صرخت بغضب اعمى
# وه وه وه…..اخوك؟ من ميته و هو اخوك؟ اوعاك يا ولدى تركبه علينا
نظر لها بامتعاض و اجابها بهدوء وثير
# انى معرفش انتى ليه بتكرهيه اكده يا امه؟عشان ولد ضرتك؟! طيب اول هام الغلطان كان ابوى مش سليم و حتى ابوى مغلطش لان ده شرع ربنا و سلو بلدنا و محدش يجدر يغلطه فيه
بكت بحرقه تردد
# كيف ده؟ لما يبجى متچوز بنت عمه و يروح يتچوز عليها يبجى اكبر غلط و الكل لازمن يجف له
حرك راسه موافقا على حديثها يردد بتفسير
# و انى معاكى يا امه…طيب جوليلى ليه لما سيد اخوى الله يرحمه راح اتچوز على بنت عمه كنتى واجفه معاه و فى صفه؟
اجابت فاطمه
# عشان مرته خلفتها كانت كلها بنات
ضحك بسخريه و ردد
# يا امه كلنا متعلمين و عارفين انها طالما خلفت يبجى معندهاش عيب و نوع العيل ده الراچل هو اللى بيحدده و انتى خابره اكده و الحكايه كلها كانت ملاوعه عشان كان رايد بنت الشيخ رضوان و اهو اتچوزها و خلفتها هى التانيه كانت بنات
زفرت بحنق و جلست تزمزم بفمها تتذمر من حديث وليدها فجلس بجوارها يهدأها و يردد
# احنا لازمن نبجو يد واحده، عيله الراوى لو اتفرجت و انقسمت حتلاجى كل العائلات التانيه چايه تنهش فى لحمنا و اولهم عيله الحديدى اللى جتلو اخوى، يبجى ازاى الحال بجى لما ننهشو احنا فى لحم بعض….سيبنا ايه للغريب يا امه؟ و سليم ذنبه ايه و هو طول عمره بيحاول يبجى منينا، الله يرضا عنيكى يا امه بكفياكى عاد ضرتك ماتت و مبجاش ليها لازمه العداوه دى خلينا نشوف مصالحنا و احنا من غير سليم حنبجو ولا حاچه لانه هو اللى جدر يكبر الشغل و يوصلنا للى احنا فيه ده