هز راسه بالرفض فاكملت
# حتقعد معانا و احنا بنات؟
لمعت عيناه و لم يجد اجابه فهتفت
# يبقى جاى تعمل ايه؟ لا انت حينفع تقعد مع چاك و صحابه و لا حينفع تقعد معانا….يبقى جاى ليه؟ حارس شخصى مثلا؟و لا جاى تراقبنى؟
تلعثم و ردد
# انا مكنتش فاكر كده….. كل الحكايه خفت تسافرى لوحدك و…..
قاطعته بضيق
# انا مش صغيره….و مش محتاجه حمايه و بطل تعمل عليا حصار لانك لسه مبقتش جوزى، و حتى لو ده حصل برده حفضل ليا شخصيتى و مش حسمح لحد انه يلغيها، يا ريت تفهم بقى
نظر لها بضيق و ردد بحزن خيم على صوته
# انتى ليه كده؟ كل ما احاول اقرب منك تبعدينى باسوء طريقه، بجد انا احتارت معاكى و مبقتش عارف اعمل ايه عشان تحبينى؟
تضايقت من حديثه فحاولت ان تهدأ و رددت بصوت جامد
# يا ياسر انا مشكلتى مش معاك انت بالذات و الله صدقنى، انا فعلا مش حابه مواضيع الحب و الارتباط و الجواز….يعنى كل ده مش فى بالى و خططى كلها مفيهاش لا زوج و لا عيله
ابتسم بغصه و ردد
# و ايه السبب يا ترى ؟ كل بنت ده بيكون حلمها حتى لو كانت ملكه انجلترا
اجابته بحده من استخفافه بها
# معقده يا سيدى…..ارتحت؟ انا واحده معقده و مش حابه الارتباط و انت فاهم كويس جدا ان خطوبتنا بس عشان ارضى بابى و غير كده مفيش قوه على الارض ممكن تخلينى اتجوز