رواية الحب بيجمع ناسه الفصل الرابع 4 بقلم هند سعدالدين (الرواية كاملة)

ــ إنتي لسه مفطرتيش وبتشربي قهوة على الريق؟

ــ تحكمات الخطوبة بدأت..

ــ في فرق بين التحكمات والخوف..

غمضت عيني لثواني، واتنفست بغضب..

ــ أنا مش بضايقك، لما بنحب حد، اللي يزعله يزعلنا، ولو تعب بنتعب معاه، وأنا خايف فعلًا عليكي..

بصيت له لمدة ٣ ثواني، قربت من الجدار الفاصل ما بيننا، سندت على البلكونة بشكل مريح شوية..

ــ عندك حق، بس مش بقدر أكل حاجة الصبح..

ــ عارف، ويمكن عشان لوحدك، طنط مش بتصحى بدري وإنتي ما بتحبيش كمان تاكلي لوحدك..

ــ والحل؟

ــ نفطر سوا..

بصيت له بنص عين..

ــ أنا مش هقوم من نومي كل يوم عشان اجهز فطار، حرام عليك يا عابد..

ضحك عليا..

ــ أنا مطلبتش منك حاجة..

ماعدتش ثانية غير وشوفت طنط إلڤان دخلت البلكونة، بابتسامتها اللي مش بتفارقها..

ــ تعالي يا بنت، جهزت لكم الفطار..

برقت..

ضحك عليا..

ــ أنططها يا ماما من هنا؟

ردت بلكنة حاولت تبين إنها مصرية.

ــ لم نفسك يا عابد، البنت تقع.

شاورت له يقرب..

ــ هي مامتك بتقول عليا بنت ليه؟ اسمي هند وهي عارفاه..

ــ بطلي حروب نفسية بقى، هي عشان حبيتك بتقولك كده..

ــ خلاص متحبنيش، بس تقول اسمي..

ضربني بصوبعه على راسي..

ـ يلا يا بنت..

قالها ودخل من باب البلكونة وهو بيضحك.