هى لو بتحب اخوكي.. كان ممكن .. ع الأقل كانت هتخاف عليه. لكن دى واضح أوى أنها مش بتاعت حب أصلا!!!!
الدكتوره سوزان…
بصيت ل شريف وقولت له أول مرة تقول كلام مقنع.. أنت صح دى باعت شغل وبس… يعني ممكن تيجي بالفلوس مش بالحب.
واتصلت ع سلامة وقولت له الفطار وصل تعالوا…
برك…
عرفت من الامن، أن في أكل وصل ل مكتب الدكتور سلامه دخلت لهم وبقولهم كدا بتفطروا من غيري وببص لقيت بنت غريبه قاعدة معاهم… قولت أنا آسف. ولسه خارج نطقت البنت وقالت والله أبدا تعالي اتفضل الأكل كتير…
بصيت ل الدكتور سلامه وللبنت وحسيت أنها مختلفة وفي حاجه شدتني لها يمكن براءتها وعفويتها في الكلام..
ولقيت الدكتورة سوزان بتقولي تعالي يا برك.. أكيد رشا هتكون مرتاحه لوجودك… وبدأت تعرفني عليها…
أد إيه هى دمها خفيف ومحستش بالوقت إلا لما قامت وقفت وقالت أنا اتأخرت ومضطرة. أمشي…
قومت بسرعة وقولت لها تعالي اوصلك…
الدكتور سلامه…
أول مرة أشوف برك معجب ب حد.. وكان واضح من نظرات عينه واسلوبه في الكلام.. وأول ما قررت تمشي. لقيته بيطلب منها أنه يوصلها… بصيت ل سوزان لقيتها بتغمز ليا علشان متكلمش.
الدكتوره سوزان..
إيه رأيك تحبي سلامة ولا برك اللي يوصلك.. أنا عن نفسي أتمني سلامة بس أنتي اللي تقرري وتختاري بنفسك..