★★★★★★
تاني يوم و هو شغال في الورشة حس بوجع ايده بيزيد، فقعد على كرسي خشب جانبي و هو بيحرك ايده بشكل تكراري و كأنه بيقيم نسبة الألم، في الوقت ده سمع صوتها الأنثوي الرقيق:
_ بتوجعك؟؟
رفع دماغه و بصلها بدهشة:
_ آنسة نيچار! بتعملي ايه هنا؟
_ جاية مع بابا، المهم قولي إيدك عاملة ايه؟ بتوجعك من الضربة بتاع امبارح صح؟
اكتفي بابتسامة خفيفة:
_ أبدًا، أنا كويس.
لما وصل والدها مكنش في مكان انهم يقعدوا فيه عشان كدا أخدهم كريم لشقته، و رحبت بهم والدته اللي أخدت نيچار و قعدت معاها بعيدًا عن كريم و والدها اللي شكره على إنقاذ بنته الوحيدة، و تعبيرًا عن امتنانه كان حابب يعفيه من مصاريف المدرسة و مش بس لبنت اخوه، بل لأي حد يخص كريم، لكن كريم رفض الموضوع بأسلوب قاطع.
و في طريقهم للبيت سألت نيچار والدها عن اللي حصل، فكان رده:
_ رفض الموضوع، الشاب دا عنده عزة نفس شديدة، يعني أنا لما قرأت المعلومات اللي كتبها في الاستمارات قولت دا هيتبسط جدًا بعرضي، بس حصل العكس و حسيت إنه اضايق.
اكتفت نيچار بابتسامة إعجاب، و معلقتش على كلام والدها.
★★★★★★★
بمرور يومين كانت نيچار مع طلاب المرحلة الأولى بتعلمهم الرسم، لما ظهرت لها واحدة من العاملات وعرفتها إن في شاب مستنيها في جنينة المدرسة، خرجت نيچار على أمل إنه يكون كريم، لكن خاب أملها لما شافت شريف اللي استقبلها بابتسامة عريضة: