للحديقة استقبله .. نزل من السيارة ابتسملي كلي:
شعندج اليوم مستقبلتني هنا؟
هم انه ابتسمتله كتله :
اريد احجي وياك ..
كرم : ومايصير نحجي جوه؟
ياس: لايصير بس انت تتعشه وتنام ماالحك اشوفك واحجي وياك …
كرم : يالله يابه كولي شعندج؟
ياس: يعني اكول بدل كعدتي بالبيت بدون فايدة من الصبح لليل وحياتي فارغة اريد التهي بشي استفيد من وقت الفراغ ..
باوعلي بنظره مافهمت شنو معناها بس غلست وكملت كتله:
اريد ادرس خارجي شتكول؟ مو احسن؟
بقى يباوعلي شوية بعدين اتدنه علي حيل باس راسي وكلي:
طبعا احسن ..
عافني ودخل للبيت ..
خلاني صافنه ومرتبكة مابين البوسه الغير متوقعة ومابين كلامه المافهمت منه هل هو موافق لو لا …
دخلت وراه شفته واكف يسولف ويه عمي وعمتي شوية وصعد يبدل ويغسل …
فكرت اصعد وراه بس اترددت بقيت واكفه جوه يم الدرج لحدما نزل شافني كلي بنص ابتسامة:
شبيج مخبوصه وحايرة؟
ياس: لا مو حايرة عليمن حايرة الله لايحير عبده بس انه اريد افتهم اعرف رأيك بالضبط شنو موافق لو لا؟
لزم ايدي وباوعلها كلي:
اول شي وين حلقتج؟
فاجأني بس كتله:
فوك ..
كرم : اذا تردين تدرسين وتداومين لازم متنزعيها حتى لو بالبيت هذا اول شرط عندي ..
فهمت من حجيه موافق ..
لاشعوريا كمزت وحضنته وبست خده …
ظل يضحك وبعدني شوية وراح …
بقيت اكمز من فرحتي ورحت اركض لعمي وعمتي كتلهم وهم فرحوا وشجعوني ..
بس بالليل ظل عقلي يحلل …
صرت مثله .. هو شغلته يحلل هاي وظيفته ..
وانه هسه اريد احلل تصرفه وياي اليوم ..
باس راسي ..
وضحك وياي وكلي لازم البس الحلقه وماانزعها ..
معقولة بدا يتغير؟
لا لا كافي ياسه لاترجعين مثل الاول تركضين وراه ..
كافي عيشي لنفسج هسه ..
فكري بنفسج لاتشترين القهر …
حاولي ترجعين ياسه الي الكل يحب ضحكتها وروحها المرحة الي اذا غابت يوم عن مكان كلها تكول وحشه ومكانج فارغ درسي ..درسي وانسي كرم ..
عمي ماقصر تابعلي موضوع الامتحان الخارجي ..
وجنت ادرس ليل ونهار ادرس …
مو بس جورية جانت تشجعني ..
الكل جان يشجعني حتى هو كرم نفسه جان مرات يعاملني مثل الجهال الزغار يجيبلي قرطاسية ودفااتر وملازم بس جان هالفترة ابعد مايكون عني …
حيرني هالكرم .. مره زين ومره لا …
ليش كلما تدنه خطوه ترجع تبتعد اكثر من الاول؟
فصول الرواية: 1 2