_ سمعت إنك كنتي مخطوفة، فجيت اطمن عليكي.
غمضت عيونها بيأس، و حاولت تنتقي كلامها بدل ما تتخانق معاه، لكنها تراجعت فورًا لما شريف كمل و قال:
_ تخيلي كريم كان مفكرني أنا اللي خاطفك!! مش عارف ازاي ممكن يشك في صاحبه كدا!
بما إنهم صحاب و الدبانة شريف مش عايز يحل عن دماغها، يبقى على الأقل تستفيد منه قبل ما تمسح بكرامته الأرض، فابتسمت بخفة و قالت:
_ شكرًا على ذوقك، ألا صحيح كريم أخباره ايه؟
_ كويس الحمدلله، أنا لسه كنت عنده في الورشة.
_ اه ربنا يعينه، دا أخد ضربة شديدة على دراعه.
_ ايه ده بجد! امال بينزل يتمرن في الجيم ازاي؟!
كانت حريصة إنها تعرف من شريف اسم الجيم اللي بيتمرن فيه كريم، مع إنها لحد دلوقت متعرفش اسم شريف أصلًا، وبعد ما اخدت منه المعلومات اللي عايزاها اتهربت منه بحجة الشغل، و سابته و مشيت.
في الوقت اللي كان كريم مشغول في حياته و أموره، مكنتش نيچار قادرة تبطل تفكير فيه، و اشتركت في الچيم مخصوص عشان تشوفه، لكنها كانت بتروح في مواعيد مختلفة، و لما أخيرًا راحت في وقت تواجده أخدت أكبر صدمة.
كانت واقفة تتأمله من بعيد و هو بيتمرن، فجت بنوتة وقفت جنبها وقالت:
_ اهو دا بالذات بقى محدش يقدر يقرب منه.